Sachi ātupu lehan ankhīna
13
1 Hava nikhua dēn han Isua chu in āta asuaka tipui kōla avānsuta.
2 Hatuka mipui ātampa akōma ahong anbūm raheia ama chu rakuang khata achuanga avānsuta.
Mipui chu tāng kōla anding u na.
3 Hatuka ankhīna khat le amāni kōma chong ātampa arila.
“En u ro,
phāi athōpu chu sachi anthek ranga asuaka.
4 Athek lāi han asen chu lampui panga achula,
hava ngāi chu chunga vā ngāiin ahong sāk hiama.
5 Hatuka asen chu philtak ei buina lung bila achula,
hava ngāi chu philtak ei tam nōk sika anrapa amōnga.
6 Tenchu ani asuaka ahong alum le akāng bianga,
hatuka razung ānthūk ei phun nōk sika achāra.
7 Hanūk asen chu raling bila achula,
hatuka raling kung chu ahong alian le hava bu ha adīp khapa.
8 Hanūk asen chu phil āsa bila achula hava ha ahong avuia,
asen chu mun razakhat,
asen mun sōm aruk,
asen mun sōm anthum sapār ahong masuaka.
9 Tukareng anngāina kuar adōnin rangāi rase,”
ati na.
10 Hatuka zolāi ngāi chu akōla ahong u na:
“Ichang mo amāni kōma chu ankhīna le chong nei ril?”
ati u na.
11 Isuan amasanga:
“Vānrama chong anthup dōra nangni ngāi riat ranga anpēk kēng ani zei,
amāni kōma chu anpēk ni mak.
12 Asik chu tukareng adōn kōma ei anpēk riam rang,
ātam ei dōn riam theina ranga.
Tenchu tukareng adōn nōk kōma chu ei dōnte ngal ha ei lānpot hiam rang ani na.
13 Hasik han amāni kōma chu ankhīna le chong kei ril.
Asik chu:
‘Aen nām mu thei lui,
Arangāi ām re thei lui,
Ariat ām re u lui ani,’
ati na.
14 Amāni ruia deari Isaian chong alei hong ril ha ahong akipa.
Asik chu amān ati na:
‘Nangnīn kuara rangāi
un na ti,
Tenchu re thei u nō ta ni.
Mita mu un na ti,
tenchu riat
thei u nō ta ni.
15 Asik chu hiva mi ngāi
malung a-īt pe kēng ani zei,
Anngāina akuar u asēt pe
kēng ani u zei,
Hanūk chu amu theina mit
azīng pe kēng ani u zei.
Nukhōna amitin lam amu
na,
Akuarin lam arangāia,
Amalungin lam ariat theia,
Malung hong ansīra lam ka lei
mandam u ngāi,’
16 Tenchu nei mu thei u sika na mit u ngāi ravān āsa kēng,
hanūk chu anngāi thei nei ni u sika,
na kuar u ngāi ravān āsa kēng.
17 Taktaka kei na ril ani u zei,
deari tampa le mi dik ngāiin nangni nei mu u ngāi amu ranga azōt u nām mu thei u mak,
hanūk chu nangni nei riat u ngāi ariat ranga azōt u nām riat thei u mak.
Sachi ātupu lehan
ankhīna a omzia
18 Atun chu sachi anthekpu ruia ankhīna a omzia rangāi u ro.
19 Tukareng sova ram rui arangāia tenchu a omzia riat thei lui chu hiva hi ani na,
āsia athōpu ahong le chu amalunga chong antu sachi ha ahong lāk pe viaka,
hava ha ani zei lampui panga sachi chul rui ei ti na.
20 Hatuka lung bila sachi chul rui chu hiva hi ani,
tukarengin chong arangāia rāisān taka apom len ha ani na.
21 Tenchu amānīn asūnga razung anthūk ei dōn nōk sika hun atōmte adorōia.
Nukhōna chu hava chong sika han antakna mo ole ansinsakna mo asuak le anūk ankei len u na.
