Isuan apang anhīp khat
ei mandamrui
9
1 Hatuka Isua rakuanga avachuanga tipui varāl ankān suale ama ei omna khuana ahong atunga.
2 Hatuka enta,
azāl muna azāl chian apang anhīp khat Isua kōma ahong razōn u na.
Isuan ei iam u na amu na,
apang anhīppu kōma:
“Ka long,
anngamna dōn ro,
āsia nei thō ngāi ka na madual zei,”
ati na.
3 Hasik han en u ta,
dān mīnchū ngāi senkhat amāni le amāni achong u na:
“Hiva mi hi Pathian siat aril kēng sole,”
ati u na.
4 Isuan amalunga amandon u ariata amāni kōma:
“Ichang mo han tin han na malung sūnga āsia nei mandon u?
5 Asik chu hova mo ati abei ual:
‘Nei masial ngāi ka na madual zei,’
ati mo?
Ole ‘Anthui tānla kal achōia sē ro,’
ati mo?
6 Tenchu Miring Nāi Pasal hīn maniapūra āsia andualna ningneina adōn ka ni ti nei riat thei u na ranga kei ti kēng,”
ati na.
Hatuka apang anhīppu kōma:
“Anthui tānla na zamun adianga na ina sē ta ro,”
ati na.
7 Hatuka ama chu anthuia ina asēna.
8 Mipuiin hava ha amuna atinachang re u mak,
miring kōma hiva ang khopa ningneina apēkpu Pathian chu aman pāk u na.
Isuan Mathāi ei pāi rui
9 Hatuka Isua havan āta asē tira lampuia mi khat araming Mathāi ati na siachōi ansuangna ina ansut chu avamuna.
Isuan akōma:
“Ka nūk na hong zī ro,”
ati na.
Hatuka ama chu anthuia anūk avazī lena.
10 Hatuka hava suale chu Mathāi ina bu nēk rang ati na ansut lāi han siachōi ansuang ngāi le mi salui ngāi ātampa akōma ahong u na.
Hava ngāi ha Isua le azolāi ngāi bila bu nēk ranga ahong ansut u na.
11 Hava ha Pharisi ngāiin amu na azolāi ngāi kōma:
“Ichang mo nangni Anānchūpu u chu siachōi ansuang ngāi le mi salui ngāi bila bu ei nēk?”
ati u na.
12 Tenchu Isuan hava chong ha ariata:
“Mi dam ngāi ranga daktor nāng mak,
tenchu mi dam lui ngāi kēng anāng,
ati na.
13 Tenchu sē u tānla lekhabūna hiva chong a omzia hi vathūn u ro:
‘Anbōlna ni mak kei zōt,
tenchu lungkhamna kēng kei zong.’
(Hos.6:6 )
Asik chu mi dik ngāi akui ranga ni mak kei hong,
tenchu mi salui ngāi malung ansīra akui ranga hong ka ni,”
ati na.
Bu ngoi ruia
Isua kōma ankelna
14 Hatuka Johan azolāi chu ama kōma ahong u na:
“Koini le Pharisi ngāi chu bu na ngoi chachaka,
tenchu ichang mo na zolāi ngāi le bu ei ngoi u nōk?”
ati na arakel u na.
15 Isuan amāni kōma:
“Mākpa a om kār chu mākpa alōm ngāi mo achap ngāi?
Tenchu mākpa abil u nāta anruaina rang hun ahong rang ani zei,
hava tika chu amāni ha bu la ngoi unti.
16 Tutēn puan maruana puan athar le diba thōi ngāi mak,
asik chu puan atharin puan marua chu masiat riam inti.
17 Hanūk chu mīn zu savunbūr maruana gerep zu thar thāl ngāi mak.
Asik chu aningti ahong athui le hava zu savunbūr chu ei makhui rang ani na.
Hatuka zu savunbūr chu ei kuia gerep zu chu ei zān rang ani na.
Tenchu gerep zu thar chu zu savunbūr athar dēna kēng mīn athāl ngāi,
hankēng aninīn ha ei hōi rit thei rang,”
ati na.
