Abui ngāi kōma pēkna rui
Lk.12:33 -34
6
1 Miring mitmu rang duaia sin āsa nei thō nōkna ranga anrēng u ro.
Han tin han na thō u ten,
vāna na Pa u kōm āta itē rātpāk man u nō ta ni.
2 Hasik han nangnīn anriang ngāi kōma dān na pēk u tikle na matona totorōt tum u nō ro.
Hatuka dān na thō u le phuazekām ngāi anga thō u nō ro.
Amāni chu miring kōm āta anpākna aman ranga ankhōmna in le lampui kōla kēng ei thō u chachak.
Taktaka kei na ril ani u zei,
arātpāk man u rang chu aloma aman sua u zei.
3 Tenchu nangin anriang ngāi kōma dān na pēk tikle na chang kutin ei pēk chu na voi kut manriat nō ro.
4 Havan tin han na dān pēk ngāi chu maruka nei pēk chang rase.
Hatuka maruka nei pēk ngāi ana mu pe kiar na Pa hān hava ngāi dōra na hong thuan inti.
Bōr azong rui
Lk.11:2 -4
5 Hanūk chu nangnīn bōr na zong u tikle,
phuazekām ngāi anga zong u nō ro.
Amāni chu mīn ei mu theina ranga ankhōmna ina le lampui kōla bōr azong kēng ei zōt u chachak.
Taktaka kei na ril ani u zei,
amānīn ei lō u chu akipa aman sua u zei.
6 Nang chu bōr na zong tikle na insūnga valūt tānla na makot khāra maruka om chian na Pa kōma bōr zong ro.
Hatuka maruka ana mu chian na Pa hān na hong masang inti.
7 Hanūk chu bōr na zong u tikle Jentail ngāi anga zong nō ro.
Amāni chu a omzia bui chong ei ril munpu aril rerēt u chachaka.
Asik chu ei ril u ātam ten amān ātam uala lei rangāi bo ni ati na ei iam u ani na.
8 Hasik han amāni anga thō u nō ro.
Asik chu ama kōma na zong u mān,
hong nei zong u rang ti ha na Pa un alei riat sua ani na.
9 Hasik han hintin hin bōr
zong u chachak u ro:
‘Koini na Pa anvāna mi.
Na raming ānthiang lalchi
om rase.
10 Na ram hong tung rase.
Anvāna mīn ei thō u anga
phila mīn um thō rase.
11 Aviana rang anikhuan tina nei
nēk rang khop sāk na hong
pe ro.
12 Koini chunga āsia thō ngāi
koinīn nei madual anga,
Nangin um koini āsia nei thō
ngāi na madual ro.
13 Siatna lama na mansin nō tānla,
Āsia nāta na mazōk ro.
Asik chu na ram lianna,
anlalna,
Thōtheina tāituana na ta kēng,
Amen,’
ati na.
14 Na chunga āsia thō ngāi na madual u ten,
anvāna na Pa um na madual unti.
15 Tenchu mīn na chung u na āsia ei thō ngāi madual u ro.
Hanoten,
anvāna na Pa um āsia nei thō u ngāi na madual u nō ni.
Bu ngoi rui
16 Hatuka bu na ngoi u tikle phuazekām ngāi anga na mēl manngūi u nō ro.
Amāni chu bu ei ngoi u ei manlang theina ranga amēl ei manngūi u chachak ani na.
Taktaka kei na ril ani u zei,
ei man u rang tuk akipa aman sua u zei.
17 Nang chu bu na ngoi tikle na māiphia vang tānla na lu sariak khuavang ro.
18 Havan tin han mīn na bu ngoi ha na mu thei nō rase.
Tenchu na Pa maruka om chian mitmuna rong angoia anlang ro.
Hatuka na Pa maruka om chian hān na hong masang inti.
Vānrama dōnglua mantīng rui
Lk.12:33 -34
19 Maniapūra hin na rang u dōnglua mantīng u nō ro.
Asik chu hiva hin chu nger le a-ēkin ei sāk thei le marusa lūta ei maruk thei ani na.
20 Tenchu na rang u vānrama dōnglua mantīng u ro.
Sova son chu nger le a-ēkin sāk thei mak.
Hanūk chu marusa lūta maruk thei mak.
21 Asik chu na dōnglua ei omna taka,
na malung um ei om ani na.
22 Mit hi na taksa ranga lēm ani na.
Hasik han na mit āsa anten na taksa pumpui ha ei ēl ani na.
23 Tenchu na mit āsa nōk ten,
na taksa pumpui azīng ani na.
Hasik han na sūnga om lēm vāng azīng ten,
ituk antakna mo ei ni rang ani na.
Asik chu hava ei zīng rang zia chu ituk azīng mi ei ni rang ani na.
Pathian le sum rui
Lk.16:13
24 Tutēn puma anni dorbo adom thei ngāi mak.
Asik chu angkhat mumāk intia,
angkhat madit inti.
Hano ten angkhat khāi intia,
angkhat kop inti.
Nangnīn Pathian le sum anloprita adorbo adom thei u nō ta ni.
Lung anhāng nō ro
Lk.12:22 -31
25 Hasika han kei na ril u:
Nei dam u na ranga imo sā ning,
imo nē ning ati na lung anhāng u nō ro.
Hanūk chu na taksa ranga imo rasil ning ati na lung anpōng u nō ro.
Asik chu nēk le sāk nēka damna,
puan le pāi nēka taksa ni mak mo alu ual?
26 Chunga vā ngāi so en u ta,
amānīn itē ei tu om u mak.
Hanūk chu itē āt um mak,
sāsiar um dōn u mak.
Hanum nisela anvāna na Pa un ei nāng u ngāi chu ei zon ani na.
Nangni chu hava ngāi nēka alu sabak ni u mak che mo?
27 Nangni bila tu mo lung anhānga adung muk khat ngal asōn thei na ni u?
28 Hanūk chu puan le pāi sika ichang mo lung nei anpōng u?
Rama rāibisok pār ngāi ei ansōn zia rui ha mandon u ta.
Hava ngāi hān apōnga sin thō u mak,
puanpat um thō u mak.
29 Hanum nisela,
kei na ti u ani zei:
Solomon ama aloma ei anlianna lehan anliang ngalām rama rāibisok pār ngāi bila angkhat dakte dōr ngal asāna anliang thei mak.
30 Hasika han rama pār ngāi aviana om nangtūka anpeia moia anhāl rang ani na.
Hava ngāi lua mana amān hadōr pei amanliang theia.
O iamna tōm ngāi,
nangni vāng chu ituk ātam puan le pāi apēka na zon u nō ni mo?
31 Hasika han imo sā ning,
imo nē ning ati na lung anhāng u nō ro.
Hanūk chu imo rasil ning ati nām lung anhāng u nō ro.
32 Nam atei ngāi chu hava ngāi sika kēng tak asāta ei val u.
Tenchu hava ngāi ha na nāng u ti na Pa u anvāna mīn ei riat kēng.
Hasika han lung anhāng u nō ro.
33 Tenchu Pathian aram le ei dikna chu ravān mānsa u ro.
Amān hava ngāi dōra na hong sap inti.
34 Hasika han nangtūka rang lung anhāng u nō ro.
Asik chu nangtūk hān nangtūka rang lung anhāng bō ni.
Asik chu nikhat ranga antak chu nikhat ranga āhun ani na.