Inneina panta lehan ankhīna
Lk.14:15 -24
22
1 Isuan akōm u na ankhīna dēn le chong aril rēta.
Vānram chu hintin hin na mankhi theia.
2 Hatuka amān:
“Rēng khatin anāi pasal inaneia bu nēkna khat aman sūka.
3 Inneina bu nēk ranga ei mathēm ngāi avakui ranga asuak ngāi atīra.
Tenchu ahong nuam om u mak.
4 Hatuka suak atei ngāi kōma hintin hin anthēmna arila athara atīr rēta:
‘En u ta,
bu nēkna ka mansūk chīt zei,
ka serāt le sake manli aloma kei dōn ngāi dōra ka man that sua zei,
aloma ansūk zit zei,
inneina bu nēk ranga hong u ta ro,’
ati na.
5 Tenchu atel om u mak,
senkhat aphāia asēna,
senkhat anlō ranga asēna.
6 Hatuka atei anniang ngāi dōra alom u na asuak ngāi chu asūr u na mualphui asak u na hanūk chu athat u na.
7 Hava rui ha rēngin ariata achālaka atak asina.
Hatuka asipai rual chu atīra ha mi that ngāi dōra chu avaman that zita,
akhua u ngāi dōra chu avaman hāl zita.
8 Hatuka asuak ngāi kōma:
‘Inneina bu nēkna chu ansūk chu ka mansūk chīt zeia,
tenchu hava kei vamanthēm ngāi chu arua ni u mak.
9 Hasika han lampui asua tina sē u tānla,
mi nei vamu u dōra chu inneina bu nēk ranga hong kui u ro,’
ati na.
10 Hatuka hava suak ngāi chu lampuia asē u na mi siat le mi sa aloma ei mu u dōra chu aman khōma ahong ruai zit u.
Hatuka inanneina in chu khual abit mata.
11 Hankēng rēng chu khual ngāi a en ranga ahong alūta,
hava han inneina puan ātiang lui mi khat ahong mu na.
12 Akōma han:
‘Ka mal,
inneina puan ātiang luia hontin mo hiva hin nei hong lūt?’
ati na.
Ama chu masang thei lāi mak.
13 Hatuka rēngin asuak ngāi kōma:
‘Hava nāi ha akut le ake khittit u tānla,
apanga azīng kāra vapei u ro,
hava muna han chapna le rakam anrialna om inti,’
ati na.
14 Taktaka chu ātampa kēng ānkui tenchu alakte kēng ānthang,”
ati na.
Kaisar akōma siachōi apēk rui
15 Hankēng Pharisi ngāi chu asē u na,
hontin mo ama chu achong lehan nei khit thei rang ati na chong aman sūk u na.
16 Amānīn Herodia ngāi bila han azolāi u ngāi ama kōma:
“Anānchupu,
nang chu taktaka,
adik taka Pathian lam tianga mi nei manchū chachak ti hi koinīn na riata,
hanūk chu nangin tutē nei chi om mak asik chu na mi mandang om mak.
17 Āsa sabak,
hanle,
Kaisar akōma siachōi pēk hi āsa mo ole sa mak mo,
imo na ti?
Na man thei ta,”
ati u na.
18 Tenchu Isuan amandon āsa u nōk ariata:
“Nangni phuazekām ngāi,
ichanga mo nei na mansin u?
19 Hava siachōi pēkna ranga sumru ha na man mu u ta,”
ati na.
Hankēng amānīn hava ha sumru ha akōma ahong chōi u na.
20 Hatuka amān akōm u na:
“Hiva hi tu ramīl mo,
hanūk chu tu raming mo anziak?”
ati na.
21 Amānīn:
“Kaisar,”
ati na amasang u.
Hankēng amān akōm u na:
“Kaisar ta chu Kaisar,
hatuka Pathian ta chu Pathian pe u ro,”
ati na.
22 Hiva chong hi ariata aboi adong u na,
hasik han ama chu amāka ei sē u.
Thi nāta anthui rētna
hun tika innei rui
23 Hava nikhua dēn han āthi anthui rētna om mak ati Pharisi ngāi chu ama kōma chong
khat ankel ranga ahong u na.
24 Hatuka amānīn:
“Mīnchūpu,
Mosīn chu ei ti:
‘Tukareng nāi nei luia athi ten,
aparual nungāk ha lāk rēta aparual ranga chi neipui rase,’
ati na.
25 Āsa sabak ani,
atun hin koini bila parual sari na om a.
Ulian khīt hān nāi nei luia ei thi sika han aparual ranga anungāk amāk pena.
26 Aparual ngāi annina anthumna han tin han aloma sari ten peiin alāk u na.
27 Ahek khīta hava nupang hām athīna.
28 Hasika han āthi anthui rētna tika hava nupang ha sari ngāi bila tu nungāk mo ei chang rang ani zei?
Asik chu alom u na ei lāk kiar u kēng hale,”
ati na ei rakel u.
29 Isuan amāni kōma amasanga:
“Nangni hi adik nōk kēng na ni u zei,
asik chu Pathian lekhabu riat u mak che,
Pathian thōtheinām riat u mak chena.
30 Asik chu anthui rētna tika chu mīn inannei lāi nō ni,
hanūk chu ruathar um anlāk lāi nō ni,
tenchu anvāna amāni chu Pathian vānpalāi ngāi anga om unti.
31 Tenchu āthi ngāi anthui rētna ruia Pathianin imo ei na ril u ha,
pore u mak che mo?
32 Amān ei ti:
‘Koi hi Abraham Pathian,
Isaak Pathian le Jakob
Pathian ka ni,’
(Ant.3:6 )
ati na.
Hanūk chu Pathian hi āthi ngāi Pathian ni mak tenchu adam ngāi rang kēng.”
33 Hiva ei manchūna chong ariat u na mipui aboi adonga.
Chongpēk alian khīt
34 Hatuka Sadduki ngāiin ama chu makhal thei u lāi mak ati na ariat u le Pharisi ngāi anchun u na chong mun khata ei chang u.
35 Amāni bila angkhat,
dān ariat tak khatin ei mansinna ranga hintin hin arakela.
36 “Mīnchūpu,
dān ngāi lim bila hova mo chongpēk alian khīt?”
ati na.
37 Amān akōma:
“ ‘Puma na Pathian chu aloma
na malung dōra le,
na rīlru
dōra le,
na sūngrīl dōra le
adit ro,’
(Dān. 6:5 )
ati na.
38 Hiva hi angkhatna le alian khīt chongpēk chu ani zei.
39 Hatuka annina chu hava ang dēna:
‘Nang na ninga nei andit
anga na inkōl mīm ni rase
madit ro,’
(Lev.19:18 )
ti ngāi ha ani na.
40 Aloma Dānbu ngāi le deari ngāi lekhabu dōra chu hiva chongpēk anni ngāia hin ei kāina ani na,”
ati na.
Krista hi tu Nāi Pasal mo?
41 Hatuka Pharisi ngāi anbūm u lāi han Isuan arakela:
42 “Krista ruia hontin mo nei mandon u?
Ama ha tu nāi pasal mo?”
ati na.
Hatuka amānīn:
“David Nāi Pasal,”
ati na amasang u.
43 Isuan:
“Hanle Davidān hontin mo Rathān aruaia a om lāi han ama rang ‘Puma’ ei ti thei?
44 Asik chu David hān:
‘Tāituan Pumān,
ka Puma
kōma,
Na rāldui ngāi na kephā
siakna thuaia ka siak
māseng,
Ka chang tianga ansut na ti,’
(Sām 110:1 )