Baptispu Johan alu āntan rui
14
1 Hava hun lāi han ram
optu Herodān Isua arui alei riata.
2 Hasik han asuak ngāi kōma:
“Ama chu Baptispu Johan,
āthi ngāi bil āta anthuirēt ha kēng ani zei,
hasik han kēng hiva tichangabui sin ngāi amān ei thōthei,”
ati na.
3 Herodān anāipa Philip anungāk sika Johan chu ei mankhita ankhumna ina ei khum ani na.
4 Asik chu Johanin akōma:
“Herodi hi na nungāk ranga alāk hi dān anthiang ni mak,”
ati na.
5 Amān chu Johan athat rang azōtam nisela mipui āchīna,
asik chu mīn ama ha deari khat ati na ei tel u ani na.
6 Hava suale Herod ama ei anzirna nikhuana Herodi anāi nupangte chu amāni matona ahong alāma Herod chu arāi asān sabaka.
7 Hasik han amān ei zong tak apēk ngēt ranga khomāk ansama.
8 Hatuka anūn kurbut ei pēk anga avarila:
“Hiva khēnga hin Baptispu Johan alu na pe ro,”
ati na.
9 Tenchu hava sik tak han Herod amalung ana pe sabaka,
hanum nisela akhomāk ansam le bu ei nēkpui khual ngāi sika ei zong tak apēk ranga chongpēk aneia.
10 Hatuka Johan alu avāntan ranga mi atīra.
11 Hankēng alu chu khēnga ahong chōia nupangte kōma ahong pēka,
hatuka amān anu kōma achōia asēpui.
12 Hava suale Johan azolāi ngāi chu ahong u na aruak achōia avaphūm u.
Hatuka asē u na Isua kōma avaman thei len u na.
Isuan mi asāng rangā avāi
13 Isuan hava ha ariat le havan āta rakuanga avachuanga philchār rama athei daka asēna.
Tenchu mi ngāiin hava ha ariat u le kho tin āta kal achōia anūk avazī u na.
14 Hatuka Isua chu tāng kōl āta ahong akal suale mipui ātampa amuna amalung amanpōnga,
hasik han adam nōk ngāi aman dama.
15 Hatuka nikhua ahong abui le azolāi ngāi chu ama kōma asē u na:
“Hiva mun hi philchār ram ani na,
hanūk chu zān um ahong azīng rang ani zei,
hasik han khuana asāk rua anchōk ranga mipui mansē ta ro ba,”
ati u na.
16 Tenchu Isuan:
“Amāni ei sē rang nāng u mak,
nangnīn asāk rua hongte mo pe u ro,”
ati na.
17 Hankēng amānīn amasanga:
“Hiva hin ruti rangā le ngā anni bak rong nōk chu atei itē nei dōn om mak hile,”
ati u na.
18 Hatuka amān akōm u na:
“Hava ngāi ha ka kōma hong chōi u ro,”
ati na.
19 Hatuka amān mipui chu chiak aring bila ansut ranga chong apēka.
Hatuka amān ruti rangā le ngā anni ha alāka chung tiang atanga bōrsāng apēka.
Hatuka ruti chu akhiaka azolāi ngāi kuta apēka.
Hatuka hava ha azolāi ngāiin mipui ngāi kōma avapēk rēt u na.
20 Hatuka alom u na akhop tanga anēk asāk u na.
Hankēng zolāi ngāiin abong abūi aman khōm u na kok sōmleianni ala bita.
21 Hava anēk asāk ngāi bila nupang le nāipang tel luia pasal duai hi asāng rangā tāng ani u.
Isua tī chunga kal achōi
22 Hatuka Isuan azolāi ngāi rang rakuanga achuang lilīpa ama matona son tiang varāla alei vān kān ranga aman nota.
Hatuka hava bibila han amān mipui ngāi alei mathāna.
23 Mipui amathān suale athei daka bōr azong ranga muala avakala.
Hava han zān azīng tenpei athei daka avaom a.
24 Tenchu hava dōr huna han rakuang chu tāng āta timalāi tenpei alei vasuak zeia.
Hatuka tiduarin asuka,
asik chu thīnthi dui changa om ei ni u sika ani na.
25 Hatuka Isua chu khua ahong avār rang tiang vit tī chunga kal achōia akōm u na ahong pana.
26 Tī chunga kal ei hong chōi ha zolāi ngāiin alei mu u na aratha amanta u na:
“Ralīmpa so,”
ati na anchi tuara ankhēk u na.
27 Tenchu Isuan amāni kōma:
“Anngam u ro,
koi kēng ka ni,
āchi u nō ro,
ati lena.”
28 Peterin amasanga:
“Puma,
nang ngēt na ni ten,
tī chunga kal achōia na kōm na man hong ro ba,”
ati na.
29 Hatuka Isuan:
“Hong ta ro,”
ati na.
Hatuka Peter rakuang āta antōma tī chunga kal achōia Isua avapana.
30 Tenchu thīnthi amu na rathatāka tina anning rang athōle ankhēka:
“Puma,
na san ta ro ba!”
ati na.
31 Hatuka Isuan anrappa akut asōna avasūr lena:
“O iamna tōmte,
ichang mo nei iam thei nōk?”
ati na.
32 Hatuka rakuang chunga avakal sua u le chu thīnthi amonga.
33 Hankēng rakuang chunga a om ngāiin:
“Taktaka,
Pathian Nāi Pasal kēng na ni hile,”
ati na ama chu amōk u na.
34 Hatuka son tiang varāl avānkān sua u le Genesaret rama avatung u na.
35 Hava muna mi ngāiin Isua amēl alei riat thei u na.
Hasika han hava ravēla mun tina chong amathuan u na.
Hatuka mīn ama kōma ana ngāi dōra ahong ruai u na.
36 Hatuka ana ngāiin apuan mērte duai ngal tōn u rase,
ati na lokōn amathēm u na.
Hatuka ama atōn ngāi dōra pei chu adam u na.