Pōngansa nikhuana Puma
12
1 Hatuka nikhat chu Jihudi ngāi pōngansa nikhuana Isua chu phāia būnthōna muna asēna.
Azolāi ngāi chu avon anchām sika bupār akhama akhēta ei sāk u ani na.
2 Hava ha Pharisi ngāiin amu u na akōma:
“Enta,
na zolāi ngāiin pōngansa nikhuana athō aser kēng ei thō u sole,”
ati u na.
3 Amān akōm u na:
“David le alōm ngāi avon anchām u lāi han hong zāt mo ei thō u ha,
hava rui ha dānbūna pore u mak che mo?
4 Ama chu Pathian biak ina avalūta ama le alōm ngāiin ruti ānthiang andar chu avasāk u na.
Hava ha ama le alōm ngāi ranga asāk aser ani na.
Tenchu chāizūng ngāi rongin asāk thei u na.
5 Hanūk chu pōngansa nikhuana chāizūng ngāiin Pathian biak ina dān amasiat u nām nisela āsia ei anlō u nōk rui ha dānbuna pore u mak che mo?
6 Tenchu kei na ril ani u zei,
hiva hin Pathian biak in nēka alian mi khat a om.
7 Hatuka:
‘Riangvāina kēng kei zōt,
anbōlna ni mak,’
(Hos.6:6 )
ti omzia hi na riat thei u ten,
masial abui ngāi āsia manlō u nō ta ni.
8 Asik chu koi Miring Nāi Pasal hi pōngansa nikhua ranga Puma ka ni ti hi re u ro,”
ati na.
Isuan akut annōk
khat amandam
9 Hatuka hava mun āta asēna Pharisi ngāi ankhōmna ina avalūta.
10 Hatuka enta,
hava han mi khat a om a,
akut khat annōk sabak ani na.
Hatuka ama chu āsia ei manlō thei u na ranga hiva chong hi arakel u na:
“Pōngansa nikhuana mi rikhua andam hi dānin aphal mo?”
ati u na.
11 Amān akōm u na:
“Nangni bila mi khatin bera khat dōn sela,
hatuka hava ha pōngansa nikhua khura chul ving sela,
hava ha varūta chunga vamakhal nō ni mo?
12 Bera khatdak nēk ten miring chu alu sabak ani na.
Hasik han pōngansa nikhuana
sin āsa thō chu ānthiang kēng,”
ati na.
13 Hatuka Isuan hava mi kōma:
“Na kut alāng ro,”
ati na.
Hatuka akut alānga adam pe vanga kiang khat tianga anga a om pe rēta.
14 Hava suale Pharisi ngāi chu asuak u na hontin mo Isua athatna ati na chong anrual ranga rui avānril
u na.
Pathianin ei thang suak khat
15 Tenchu Isuan hava ei anril u ha ariata havan āta asuaka asē vāta.
Hatuka anūka mipui ātampān avazīna.
Amān abil u na ana ngāi aloma alei mandam zita.
16 Hatuka amān tutē kōma ama arui aril nōkna ranga chong apēka.
17 Hiva hi deari Isaia chong ril ei kip theina ranga.
18 Isaian ati na:
“En ro,
ama hi ka suak,
koiin
kei thang ani na.
Ama hi kei madita mi chu ani,
Ama chunga hin ka rāisānna
khīt,
Ama chunga ka Ratha
manlēng ka ti,
Amān Jentail ngāi kōma
ruirilna dik rui chu tāng
ahāi inti.
19 Ama chu ansual nō ni,
Ankhēk um nō ni,
Tutēn lampui ngāia ahē ariat
om nō ni.
20 Amān ruirilna dik chu
amanrāt māseng chu,
Amān nōl kuangte ngal khiak
bang nō ni,
Lēmri chuanga moi ngal
asēma manthi bit nō ni.
21 Hatuka Jentail ngāiin
ama raminga iamna dōn
unti,”
(Isa.42:1 -4 )
ati na.
Isua le Beelzebul
22 Hatuka chu raluain ei sūr mi khat hi Isua kōma ahong ruai u na,
hava nāi ha amit achō le chong thei lui ani na.
Isuan hava mi ha amandama.
Hatuka hava nāi ha achong theia,
hanūk chu amu theia.
23 Hatuka mipui dōra chu atinachang re u mak:
“Ama hi David achina nāi pasal kukui mo?”
ati u na.
24 Hava ha Pharisi ngāiin ariat u na:
“Sova nāi so itē ni mak,
raluai ngāi rēngpa Beelzebul le rong kēng raluai ngāi ei razūl thei sole,”
ati u na.
25 Tenchu Isuan hava amandon u ngāi ariata:
“Aram sūng le aram sūng hi anduia anbāk anten ha ram ha ei chiama ei anpei ani na.
Hanūk chu akhua sūng le akhua sūng mo ole ainsūng le ainsūng anduia anbāk anten,
hava ngāi ha ngīr thei mak.