22 Hanūk chu raling bila sachi anthek rui chu hiva hi ani,
tukarengin chong arangāia tenchu inlui andonna le neinung ningōlna sika han hava chong ha adīp khapa avui dōn thei mak.
23 Hatuka phil āsa bila sachi achul rui chu hiva hi ani,
tukarengin hava chong ha arangāia hatuka hava ha ariat thei mi ani na.
Ama chu asapār āsa sabaka,
asen chu mun razakhat,
asen mun sōm aruk,
asen mun sōmanthum sapār amasuaka,”
ati na.
Chiakrunei lehan ankhīna
24 Amāni kōma ankhīna khat rēt arila:
“Vānram chu hintin hin ankhi theia.
Mi khatin aphāia sachi sa avatuna.
25 Tenchu mi in chīt lāi tak han arālduiin bu bila han chiakrunei avatu pe zuta amāka.
26 Hatuka bu ahong mōnga avui le chu chiakrunei um ahong anlanga.
27 Hatuka inpuma asuak dōn ngāi chu akōma ahong u na:
‘Ka pu,
na phāia son sachi sa ni mak mo nei vathek?
Hanle hon tiang āta mo chiakrunei ngāi ei hong mōng?’
ati u na.
28 Amān akōm u na:
‘Hiva hi chu ka rāldui khatin ei na hong thō pe kēng ani zei,’
ati na.
Hatuka suak ngāiin akōma:
‘Hano ten koini asēna vaphōi rei ba,
na zōt mo?’
ati u na.
29 Tenchu amān:
‘Aphōi u nō di ro,
asik chu chiak nei phōi u bibila bu kung um nei phōi u rang kēng.
30 Bu āt hun ten
pei lei lian rase,
bu āt hun
ahong asuak tika a-āt ngāi kōma:
Mānsana chiakrunei ngāi rasuang u tānla anhāl ranga alona khita siak u ro.
Hatuka bu tak chu ka sasiara hong manlūt u ro,
ti bō ning,
ati,’ ”
ati na.
Hoiro ru lehan ankhīna
31 Hatuka hintin hin akōm u na ankhīna khat aril rēta:
“Vānram chu hoiro ru angkhat dak ang hi ani na.
Hava ha mi tu khatin mo hoiro ru achōia aphāia avatuna.
32 Hiva hi chimu ru dōra bila asīn khīt ani na.
Tenchu ahong alian suale chu sūlbua atei ngāi nēka alian khīta.
Thingkung alian ahong achanga,
chunga vā ngāi ahonga abāk anzāra rabu aphan u,”
ati na.
Chol lehan ankhīna
Lk.13:20 -21
33 Hanūk chu akōm u ankhīna khat dēn aril rēta:
“Vānram chu chol lehan na mankhi theia.
Nupang khatin hava ha alāka moida dibi anthum amāia aman pola āmeta hatuka apumpui
athui zuak māseng chu asūn rap,”
ati na.
34 Aloma hava ngāi rui ha Isuan ankhīna lehan mipui kōma chong ei ril ani na.
Ankhīna anchel luia akōm u na itē ei ril om mak.
35 Hasik han dearin ei ti hiva chong ei kipna rang
ani na:
“Ankhīna chong lehin ka mūr
malong ka ti,
Phil lung ansin len āta rui
ānthup dōra manlang ka ti,”
(Sām 78:2 )
ati na.
Chiakrunei lehan
ankhīna a omzia
36 Hatuka Isuan mipui ngāi chu aman sē suale ina avalūta.
Akōma zolāi ngāi ahong u na:
“Phāia chiakrunei ruia ankhīna a omzia ha na manthei ro ba,”
ati u na.
37 Hatuka amān amasanga:
“Sachi sa ātupu chu Miring Nāi Pasal ani na.
