Sualam tianga mi hian ngāi
2
1 Hatuka rēng Herod hun lāi han Judia rama Betlehem khuana Isua chu ahong anzira.
Hava lāi han enta,
sualam tiang āta ārsi ruia mi hian ngāi Jerusalem khopui ahong pan u na.
2 Hatuka amānīn:
“Jihudi ngāi rēng athar anzir ha hovan tiang mo ei om?
Asik chu sualam tiang āta ama ārsi nei mu ani na.
Hasika han ama anmōk ranga nei hong,”
ati na arakel u na.
3 Hava ha rēng Herodān ariata amalung anbuai sabaka.
Ama bila Jerusalem khopuia mi ngāi dōrām amalung anbuai u na.
4 Hatuka amān chāizūng alian ngāi le vāntāng ranga dān mīnchū ngāi dōra mun khata abūma:
“Krista ei anzirna rang mun hovan mo?”
ati na arakela.
5 Amānīn:
“Judia rama Betlehem khuana,”
ati na amasang u na.
Asik chu dearin hintin hin alei maziaka:
6 “O nang Judia rama
Betlehem,
Judia ram oppu ngāi bila sīn
khīt nō ta ni.
Asik chu na sūng āta ruaitu
khat hong anzir inti.
Amān ka mi Israel ngāi chu
hong maruai inti,”
(Mik.5:2 )
ati na.
7 Hankēng Herodān ārsi ruia mi hian ngāi chu akōma maruktena apāia.
Amāni kōm āta asa dima ārsi ei anlangna ahun amāphā chu athūn vanga.
8 Hatuka amāni chu Betlehem tianga aman sēna.
Amān:
“Sē u tānla nāitete chu asa dima vathūn u ro.
Koi um asēna kei vamōk theina ranga na vamu u le na hong manthei rēt u ro,”
ati na.
9 Hatuka rēng achong arangāi sua u le asē u na.
Amāni ei sē u na bibila sualam tianga ārsi ei mu u hān nāite omna radīn asuak māseng amaton u na aruai tira.
10 Ārsi amu u le chu achālaka arāi asān u na.
11 Hatuka ina avatung u na anu Mari bila nāitete chu avamu u na,
anbok laka avamōk u.
Hatuka apuakkhur arasua u na rāngkachak,
bero,
mura marim ahui ngāi avapēk u na.
12 Hatuka Herod akōma chu akīr rēt lāi nōkna ranga aramang u na Pathianin arila.
Hasika han amāni chu lam atei tianga aram akīr u na.
Aigupta rama avarotpui
13 Hatuka chu asē sua u le enta,
Puma vānpalāi khatin Joseph aramanga akōma ahong anlanga.
Akōma:
“Anthui tānla nāite le anu ruai tān Aigupta rama varotpui ro.
Asik chu Herodān nāite athat ranga ei arok kēng ani zei.
Hasik han ka na manthei rēt māseng chu sova son vaompui ro,”
ati na.
14 Hasika han Joseph anthuia,
zān lena nāite le anu chu aruaia Aigupta rama ranga asuakpuia.
15 Herod athi māseng chu sova son avaompuia.
Hivan tin hin deari amanga Pumān chong ei ril chu ei hong kip theina ranga ani na.
Asik chu dearin:
“Aigupta ram āta ka nāi pasal
chu ka pāi zei,”
(Hos.11:1 )
ati na.
16 Herod chu ārsi ruia mi hian ngāiin ei huang u kēng ti ariat suale achālaka atak asina.
Hasika han mi hian ngāi kōm āta asa dima athūn lāia ahun azoro len āta Betlehem khua le aravēla nāite pasal kum anni le athuaia mi dōra chu athat zit ranga chong apēka.
17 Hivan tin hin deari Jeremian chong alei hong ril ngāi ei hong kip theina rang ani na:
18 Amān:
“Rama khuana rahu
khat ahong anthang chu
āchap le ānkhēk rasa
Rakili chu anāi ngāi achāna
āchap zei,
Amāni ngāi ei bui u lāi sika
atāI rang zōt lāi mak,”
(Jer.31:15 )
ati na.
Aigupta ram āta Nazaret khuana akīrpui
Lk.2:39 -40
19 Tenchu Herod athi suale enta,
Puma vānpalāi khat Aigupta rama Joseph aramanga ahong anlanga.
20 Ama kōma:
“Anthui tānla,
nāite le anu ruai tānla Israel rama kīrpui ta ro.
Asik chu nāite athat ranga āval ngāi chu athi sua u zei,”
ati na.
21 Hasika han ama chu anthuia nāite le anu aruaia Israel rama ei kīrpui ani na.
22 Tenchu Arkelausa chu apa Herod asutmuna Judia rama lal achang zei ti ei riat sika han asē rang āchīna.
Pathianin aramanga ei manthei sika han Galili rama ei kīrpui ani na.
23 Hatuka Nazaret khua ei ti u han avaompuia.
Hivan tin hin:
“Ama chu Nazareta mi antīnti,”
ti deari ngāi chong alei ril u ha ei hong kip theina rang ani na.