Zuina lehan Isua
Jerusalema alūt
21
1 Hava suale amāni ha Jerusalem kōla Maruan muala,
Betphage khuana ahong asuak u le chu Isuan azolāi ngāi anni atīra.
2 Amāni kōma:
“Na maton u na sova khuana sē u ro.
Sakuarpar khat ankhit vamu u na ti,
hatuka abila ate khat a om ha malōp u tān ka kōma hong chōi u ro.
3 Hanūk chu tukareng anānkel a om u ten,
hiva hi Pumān ei nāng kēng ti u ro.
Hankēng amānīn man hong len unti,”
ati na.
4 Hivan tin hin ei ni na asik chu dearin hiva chong ei ril ei kipna ranga ani:
5 “Zion sānu ha ril u ro,
Enta,
nang na Rēng chu na
kōma ahong zei.
Ama chu annuaia,
sakuarpar
chunga achuanga.
Sakuarpar ate chunga
achuanga ahong zei,”
(Zak.9:9 )
ati na.
6 Hava suale zolāi ngāi chu asē u na amān ei ti anga avathō u na.
7 Hatuka sakuarpar apui le ate chu ahong chōi u na,
hanūk chu hava chunga han apuan u aphā pe u na,
ama chu ei mansut u ani na.
8 Hanūk chu mipui rualin apuan u ngāi lampuia alei phā u na hanūk chu atei ngāiin thingbua atuk u na lampuia alei dāp u na.
9 Hatuka chu mān ansa ngāi dōrān ankhēk u na:
“Hosanna,
David Nāi Pasal.
Puma raminga ahong chu
anpāka om rase.
Chungannung khīt kōma
Hosanna,”
(Sām 118:26 )
ati u na.
10 Hatuka ama chu Jerusalema ahong alūt le chu khopui pumpuia mi ngāi dōrān:
“Hiva mi hi tu ngal mo tāk?”
ati na ankel susūp u na.
11 Hankēng mi tinin:
“Hiva mi hi hava deari ha,
Galili rama Nazaret Isua ei ti u ha ani zei,”
ati u na.
Pathian biak ina Isua
12 Hatuka Isua Pathian biak ina avalūta biak ina neinun azuar le anchōk ngāi dōra arazūla,
sumru thūl ngāi siakna tebul le pharvali zuarna sutmun ngāi chu amalet pe zita.
13 Amān akōm u na:
“Ka in hi bōrzongna in kēng ei anti rang,”
(Isa.56:7 )
ati na kēng ei anziak.
Tenchu nangnīn hiva hi ‘Misuam ngāi khura nei sin u,’ ”
(Jer.7:11 )
ati na.
14 Hatuka Pathian biak ina mit achō le kekhor ngāi chu ama kōma ahong u na,
amān hava ngāi ha alei mandama.
15 Tenchu chāizūng alian le dān mīnchū ngāiin amān tichangabui sin ei thō ngāi le Pathian biak ina nāipang ngāiin:
“Hosanna,
David Nāi Pasal!”
ati na ei ankhēk u amu u na achālaka amalung asiat pe u.
16 Hatuka akōma:
“Sova ngāiin hong mo ei ti u so,
na riat mo?”
ati u na.
Isuan amāni kōma:
“Riat chak ning ro.
‘Nāipang le nāitesen ngāi mūr
āta Pathian anpākna chu
nei hong makhip kēng
ani zei,’
(Sām 8:2 )
ti hi la pore u ngāi mak che mo?”
ati na.
17 Hatuka amāni amāka khopui panga Bethani khuana asēna,
hava han zān avariaka.
Theichang kung athēm rui
Mk.11:12 -14, 20 -24
18 Hatuka zīng khuavāra khopui tianga akīr rēt lāi han avon anchāma.
19 Hava han lampui sīra theichang kung khat amu le chu akōla avapana,
abua rong nōk chu atei itē vamu mak.
Hasik han thingkung rang ati na:
“Na kōma mara ngal om lāi nō rase,”
ati na.
Hatuka hava theichang kung chu athēm bub lena.
20 Zolāi ngāiin hava amu na:
“Ichanga mo theichang kung hi ei chār bub len ani zei?”
ati na achālaka aboi adong u na.
21 Isuan amasanga:
“Kei na ril tatak ani u zei,
nangnīn iamna na dōn u na,
hanūk chu malung songankharna abui ten,
hivan tin anga theichang kung ronga ni mak nei thōthei u rang tenchu hiva mualpa ngal hi andom tānla tīpuiliana vachul ro na ti u ten,
havan tin anga anthōnti.
22 Nangnīn bōr azonga iamna dōn chunga nei zong u tak chu man un na ti,”
ati na.
Isua aningneina ruia ankelna
23 Hatuka Pathian biak ina avalūta avamanchū lāi han,
chāizūng alian le Jihudi pātar ngāi chu akōma ahong u na:
“Hon tiang āta ningneina le mo hiva ngāi hi nei thō?