38 Hatuka hava phāi chu hi maniapūr ani na.
Sachi sa chu ama arama nāi ngāi ani na.
Hatuka chiakrunei ngāi ha āsia athōpu nāi ngāi ani u na.
39 Hatuka hava arāldui ahong anthekpu ha diabol ani na.
Bu āt hun chu maniapūr ei hekna rang hun ha ani na,
hatuka bu āt rang ngāi chu vānpalāi ngāi ani u na.
40 Hasik han mīn chiakrunei ei mankhōma moia anhāl rang anga maniapūr ahek tikām han tin han ei om rang.
41 Koi Miring Nāi Pasalin ka vānpalāi ngāi chu hong tīr ka ti,
amānīn ka ram sūnga anbāna tin rēng le dān anrakān ngāi dōra chu hong rasuang unti.
42 Hatuka hava ngāi ha moikunduna vapei unti.
Hava muna han achapa rakam arial unti.
43 Hava tika mi dik ngāi chu apa rama ani anga ēl chian ūnti.
Hiva hi anngāina kuar adōnin rangāi rase.
Rochon anthup le lunglu
ngāi lehan ankhīna
44 Hanūk rēt chu,
vānram chu phāi khata rochon anthup ang hi ani na.
Mi khatin hava ha avatoka athup rapa āsiaka.
Hatuka arāisān raheia asēna anei anung ngāi dōra avazuara hava phāi ha avarachōka.
45 Hanūk rēt chu,
vānram chu lunglu apūta sum anlō mi khat ang hi ani na.
46 Ama chu lunglu aman ātam zāt avatoka anei anung ngāi dōra avazuara hava lunglu ha avarachōka.
Lēn adēng lehan ankhīna
47 Hanūk rēt chu,
vānram chu mīn tipuia lēn adēnga ngatin ngarēng ei khum ang hi ani na.
48 Hava lēn abit le chu tānga ahong nuk u na,
hatuka ansuta nga āsa dōra azena koka āsiak u na,
hatuka nga siat dōra chu pei u na.
49 Maniapūr ahek rang tikām havan tin anga om inti.
Vānpalāi ngāi hong untia,
mi dik ngāi bil āta mi dik lui ngāi chu hong khāi unti.
50 Hatuka moikunduna pei unti,
hava muna han achap le rakam anrialna om inti,”
ati na.
51 Isuan akōm u na:
“Hiva rui ngāi hi imo a omzia na riat thei u mo?”
ati na.
Amānīn:
“Puma,
na riat thei zei,”
ati na amasang u.
52 Hatuka amāni kōma:
“Hasik han vānram ruia asa dima ariat sua dān mīnchū ngāi chu in puma khatin asumduk āta neinun athar le amarua ansuakpu ang hi ani,”
ati na.
Lalchi manlui deari
53 Hatuka Isuan hava ankhīna ngāi aril suale havan āta asuaka asēna.
54 Ama ei omna khua ngēta ahong asuaka,
ei ankhōm u na ina mi ngāi avamanchū le chu,
amānīn atinachang re u mak:
“Hiva mi hi hon tiang āta mo hidōr peia hianna le tichangabui sin thōtheina ei man?
55 Hiva mi hi thingthiampu nāi pasal ha ni mak mo?
Mīn anu Mari ei ti ha ni mak mo?
Aparual ngāi ha Jakob,
Jose,
Simon le Juda ngāi ni u mak mo?
56 Asarnu dōrām koini ngāi bila a om ni u mak mo?
Hanle hiva mi hin hon tiang āta mo hiva ngāi dōra ei man?”
ati u na.
57 Hava sika han ama tak chunga amalung akhel u na.
Tenchu Isuan amāni kōma:
“Deari ngāi chu akhua le ain rong nōk chu mun ateia lalchi manluia om ngāi mak,”
ati na.
58 Hatuka amānīn iamna ei dōn u nōk sika hava muna han tichang abui sin ātam thō lāi mak.