Gerep rahuana anlō
ngāi lehan ankhīna
20
1 Hatuka Isuan:
“Vānram chu in puma khat ang le hin na mankhi theia.
Ama chu zīng khuavāra asuaka agerep rahuana sin athō mi ankhop ranga asēna.
2 Ama chu sin athō ngāi le ni khata denarī khat lō apēk ranga aman nuama agerep rahuana atīra.
3 Hava suale ama chu zīng vāitāk dāma asuaka mi tei ngāi,
bazār mun tānga itē thō lui ngāi chu avamūna.
4 Amān akōm u na:
‘Nangnīm ka gerep rahuana sin vathō u ro ba,
nei lō u ei huntuk na pe u bo ning,’
ati na.
Hatuka amāni chu asē u na.
5 Hanūk chu sūn chimrip le khului sasuktur huna asuak rēta,
havan tin ang dēn han avati na.
6 Hanūk chu ani bui rang tiang asuak rēta,
atei itē thō luia anding chian ngāi chu avamu rēta.
Hatuka amāni kōma:
‘Ichang mo hiva hin sūn asōtpa itē thō luia nei anding papei u?’
ati na.
7 Amānīn amasanga:
‘Asik chu tutēn sin athō ranga ana ruai om u mak,’
ati u na.
Hatuka amān akōm u na:
‘Nangnīm ka gerep rahuana sē u ro,
nei lō u rang tuk na pe u bo ning,’
ati na.
8 Hatuka nikhua ahong abui le hava gerep rahuan pumapa hān lōm aruaipa kōma:
‘Na lōm ruai ngāi dōra pāi tānla alō u ngāi chu pe chip ro.
Nūk antapu len āta phut tānla mān antapu ten pei pe ro,’
ati na.
9 Hatuka ani bui rang tianga sin anding ngāi chu ahong u na denarī khakhat seng aman chip u na.
10 Hatuka mān khīta sin anding ngāi ahong u na,
ātam beta aman ranga ei an-iam u ani na.
Tenchu amānīm denarī khakhat seng aman chip u na.
11 Hava ha aman sua u le chu in pumapa chunga asang u na.
12 Amānīn:
‘Nūk khīta nei ruai ngāi chu dār khat bak kēng sin ei anding u,
koini sūn asōt pei nei tēnga,
ani lum nei andēng ani na.
Hava ha amāni ngāi le nei na man rual chiang hi,’
ati u na.
13 Tenchu amān abil u na angkhat kōma han:
‘O ka mal,
na chunga adik nōk na thō makung hile,
asik chu denarī khata sin athō ranga anuam ni mak che mo?
14 Nei man rang tuk la tānla sē ta ro.
Nang kei na pēk tuk dēn,
nūk khīta anding kōmam kei pēk rang ani na,
kei zōt tak kēng dō.
15 Ka ta kei dōn ngāi hi kei zozōta amang ranga ningneina dōn ni makung mo?
Ole,
lungkham adōn kei ni sika hin mo nei na mumāk?’
ati na.
16 Havan tin anga han nūk anta ngāi chu mān ei lān ta u rang,
mān anta ngāi chu nūk ei lān ta u rang,”
ati na.
Isuan ama ei thi rang
rui aphmān alei ril zēt
17 Hatuka Isua chu Jerusalem khopuia asē ranga ansin lāi han zolāi Sōmleianni ngāi chu mi buina uala aruaia lampuia arila:
18 “En u ro,
Jerusalem khopuia asē rang na ni zei.
Koi Miring Nāi Pasal hi chāizūng alian ngāi le dān mīnchū ngāi kuta anbetōk ka ti,
hatuka ana thatna ranga āsia na mantung unti.
19 Hatuka mani tāngzār ei na thō na nganu ramoi le ei na zēma,
krosa ana tār ranga Jentail ngāi kuta na betōk unti.
Hatuka nīn thum changna nikhuana hong anthui rēt ka ti,”
ati na.
Nu angkhatin ei mathēm chong
Mk.10:35 -45
20 Hava suale Zabedai nāi pasal ngāi anu un anāi pasal anni ngāi Isua kōma aruaia avamōka,
hong khat mo avazong ranga avamathēma.
21 Hatuka amān akōma:
“Hong mo nei zong?”
ati na.
Amān:
“Hiva ka nāi pasal anni ngāi hi nang na rama na chang tiang khat le na voi tiang khat ei ansut thei u na ranga chong na pēk pe ro,”
ati na.
22 Isuan amasanga:
“Nangnīn nei zong u hi re u lāi mak che.
Koiin kei buangna rang khurina hin nangnīn le buang thei un mo?”
ati na.
Amānīn akōma:
“Na buang thei,”
ati u na.
23 Hatuka amān akōm u na:
“Ani,
na buang thei lele u.
Tenchu ka chang tiang le ka voi tianga ansut theina ranga ningneina chu koiin dōn makung.
Tenchu ka Pān amāni rang ronga mun ei sin ngāi rong kēng achang thei u rang,”
ati na.
24 Hava chong ha atei sōm ngāiin ariat u na,
hava parual anni ngāi chunga amalung asiat u na.
25 Tenchu Isuan amāni ngāi ha apāia:
“Nam atei ruirilpu ngāi chu ami ngāi chunga achālaka anlal u na,
hanūk chu hava bila ulian ngāiin amāni chunga rui ei ril u chachak ti ha,
na riat u na.
26 Tenchu nangni bila chu hantin han om u nō ta ni.
Tukareng nangni bila alian rang anuam chu,
nangni ngāi dorbōndoma om rase.
27 Tukareng nangni bila ulian achang anuam chu,
nangni ngāi suaka om rase.
28 Asik chu koi Miring Nāi Pasal hi dorbōndom aman rang ni mak,
tenchu mi dorbōndom sin athō ranga ahong ka ni na.
Hanūk chu mi tampa anratan ranga kei damna apēka hong ka ni,”
ati na.
Mit achō anni
ngāiin mit vārna aman
29 Hatuka Jeriko khua nāta asuaka asē u lāi han mipui ātampān anūk azī u na.
30 Hava han mit achō anni hi lampui sīra alei ansut u na.
Amānīn Isua chu havan tiang han ei rakān ti ariat u na:
“Puma,
David Nāi Pasal,
koini chunga lungkham na mu ro ba,”
ati na ankhēk u na.
31 Hava sika han mipui ngāiin:
“Dāi rek u ro,”
ati na angō u na.
Tenchu amānīn:
“Puma,
David Nāi Pasal,
koini chunga lungkham na mu ro,”
ati na ankhēk riam u na.
32 Hatuka Isua chu andinga,
hava ngāi ha apāia:
“Hong mo nei zong u?
Na chung u na hong mo kei na thō pe ranga nei zōt u?”
ati na.
33 Amānīn akōma:
“Puma,
koini na mit ngāi nei na manvār pe ranga nei zōt,”
ati u na.
34 Hatuka Isuan achung u na lungkham amu na amit u ngāi atōn pe le chu avār pe len u na.
Hatuka ama anūk avazī u na.