Isua le Baptispu Johan
Lk.7:18 -35
11
1 Havan tin han Isuan azolāi Sōmleianni ngāi kōma achong pēk ngāi aril vang suale ama chu havan āta khua tei khua teia mi avānchū rang le chong avaril ranga asuaka ei sē ani na.
2 Hatuka ankhumna ina ānkhum Johanin Isua asin thō ngāi alei riata azolāi anni ngāi kōma hiva chong hi avānkel ranga Isua kōma amansēna.
3 Amān:
“Mīn ahong rangpu ei ti ha,
nang mo na ni zei,
ole mi tei rang koinīn na lei ngāk rang?”
ati na avamankela.
4 Isuan amāni kōma alei masanga:
“Sē u tānla,
nangnīn nei riat le nei mu u ngāi dōra Johan akōma varil u ro.
5 Mit achō ngāi avār zei,
ke khor ngāi kal achōi zei,
aphār ngāi anthiang zei,
kuar asēt ngāi avār zei,
athi ngāi anthui zei,
hanūk chu anriang ngāi kōma thang ahui anril zei.
6 Hatuka chu koi ka sika ankhārna dōn lui chu ravān āsa kēng,”
varil u ro ati na.
7 Hatuka Johan azolāi ngāi asē sua ule Isuan mipui kōma Johan arui aril aphut lena:
“Philchār rama han hong zāt a en ranga mo nei sē u?
Thinthīn ei zāp māiluang bil a en mo?
8 Hanle hong zāt a en ranga mo nei sē u?
Puan anthang ansil miring a en ranga mo nei sē u?
En u ta,
puan anthang ansil miring ngāi chu rēng ina kēng ei om u.
9 Hanle hong zāt a en ranga mo nei sē u?
Deari en ranga mo nei sē u?
Hava ani lele na.
Kei na ril ani u zei,
ama chu deari nēka alian kēng.
10 Asik chu ama rui hi Pathian Lekhabūna anziaka:
‘En ro,
nang na matona ka
palāi chu hong tīr ka ti,
Amān na matona na lampui
chu na lei sin pēnti,’
(Mal.3:1 )
ti chong ha.
11 Taktaka kei na ril ani u zei,
nupang vonsūnga anzir lim bila Baptispu Johan nēka alian tutē anzir la om mak.
Hanum nisela vānrama chu asīn khīt ngāi bila ngal ama nēka alian u kēng.
12 Tenchu Baptispu Johan ahun len āta atun ten pei vānram chu ranak asonga mīn ei lua kēng ani zei,
hava ha arāt ngāiin apūttit u na.
13 Asik chu aloma deari le dānbu ngāi dōrān Johan ahun ten pei Pathian chong alei hong ril sua u ani zeia.
14 Nangnīn hiva chong hi na pom zōt u ten rāngāi u ro,
ama hi ani zei Elija ahong rang anti chu.
15 Anngāina kuar adōn takin rangāi rase.
16 Tenchu hiva huna mi ngāi hi hong le mo kei mankhi rang?
Amāni ngāi chu bazār muna ansut pasal sanāite ngāi alōm ngāi apāi ang ani u na.
17 Hintin hin ati u na:
‘Nangni ranga theilia nei tum,
tenchu lām u mak chena.
Ningbuina la nei thō,
tenchu
anngūi u mak chena.’
18 Asik chu Johan ahonga bu sāk ne mak,
zu ne mak.
Hasik han mīn:
‘Raluai adōn kēng,’
ati u na.
19 Miring Nāi Pasal chu ka honga bu sāk ka nēk zita,
hasik han mīn:
‘En u ta,
ānruak le zu āndu so,
siachōi ansuang ngāi le mi salui ngāi mal so,’
ana ti u na.
Tenchu hiannān chu asin thō lehan atak ahong manlang,”
ati na.
Ansīr lui khua ngāi
chunga vānduaina
Lk.10:13 -15
20 Hatuka chu Isuan tichangabui sin ātam riai ei thōna khopui ngāi chunga vānduaina chong arila,
asik chu hava khopui ngāi ha amalung mansīr u lui ani na.
21 Hasik han:
“O Korazin!
na vānduai rase.
O Betsaida!
na vānduai rase.
Asik chu nangni kōma tichangabui sin anthō ngāi ha Tura le Sidon khuana anthō ni sela chu machin āta amāni chu bosota rasila ravut ankhuana malung mansīr u zei ni.
22 Hasik han kei na ti ani u zei,
ruiril nikhua tika chu nangni nei tiar u rang nēka Tura le Sidon khua ngāi ei tiar u rang azia om bet inti.
23 Hatuka nang Kapernaum,
anvān ten pei ansāng rang mo nei anti?
Tenchu athi khua ten pei vachum in na ti.
Asik chu na kōma tichang abui sin anthō ngāi ha Sodom khuana anthō ni sela chu avian tena la om unti.
24 Hasika han kei na ti ani u zei,
ruiril nikhua tika nang nei tiar rang nēka Sodom khuan ei tiar rang azia om bet inti,”
ati na.
Apōng le puak arik
ngāi ranga pōngansana
Lk.10:21 -22
25 Hava suale Isuan:
“O ka Pa,
phil le anvān Puma,
nang ka na manpāk,
asik chu hiva rui ngāi hi mi hian le mi thei ngāi kōma manlang mak chena,
tenchu hiva nāipangte ngāi anga om mi ngāi kōma kēng nei manlang.
26 Ani ka Pa,
hava ngāi ha nang na malung vong ang kiara kēng.
27 Hatuka ka Pain alom peia ka kōma ei na betōk kēng ani zei.
Tutēn Nāi Pasal hi ana riat om mak,
Pa rong nōk chu.
Hanūk chu tutēn Pa hi ariat om mak,
koi Nāi Pasal rong nōk chu.
Hanūk chu Nāi Pasalin kei zōt tak kōma Pa kei manlang hi ama rongin anariata.
28 O apōng le apuak arik ngāi,
na lom u na ka kōma hong u ro,
koiin pōngansana chu na pe u ka ti.
29 Ka rīngkola pēl u ro,
hanūk chu ka kōma hong anchū u ro.
Asik chu asing le aphūk adāi ka ni,
hasika han na sūngrīl u na rang pōngansana na pe u ka ti.
30 Asik chu ka rīngkol hi apēl āhui le ka puak hi āzāng,”
ati na.