Isua anthēmna achul
4
1 Hava suale Isua chu diabol anthēmna ei chulna ranga Ratha hān mi buina rama aruai lena.
2 Sūn sōm mali le zān sōm manli bu ngoia a om suale chu avon ahong anchām pena.
3 Ama anthēmna athōpu chu akōm ahonga:
“Pathian Nāi Pasal na ni ten,
hiva lungte ngāi hi ruti ei chang theina ranga chong pe ta ro,”
ati na.
4 Tenchu Isuan akōma:
“Miring hi ruti duai le dam
thei ngāi mak.
Pathian bāi āta chong asuak
ngāi chip le kēng ei dam
rang,”
(Dān. 8:3 )
ati na kēng anziak ati na amasanga.
5 Hava suale diabolin khopui ānthianga asē puia,
Pathian biak in asīpa avān dingpuia.
6 Hatuka akōma:
“Pathian Nāi Pasal na ni ten,
thuai tianga son antōm ta ro,”
ati na.
Asik chu:
“Amānīn akut le ei na madōm
thei u na ranga avānpalāi
ngāi kōm chong
pēk intia,
Lungin na ke ngāi chu alei suk
thei nōkna ranga,”
(Sām 91:11,12 )
ati na anziak ani na.
7 Hanūk chu Isuan akōma:
“Puma na Pathian chu mansin
nō ro,”
(Dān. 6:16 )
ati na anziak kēng,
ati na amasanga.
8 Hava suale diabolin mual ansāngpa khata avakalpui rēta.
Maniapūr pumpuia ram le asūnga om ei huina ngāi dōra amanmu zita.
9 Hankēng akōma:
“Anbok laka koi hi na na mōk ten,
aloma hiva ngāi dōra na pēk zit ka ti,”
ati na.
10 Isuan akōma:
“Soitān,
ankhāi tān sē ro!
Asik chu:
‘Puma na Pathian rong amōk
tānla ama adorbo adom ro,’
(Dān.6:13 )
ati na kēng ei anziak,”
ati na.
11 Diabol chu akōm āta ankhāia asēna.
Hatuka vānpalāi ngāi ahonga ama dorbo ahong adom u na.
Isuan Thang Ahui aril aphut
12 Hatuka Johan chu ankhumna ina ānkhum ranga anbetōk sua zei ti Isuan ariat le chu Galili rama akīra.
13 Ama chu Nazaret khua amāka,
tipuilian rauapa Zebulun ram le Naptali ram kong kāra Kapernaum khuana avaom a.
14 Hiva hi deari Isaia achong ril ei hong kipna rang ani na.
15 Asik chu Isaian:
“Jordan dung varāla,
Tipuiliana lampui,
Zebulun ram le Naptali ram
le Jentail ngāi omna Galili
ram,
16 Azīng kāra alēng nam
ngāiin ra-āng lianpa amu u
zei.
Hanūk chu thīna rama thīna
ralīm thuaia alēng ngāi
chunga lēn kōl ankak zei,”
ti anziak ani na.
17 Hatuka hava hun āta Isuan:
“Ansīr u ta ro.
Asik chu vānram chu ahong anāi zei,”
ati na chong aril ei phut ani na.
Isua zolāi mānsa ngāi anpāina
18 Galili tīpuilian kōla Isua kal achōia asē lāi han,
parual lesa Simon,
mīn Peter ei ti le anāipa Andria avamuna.
Amāni chu tipuia lēn adēnga ngā that u lāi tak ani na.
Asik chu amāni ha ngā that zāt ani u na.
19 Isuan amāni kōma:
“Ka nūk na hong zī u ro.
Koiin ngā sūr āta miring asūra na sin u ka ti,”
ati na.
20 Hatuka alēn u amāk len u na,
anūk avazī u na.
21 Havan āta ala uala asē tir u le chu parual lesa dēn,
Zabedai anāi pasal Jakob le anāipa Johan avamu rēta.
Hiva ngāi hi apa u Zabedai abila rakuanga lēn anliang u lāi tak ani na.
Isuan amāni anni rang um apāi rēta.
22 Hatuka arakuang u le apa u chu amāk raka anūk avazī len u na.
Isuan ana ngāi amandam
Lk.6:17 -19
23 Hatuka Isua Galili ram pumpui acheia,
ei ankhōm u na in tina avamanchūna.
Pathian ram ruia thang ahui avaril tira.
Hanūk chu rikhua rāikhua le ādam nōk dōra amandama.
24 Hatuka ama thang chu Suria ram pumpuia avāntheka.
Ama kōma rikhuatin atong le ādam nōk ngāi ahong ruai u na.
Raluai ei sūr ngāi,
rirangol adōn ngāi,
āzeng ngāi dōra aloma ahong ruai u na.
Hava ngāi dōra amān alei mandam kiara.
25 Hatuka Galili ram,
Dikapoli khua,
Jerusalem khopui,
Judia ram le Jordan varāl āta mipui ātampān anūk azī u na.