Ānthiang le ānnim rui
Mk.7:1 -13
15
1 Hatuka Pharisi ngāi bila senkhat le dān mīnchū ngāi Jerusalem khopui āta Isua kōma ahong u na:
2 “Ichang mo na zolāi ngāiin tiana koini na chipui ngāi omdān ei zī u nōk?
Asik chu bu nēk māna akut rasūk u mak,”
ati na arakel u na.
3 Isuan akōm u na:
“Hanle,
ichang mo nangnīm tiana
na chipui ngāi omdān sika
Pathian chongpēk ngāi nei khēl u?
4 Asik chu Pathianin ei ti:
Na nu le na pa lalchi thō ro.
Hanūk chu,
‘Anu mo apa mo khomāk āsam tak chu thi ngēt rase,’
ati na.
5 Tenchu nangnīn nei manchū u chachak chu,
anu kōma mo ole apa kōma mo:
‘Ka kōm āta nangin sanna nei man rang bāt ha Pathian ranga anpēk sua kēng ani zei,’
ati na.
6 Havan tin han ti sela,
anu mo apa mo lalchi ei thō rang nāng lāi mak hale.
Havan tin han nangnīn tiana na chipui ngāi omdān sika Pathian chongpēk ngāi chu akorong nei manchang u chachak.
7 Nangni phuazekām ngāi,
deari Isaian na rui u tak alei ril hi adik kēng.
Asik chu:
8 ‘Hiva mi ngāiin amūr le ei
na dēp u,
aner le lalchi ei
na thō u.
Tenchu amalung u chu ka
kōm āta ankār kēng.
9 Amānīn akoronga ei na
biak u,
Ami manchū u na chu miring
āta asuak anchūna om
dāntete ngāi duai hi ani,’ ”
(Isa.29:13 )
ati na.
10 Hatuka Isuan mipui ngāi chu apāia:
“Ka chong hong rangāi u tānla riat thei u ro.
11 Asik chu miring bāia alūtin miring mannim mak tenchu amūr āta asuakin miring ei mannim ani,”
ati na.
12 Hatuka azolāi ngāi chu akōm ahong u na:
“Hava chong ha Pharisi ngāiin ariata amalung akhel u zei ti hi na riat mo?”
ati u na.
13 Tenchu Isuan amasanga:
“Anvāna ka Pa ei phun nōk dōra chu aloma ei phōi kiar rang kēng.
14 Hasik han amāni chong ngāi ha māk u ta ro,
asik chu hava ngāi ha achō ngāi ruaitu ani u na.
Asik chu achō dēnin achō amaruai ten,
khura vachul rit u nō ni mo?”
ati na.
15 Hatuka Peterin akōma:
“Hiva ankhīna chong nei ril ngai a omzia hi na manthiang ro ba,”
ati na.
16 Hasik han Isuan amāni kōma arakela:
“Nangnīm mo atun tena riat luia nei la om u?
17 Na bāia alūt dōra chu vonsūnga kēng ei lūta annim bila ei vachul rēt ti hi riat u mak che mo?
18 Tenchu mūra ahong asuak hi malung rīl āta ahong asuak ani na.
Miring annim thei hava ha kēng.
19 Asik chu malung rīl āta alom peia mandon salui,
mithat,
uiare,
hurna,
anruna,
milak om āthō,
siat anrilna ngāi dōra hi ahong asuak ani na.
20 Miring annim chachak chu hiva ngāi hi kēng,
kut rasūk luia bu nēk hi ni mak miring annim chachak,”
ati na.
Kanaan nupangnu khat iamna
Mk.7:24 -30
21 Hatuka Isuan hava mun ha amāka Tura le Sidon khua ravēla ram dāma asēna.
22 Hatuka enta,
hava ram āta Kanaan nupangnu khat akōma ahonga ahong ankhēka:
“O Puma,
David Nāi Pasal,
ka chung lungkham na mu ro!
Asik chu ka nāi nupangte raluain ana sūr petit zei,”
ati na.
23 Tenchu amān chong bāi khat ngal masang mak.
Hasik han azolāi ngāiin akōma ahonga ahong mathēm u na:
“Ama hi mathān tān mansē ta ro ba,
asik chu koini nunūka ahong ankhēk chian zei hile,”
ati u na.
24 Hatuka amān:
“Israel nam bila bera ānpei ngāi rang rong nōk chu tutē kōma asē ranga hong antīr ni makung,”
ati na amasanga.
25 Hanum nisela hava nupang chu akōma ahong anbok laka:
“Puma,
nei na san ngēt rang kēng,”
ati na.
26 Hatuka amān amasanga:
“Nāipang ngāi kōma bulom alāka ui ngāi kōma apēk chu āsa ni mak,”
ati na.
27 Hankēng amān:
“Puma ani,
tenchu ui ngāi um apuma khēnga bu ramal achul ngāi chu asāk u dō,”
ati na.
28 Hasika han Isuan akōma amasanga:
“Nupang,
nei iamna hi alian sabak,
nei zōt ang taka na chunga om rase,”
ati na.
Hatuka anāi nupangte chu hava ahun tak lena han adam pena.
Isuan mi asāng manli avāi
Mk.8:1 -10
29 Hatuka Isua hava mun āta asēna Galili tipui ravēla avatunga,
muala avakala hava han avānsuta.
30 Hatuka mipui tāng raza akōma ahong u na.
Amānīn abil u na kekhor,
mit achō,
chong thei lui,
piangsual le atei ātampa ahong ruai u na ake bula ahong siak u na.
Hava dōra ha amān alei mandam kiara.
31 Havan tin han chong thei lui ngāi achong theia,
piangsual ngāi adama abalam anga a om u na,
ake khor ngāi kal achōi theia mit achō ngāi amu thei u na hasika han mi ngāi chu tichang abuia ariat u na.
Hatuka Israela Pathian chu amanpāk u na.
32 Hatuka Isuan azolāi ngāi akōm apāia:
“Mipui ngāi rang hi ka malung apōng u na,
asik chu aviana lehin nīnthum ani zei ka bila ei om u,
hatuka chu akōm u na itē sāk rang dōn u mak.
Hasik han nēksāk luia kei mansē u rang hi zōt makunga,
asik chu lampuia anvuaia a om u thei,”
ati na amasanga.
33 Hankēng zolāi ngāiin amasanga:
“Hi dōr peia mipui khopna rang zotor ruti hon tiang āta mo koinīn hiva mi buina rama nei man rang ?”
ati u na.
34 Isuan amāni kōma:
“Hanle ruti ituk mo nei dōn u?”
ati na.
Amānīn:
“Ruti pēk sari le ngāsīnte ngāi alakte na dōn,”
ati u na.
35 Hatuka amān mipui chu phila ansut ranga chong apēka.
36 Hatuka hava ruti pēk sari le ngāsīnte ngāi alāka rāisān chong amantunga asema zolāi ngāi kuta apēka.
37 Anēk asāk u na alom u na akhop u.
Hatuka amaniang abong abūi arūt u na kok sari ala manbit u.
38 Anēk le asāk ngāi bila nupang le nāipang tel luia pasal rong asāng manli ani u na.
39 Hatuka mipui ngāi amansē suale Isua chu rakuanga avachuanga Magdala rama avatunga.