Mi aphār khat ei dam rui
8
1 Hatuka ama chu mual āta ahong chum suale mipui ātampān anūk azī u na.
2 Hatuka hava lāi han aphār khat hi ahonga akōma:
“Puma,
nei zōt aniten,
nangin nana manthiang thei,”
ahong ati na.
3 Hatuka Isuan akut lehan avatōna:
“Nang nei anthiang rang hi kei na zōt,”
ati na.
Hatuka anlāiseka aphār āta ahong anthiang lena.
4 Isuan akōma:
“En ro,
tutē kōma varil nō ro.
Tenchu na thei daka chāizūng kōma sē tānla vamanmu ro.
Hanūk chu mīn ei na riatpuina ranga Mosi dān anga anbōlna dāli vadar ro,”
ati na.
Sipai raza ruaipu iamna
Lk.7:1 -10
5 Hatuka Isua Kapernaum khuana ahong alūtle sipai raza ruaipu khat akōma ahonga.
6 Hatuka akōma:
“Puma,
ka suak dōn khat hi apang athi pena ina om ani na.
Achān adūk ana pe chachak kēng ani zei,”
ati na andam ranga avamathēma.
7 Isuan akōma:
“Āsēna vamandam ka ting,”
ati pena.
8 Tenchu sipai raza ruaipūn akōma:
“Puma,
ka ina anāntung rua ngal ni makung.
Hasik han na chong duai le ngal na ti pe ro,
ka suak chu hong dam len bo ni.
9 Asik chu koi um mi ningneina thuaia om ka ni na.
Hatuka sipai ngāi ruaitui ka ni na.
Amāni bila angkhat pei kōma:
‘Sē ro,’
ka ti ten asē u chachaka.
Hanūk chu atei angkhat kōma:
‘Hong ro,’
ka ti ten ahong u chachaka.
Hanūk chu ka suak dōn kōma:
‘Hiva hi thō ro,’
ka ti ten athō chachaka,”
ati na amasanga.
10 Isuan hava chong ha ariata aboi adonga.
Hatuka anūk azī ngāi kōma:
“Taktaka kei na ril ani u zei,
ama anga iamna alian adōn hi Israel kāra la mu ngāi makung.
11 Tenchu kei na ril u ani zei,
sualam le tāklam āta mi tampa la hong unti.
Vānrama Abraham,
Isaak,
Jakob ngāi bila bu nēk ranga la hong ansut unti.
12 Tenchu hava ram sūnga mi ngāi chu Pathianin apanga azīng kāra pei inti.
Hava han achapna le rakam anrialna om inti,”
ati na.
13 Hatuka Isuan sipai raza ruaipu kōma:
“Sē pei ta ro.
Nei iamna anga na tak chunga om rase,”
ati na.
Hatuka asuak dōn chu hava ahun tak lelena han alei dama.
Isuan mi tampa amandam
14 Hatuka Peter ina Isua ahong le Peter atarpi chu atakin ei tuna zamuna alei zāla om avamu na.
15 Isuan akut le avatōn pe le atakin ei tun chu amathān lena.
Hatuka ama chu anthuia arang u na adorbo adom lena.
16 Hatuka khului ahong asuak le raluain ei sūr mi tampa akōma ahong ruai u na.
Amān achong duai le raluai ngāi chu arazūla,
ana dōra aloma amandama.
17 Hiva hi deari Isaia achong ril ei hong kipna rang ani na.
Asik chu:
“Koini nei rāt nōkna ngāi dōra
chu amān ana lāk pena.
Koini nei natna ngāi dōra chu
ana pēl pe zita,”
(Isa.53:4 )
ti ha ani na.
Isua nūk azī ei lu rui
Lk.9:57 -62
18 Hatuka Isuan akōl akianga mipui ātampa amuna.
Hasika han tipui sontiang varāla ankān ranga azolāi ngāi kōma chong apēka.
19 Hatuka hava han dān mīnchūpu khat ahonga ama kōma:
“Mīnchūpu,
nang nei sēna tina na nūk kei na hong zī rang,”
ati na.
20 Isuan akōma:
“Sihal ngāiin khur adōna u na,
chunga vā zuang ngāiin rabu adōn u na.
Tenchu Miring Nāi Pasal ka lu kei siakna rang mun chu om mak,”
ati na.
21 Hanūk chu zolāi atei khat rētin akōma:
“Puma,
na mansēbak tānla,
ka pa rong hi thān khura na vamanphūm ro,”
ati na.
22 Tenchu Isuan akōma:
“Ka nūk na hong zī pei ro,
āthi ngāiin athi phūm u rase,”
ati na.
Isuan phāivua aman mong
23 Hatuka ama chu rakuanga avachuang suale azolāi ngāiin anūk azī u na.
24 Hankēng enta tipuiliana han phāivua anrikpa ahonga tiduar ansokin rakuang chu asuk sabaka.
Hanum nisela Isua chu ain zāta a om a.
25 Hatuka zolāi ngāiin ahong mathui u na:
“Puma,
athi sua rang na ni zei hile,
na san ta ro ba!”
ati u na.
26 Hatuka Isuan amasanga:
“O iamna atōm ngāi!
ichang mo na ratha nei manta u?”
ati na.
Hatuka ama chu anthuia phāivua le tiduar ansok āngōna.
Hatuka nukhōna ahong among lena.
27 Tenchu hava mi ngāi ha ati na chang re u lāi mak.
Amānīn:
“Hiva mi hi hong zāt miring mo?
Phāivua le tiduar ansok ngalin ahē ei tel hi?”
ati u na.
Raluain ei sūr mi
anni ngāi ei dam rui
28 Hatuka Isua chu tipui sontiang varāla Gadarin rama avasuaka.
Hava han raluain ei sūr mi anni ngāi ha thān khur āta ahong asuak u na.
Hava ngāi hān ama antongpui u na.
Hava ngāi ha achālaka anchi ruai ani u na.
Hasika han hava lampui tianga tutē asē ngam om u mak.
29 Hatuka enta,
hava ngāi ha ankhēk u na:
“Isua,
Pathian Nāi Pasal,
nangin hong mo koini na chunga nei na thō rang?
Aphāmān āta anānsinsak ranga ahong mo na ni?”
ati u na.
30 Amāni kōm āta varāl uala vok rual ātampa anvāi a oma.
31 Raluai ngāiin akōma:
“Nei na razūl aniten,
vok rual bila son na mansē ro,”
ati na amathēm u na.
32 Hatuka amān:
“Sē u ro,”
ati na.
Hatuka asuak u na vok rual bila ei sē u.
Hatuka enta,
vok rual dōra chu anrapa rōl raha ansānga tipuiliana avachul u na anninga athi zit u na.