26 Soitān dēnin soitān arazūl ten,
ama le ama aninga anduia anbāk kēng ani zei hale,
hanle hontin mo aram ei la ngīr thei rang?
27 Hano ten koiin Beelzebul lehan raluai ngāi ka razūl anten,
hong zāt le mo nangni na chipui u ngāiin raluai ei razūl u chachak ha?
Hasika han amānīn na chung u na ruiril u bō ni.
28 Tenchu Pathian Ratha lehan raluai ngāi kei razūl aniten Pathian ram chu na kār u na atung kēng ani zei.
29 Hanūk chu mīn arātpa akhit mānsa nōk anten,
hontin mo arātpa ina ei valūta neinun sampār ngāi ei pot thei rang?
Akhit suale kēng ina neinun sampār ngāi ei pot thei rang.
30 Ka tianga akop nōk chu,
ka tianga anadui ani na.
Hanūk chu ka bila mankhōm lui tak chu achēn ani na.
31 Hasika han kei na ril u,
miring ngāi masial dōra le ēro tin andual inti,
tenchu Ratha Ānthiang ēro thō chu andualna om nō ni.
32 Hanūk chu tukareng Miring Nāi Pasal ka chunga siat aril tak chu andualna man inti.
Tenchu tukareng Ratha Ānthiang chunga siat aril chu andualna reng man nō ni,
atuna huna le nangkan hunām man nō ni.
Thingkung amara
lehan na riat thei
Lk.6:43 -45
33 Thingkung na mansa ten,
amarām hong sānti,
hatuka thingkung na mansa nōk ten,
amarām hong sa thei nō ni.
Asik chu thingkung hi amara lehan na riat theia.
34 Marūl tezia ngāi!
mi salui na ni ngal u nām hontin mo chong āsa nei la ril thei u?
Asik chu miring sūnga a om ha kēng ahong aliama mūra chongin ei hong ril ani na.
35 Mi sa chu amalung sūnga āsa nāta chong āsa arasuana.
Hatuka mi salui chu amalung sūnga āsa nōk āta chong āsa nōk arasuana.
36 Tenchu kei na ril ani u zei,
mīn chong porchonok ei ril ngāi dōra ruiril nikhua tika chu angkhat angkhata hisāp ei la pēk chip u rang ani na.
37 Asik chu na chong lehan āsa nei anlō rang,
hanūk chu na chong lehan āsiat nei anlō rang,”
ati na.
Jona kōma sinsiana
Lk.11:29 -32
38 Hatuka Dān mīnchū ngāi senkhat le Pharisi ngāiin amasanga:
“Mīnchūpu,
na kōm āta sinsiana angkhat pei amu rang na zōt,”
ati u na.
39 Tenchu Isuan amasanga:
“Hiva huna mi salui ngāi le uiare ngāiin sinsiana athūn u na,
tenchu deari Jona tak chunga sinsiana rong nōk chu atei itē sinsiana akōm u na anmu nō ni.
40 Asik chu Jona ngāpui vonsūnga sūn anthum zān anthum ei om anga koi Miring Nāi Pasal um phil sūnga sūn anthum zān anthum kei om rang ani na.
41 Ninevi khopuia mi ngāi chu ruiril nikhua tika anthui untia,
hiva huna mi ngāi hi āsia la manlō unti.
Asik chu Jona achong rila amalung ei ansīr u ani na.
Tenchu en ro,
hiva muna hin Jona nēka alian mi khat a om.
42 Sim rama rēngnu chu ruiril nikhua tika anthui intia,
hiva huna mi ngāi āsia la hong manlōnti.
Asik chu Solomon hianna rui ariat ranga ramual kōlkil ei hekna nāta ahong ani na.
En ro,
hiva muna hin Solomon nēka alian mi khat a om.
Raluai sari ngāi ei kīr rētna rui
Lk.11:24 -26
43 Hatuka raluai khat hi miring khat kōm āta asuak suale pōngansana rang mun aroka tibuina mun tina han ahong anlōi avānlōia,
tenchu hava han mun man mak.
44 Hasik han:
‘Kei hong suaka kei mākna in dēna kīr rēt ka ti,’
ati na.
Hatuka akīra asēna ārong le anthial vang le anzēk vang chu ahong muna.
45 Hatuka ama chu asuaka asēna ama nēka raluai atei sari pei ahong ruaia,
hava muna han alūta avaom u na.
Hatuka chu hava miring dingmun chu machīna dingmun nēka āsiat riama.
Havan tin anga han hiva huna mi salui ngāi dingmun chu ei la ni u rang,”
ati na.
Isua anu le aparual ngāi
46 Isuan mipui ngāi kōma chong aril lāi tak han enta,
anu le aparual ngāi chu ama achongpui rang avala apanga anding chiana om u na.
47 Hasika han mi khatin akōma:
“Enta,
na nu le na parual ngāi so apanga anding chiana a om u,
ana chongpui rang azōt u,”
ati na.
48 Tenchu amān hava achongpuipa kōma han amasanga:
“Tu mo ka nu,
hanūk chu tu mo ka parual ngāi?”
ati pena.