Mi rui rilsiat rui
Lk.6:37 -38, 41 -42
7
1 Na rui siat ei anril nōkna ranga mi rui rilsiat u nō ro.
2 Asik chu mi siat nei ril anga na chungām mīn na siat ril unti.
Nei mankhīna nei mang dēn lehan na chungām mīn na mankhīna unti.
3 Na mita thingherpa a om mu luia hontin mo na parual mita om thingdite nei mu thei?
4 Enta,
na mita thingherpa adōn chunga hontin mo na parual kōma:
‘Na mita thingdite ha na kel pe rong,’
nei ti thei?
5 O nang phuazekām,
na mita thingherpa a om ha kel mānsa ro.
Hatuka na parual mita thingdite om ha akel ranga anthiang vanga mu theiin na ti.
6 Ui ngāi kōma neinun ānthiang pe u nō ro.
Hanūk chu vok ngāi kōma lunglu dēnga pei u nō ro.
Han tin han na thō ten ake thuaia athin chit untia,
hatuka chu na tiang hong kīra na hong thēt chit inti.
Zong ro,
arok ro,
atōk ro.
Lk.11:9 -13
7 Zong u ro,
na pēk unti.
Ravān u ro man un na ti.
Atōk u ro,
suakkhār na malong pe unti.
8 Asik chu tukareng azong takin ei man ani na.
Hanūk chu tukareng anrok takin ei mu ani na.
Hanūk chu tukareng antōk takin aranga suakkhār anlong pe ani na.
9 Nangni pa ngāi bila tu mo na nāi u ngāi bila ruti azong sela lung apēk rang na ni u?
10 Hanūk chu ngā zong sela tu mo marūl apēk rang na ni u?
11 Nangni mi salui ngāi lua mana na nāi u ngāi kōma neinun āsa apēk na riat u na.
Anvāna na Pa u kōma azong tak vāng chu ituk neinun āsa mo ei na pēk u rang ni mak mo?
12 Hasik han mīn na chunga ana thō pe ranga nei zōt u anga mi chungām thō u ro.
Asik chu hiva tak hin dānbu le deari ngāi lekhabūna anchūna abul ani na.
Makot anchīp le makot a-āi
Lk.13:24
13 Makot anchīpa lūt u ro.
Asik chu makot a-āi le lampui alian chu anpeina tianga ei ruai ani na.
Hava han alūt um ātam sabak ani na.
14 Tenchu makot anchīp le lampui antak chu damna tianga ei ruai ani na.
Hava lampui atok chu mi alakte kēng.
Thingkung le amara ngāi
Lk.6:43 -44
15 Deari rothol ngāi āta anrēng u ro.
Asik chu na kōm u na bera mul ansila hong unti.
Tenchu asūng u na chu ngelang arāng ang kēng.
16 Hava ngāi ha amara nāta riat len thei un na ti.
Mīn lingkem kung āta gerep mara mo akham ngāi?
Hanūk chu mīn ramborei kung āta theichang mara mo akham ngāi?
17 Havan tin anga thingkung āsa dōra chu theimara sa ama zira.
Tenchu thingkung āsiat ngāi chu theimara siat ama zira.
18 Thingkung āsana theimara siat anra ngāi mak.
Hanūk chu thingkung āsiatām theimara sa anra ngāi mak.
19 Amara sa lui thingkung dōra chu mīn ei tuka moia ei pei ani na.
20 Havan tin ha amāni chu amara nāta anthiang vanga riat thei un na ti.
21 Tukareng,
‘Puma,
Puma,’
ati na ana pāi dōra vānrama alūt len rang ni mak.
Tenchu ka Pa anvāna om ei zōt āthō ngāi rong kēng alūt rang.
22 Hava nikhua tika chu mi tamtakin,
‘Puma,
Puma,
koinīn na raminga Pathian chong ril mak me mo?
Na raminga raluai ngāi razūl mak me mo?
Na raminga tichangabui sin thō mak me mo?’
ti unti.
23 Hava tika han amāni ngāi kōma:
‘Tu mo na ni u,
na riat u makung.
Nangni āsia thō ngāi,
ka kōm āta ankhāia sē u ro,’
ati na la manriat u ka ti.
Āhianpa le āmopa insin rui
Lk.6:47 -49
24 Hasik han tukareng ka kōm āta hiva chong ngāi ariata azī tak chu mi ahian khat le mankhi inti.
Hava mi ha chu lungpui chunga in asin ang nīnti.
25 Rua ahonga,
tiliansāng ahonga,
phāivuanrik ahonga hava in ha ahong suka.
Tenchu lungpui chunga chopui bul ei phun sika masiam thei mak.
26 Tenchu tukareng ka kōm āta hiva chong ngāi ariata azī nōk tak chu bali chunga in asin āmopa ang nīnti.
27 Rua ahonga,
tiliansāng ahonga,
phāivuanrik ahonga hava in ha ahong suka.
Tenchu aloma achiam zita asēna.
Hava in ei chiam chu āsiat sabak,”
ati na.