Tu ngal mo hiva ningneina ana pēk?”
ati u na.
24 Isuan amasanga:
“Koi um chong khat na rakel u ka ti,
hava ha nana masang thei u ten,
koi um hon tianga ningneina le mo hiva ngāi kei thō,
na man thei u ka ti.
25 Johan baptisma ha hon tiang āta ahong mo?
Chungvān āta mo ole miring āta mo?”
ati na.
Hatuka hintin hin amāni le amānīn aman don u na:
“Chungvān āta na ti ten,
hanle ichanga mo ama nei iam u nōk ei na ti rang kēng?
26 Hanūk rēt chu,
koinīn miring āta na ti ten,
mipui anchi om a.
Asik chu mipui dōrān Johan chu deari ti
na ei pom u ani,”
ati u na.
27 Hatuka amānīn Isua amasang u na:
“Riat lāi mak me,”
ati u na.
Hasika han amām akōm u na:
“Hano ten,
koi um hon tianga ningneina le mo hiva ngāi kei
thō,
na ril u lāi nō ning,”
ati na.
Nāi pasal anni lehan ankhīna
28 Nangnīn hontin mo na mandon u?
Mi khatin nāi pasal anni aneia,
mān ansapu kōma asēna:
“Ka long,
gerep rahuana sē tānla sin vathō ro,”
ati na.
29 Amān:
“ ‘Sē nō ning,’
ati na amasanga,
tenchu nūka amalung ansīra asē rēta.
30 Hava suale nūk antapu kōma asēna han tin dēn han avarila.
Amān alei masanga:
‘Ka pa,
sē bo ning,’
ati na,
tenchu sē mak.
31 Hava anni ngāi bila tu mo apa ei zōt athō u?”
ati na.
Hatuka amānīn amasanga:
“Mān ansapu,”
ati u na.
Isuan amāni kōma:
“Kei na ril tatak ani u zei,
siachōi ansuang ngāi le nōtizuar ngāi na mān u na Pathian rama alūt u rang ani zei.
32 Asik chu Johan ha nangni ngāi dikna lampui anān mu u ranga ahong ani na,
tenchu nangnīn ama ha lei iam u mak che na,
tenchu siachōi ansuang ngāi le nōtizuar ngāiin alei iam u na.
Hanūk chu nangnīn hiva hi na mu sua u nām na malung makhīr u mak che.
Gerep rahuan anrāk
ngāi lehan ankhīna
33 Hanūk chu ankhīna khat rēt rangāi u ro.
Ram adōnpu khat a om a.
Ama hān gerep rahuan athōna,
amān hava ha anhīl vinga rakul amanphana.
Hanūk chu hava han gerep anchīlna khur khat amankhuara.
Hanūk in ansāngpa khat amansina.
Hatuka hava ha gerep rahuan anrāk ngāi kuta abetōka ama chu khua alapa khata asēna.
34 Hatuka amara kham hun ahong asuak le gerep rahuan anrāk ngāi kōma asuak ngāi chu amara kham ranga atīra.
35 Hankēng rahuan anrāk ngāiin asuak ngāi ha alei sūr u na,
senkhat azēm u na,
hanūk senkhat athat u na,
hanūk senkhat rēt chu lung adēng u na.
36 Hatuka athara māna nēka ātam uala asuak ngāi atīr rēta.
Hava ngāi um han tin dēn han alei thō u na.
37 Nukhōn khīta chu:
‘Ka Nāi Pasal lua chu lalchi lei thō u bo ni,’
ati na amāni kōma atīra.
38 Tenchu Nāi Pasal alei mu u na gerep rahuan anrāk ngāi ha amāni le amāni anril u na:
‘Ama tak so dōngaluapu rang ani zei,
hong u ro that u rei.
Hanūk chu adōnglua rang um apot u rei,’
ati u na.
39 Hankēng ama chu gerep rahuana rakul panga aruaia avathat u na.
40 Hasika han in pumapa chu ahong le gerep rahuan anrāk ngāi chunga imo ei hong thō rang ani zei?”
ati na.
41 Hatuka amānīn akōma:
“Hava mi salui ngāi chu amān lungkham abui thaka pei inti.
Hatuka hava gerep rahuan chu atei anrāk ngāi kuta,
ahun taka amara akhama apēk thei rang ngāi kuta betōk inti,”
ati na amasang u na.
42 Isuan amāni kōma:
“ ‘Lung in asin ngāiin lung ei
khāi u ngēt ha,
In kila lungpui anāng khīt
ahong changa.
Hava ha Puma asin thō ani na,
Koini ngāi mitmuna tichang
abui ani zei,’
(Sām 118:22,23 )
ati na anziak ha pore u mak
che mo?
43 Hasik han kei na ti ni u zei,
Pathian ram chu na kōm u nāta anpot intia,
amara ansuak thei nam ngāi kōma anpēk inti.
44 Hatuka hiva lunga anba tak chu kiak inti,
hanūk hiva lungin ei del tak chu kui inti,”
ati na.