Nupang sanāite khat ei thī
rui le nupang ana khat rui
18 Hatuka Isuan hiva chong ngāi aril lāi tak han,
enta,
Jihudi ngāi ruaitu khat ahonga amatona ahong amōka:
“Ka nāi nupangte chu atun phing han athi,
tenchu na hong pe tān,
achunga na kut na hong siak duai ten hong dam inti,”
ati na.
19 Hatuka Isua chu anthuia anūk avazīna,
azolāi ngāiin um abila avazī u na.
20 Hatuka enta,
nupang khat kum sōmleianni ani zei thīn ei mazān chian ani na.
Ama ha Isua anūk tiang ahonga apuan mērtete ahong tōn pe na.
21 Asik chu amalung sūnga han:
“Apuan duai ngal ka tōn thei ten,
dam bō ning,”
ati na amandona.
22 Hatuka Isua chu anhoia ama ei mu le akōma:
“Ka long,
anngamna dōn ro,
nei iamna lehan na dam zei,”
ati na.
Ama chu hava hun len āta ahong adama.
23 Hankēng Isua chu Jihudi ngāi ruaitupa ina ahong asuakle khuang asut ngāi ahong muna mi ngāiin rahu athō u na.
24 Hasik han Isuan:
“Apanga ankhāi kiar u ro,
asik chu nupangte hi athi la ni mak,
a in kēng hile,”
ati na.
Tenchu hava ngāiin maniēro athō u na.
25 Hatuka apanga mipui amasuak suale asūnga avalūta,
nupangte akut chu avasūra,
hatuka nupangte chu ahong anthuia.
26 Hiva rui hi hava muna ram tina antheka.
Isuan mit achō anni le chong thei lui khat ei mandamrui
27 Havan āta Isua asuakle mit achō pasal annīn anūk azīna.
Hava anni ngāi ha ankhēk u na:
“David Nāi Pasal,
koini na chunga lungkham na mu ro,”
ati u na.
28 Hatuka ama chu insūnga avalūtle mit achō anni ngāi ahong u na.
Isuan amāni kōma:
“Hiva hi ka thōthei ti,
na iam u mo?”
ati na.
Hatuka amānīn:
“O Puma,
koinīn na na iam,”
ati u na.
29 Hatuka amāni mit chu atōn pena:
“Nei iam u anga na chung u na om rase,”
ati na.
30 Hatuka amān amit u aman vār pena.
Tenchu Isuan:
“En u ro,
hiva rui hi tutē kōma man thei u nō ro,”
ati na achālaka akhāra.
31 Tenchu avasuak u na hava rui chu hava rama mun tina avathek u na.
32 Hatuka asuaka asē sua u lehan enta,
raluain ei sūr chong thei lui khat akōma ahong ruai u na.
33 Isuan hava raluai ha arazūl suale chong thei luipa chu ahonga chong theia.
Hasika han mipui achang adong rahei u na:
“Israel rama tutēn hiva ang hi amu la om ngāi mak!”
ati u na.
34 Tenchu Pharisi ngāiin:
“Ama ha raluai ngāi rēng lehan raluai ngāi ei razūl chachak,”
ati u na.
Sāng āt rang ātam,
sin āthō mi atōm
35 Isua chu khualian tin
le khopui tina asēna,
amāni
Jihudi ngāi ankhōmna ina mi avamanchūna.
Pathian rama thang ahui chu avarila,
hanūk chu mi tin tak chunga rikhua dōn le ana ngāi dōra avamandama.
36 Hatuka mipui ātampa avamu le chu achung u na amalung apōng sabaka.
Asik chu amāni ngāi ha aenpu abui berarual anga asōl le lam anvāi ani u na.
37 Hankēng chu azolāi ngāi kōma:
“Sāng āt rang ātama,
tenchu sin athō rang mi atōm.
38 Hasika han sāng āt rang adōnpu Puma kōma zong u ro,
amān aluia sāng āt rang mi hong tīr inti,”
ati na.