Vān aduai sari rui
23
1 Hankēng Isuan mipui le azolāi ngāi kōma arila:
2 “Dān mīnchū ngāi le Pharisi ngāi chu Mosi sutmuna ansut u kēng.
3 Hasika han amānīn ei ti u ngāi dōra tel u tānla thō u ro.
Tenchu asin thō u ngāi chu thō u nō ro,
asik chu achong ril u anga thō u mak.
4 Amānīn puak arikpa ngāi athāla mi lu na ei manpēl u,
tenchu akut mēr le ngal amāni chu akhāi tor rang zōt u mak.
5 Asinthō u ngāi dōra chu mīn muna rang duai kēng ei thō u.
Asik chu akuta tabit ei bun u ngāi ha ei manlian u na,
akultāi anchual u ngāi apēk ei manlian u ani na.
6 Nēksāk thōna muna sutmun ansāng le anchunna ina sutmun ansāng athang u na.
7 Hanūk chu bazār lāia anmōk le mīn ‘Rabbi,’
‘Rabbi,’
ei ti rang hi ei phām u.
8 Tenchu nangnīn ‘Rabbi,’
ati na anpāi u nō ro.
Asik chu Mīnchūpu chu angkhat dak kēng nei dōn u ama chu Krista ani na.
Hanūk chu nangni ngāi hi na lom u na parual na ni u.
9 Hanūk chu maniapūra tutē ‘Pa,’
ati na pāi u nō ro.
Asik chu Pa angkhat dak kēng nei dōn u,
ama chu anvāna om ani na.
10 Hanūk chu mīnchūpu ati nām anpāi u nō ro.
Asik chu Mīnchūpu chu angkhat dak kēng ama ha Krista ani na.
11 Tenchu nangni bila alian khīt ha nangni na suak ei chang rang.
12 Ama aninga anlian ngāi chu annuaia ei la om u rang.
Hanūk chu aninga annuai ngāi chu ansānga ei la om u rang,
ati na.
13 Dān mīnchūpu le Pharisi ngāi,
na vān aduai u.
Nangni phuazekām ngāi,
mi matona vānram nei khār u.
Hava han nangni ngāi um lūt luia hanūk chu hava na alūt ranga hong ngāi um na lei khār u ani na.
14 Dān minchu le Pharisi ngāi na vān aduai u.
Nangnīn arōng ngāi dōnglua nei sāk u,
mipui mu ranga bōr nei zong u chachak.
Hasik han nei tiar u rang chu alian sabak kēng.
15 Dān mīnchūpu le Pharisi ngāi,
na vān aduai u.
Asik chu nangni phuazekām ngāi mi khat dak Jihudi nam anchang ranga tānga le tipuia nei vachei u.
Hatuka angkhat pei na manchang u le ama ha nangni ngāi nēka mun anni āsiat ranga Gehenna nāi achang ranga nei sin u.
16 Mit achō ruaitu ngāi,
na vān aduai u.
Asik chu nangnīn nei ti u:
‘Tukareng Pathian biak in raminga khomāk ansam chu itē ni mak,
tenchu tukareng Pathian biak ina rāngkachak raminga khomāk ansam chu ei len rang,’
nei ti u.
17 Mit achō le āmo ngāi,
hova mo alian ual,
ti u ta?
Rāngkachak mo ole rāngkachak anthiangpu Pathian biak in mo?
18 Hanūk rēt:
‘Tukareng māichām raminga khomāk ansam chu itē ni mak,
tenchu tukareng achunga andar dāli raminga khomāk ansam chu ei len rang,’
nei ti u.
19 Mit achō ngāi,
hova mo alian ual,
ti u ta?
Dāli andar mo ole dāli ānthiangpu māichām mo?
20 Hasik han tukareng māichām raminga khomāk ansam chu māichām raming duaia ni mak tenchu achunga andar dāli dōra le khomāk ansam kēng.
21 Tukareng Pathian biak in raminga khomāk ansam chu asūnga a ompu raminga khomāk ansam kēng.
22 Tukareng anvān raminga khomāk ansam chu Pathian chōmphang le achunga ansutpu raminga khomāk ansam kēng.
23 Dān mīnchūpu ngāi le Pharisi ngāi,
na vān aduai u.
Asik chu nangni phuazekām ngāiin anmarim pudina,
muri,
zira ngāi sōma angkhat nei pēk u.
Tenchu dān lampanga anāng khīt dikna,
lungkham dōnna le iamna ngāi ha nei māk u.
Tenchu hava ngāi dōra nei zī u na hiva ngāi dōrām nei māk u nōk ranga chong ani na.
24 Mit achō aruai ngāi,
nangnīn anpet asīnte nei sāke u na mākingkang chu nei vol u.
25 Dān mīnchūpu le Pharisi ngāi,
na vān aduai u.
Asik chu nangni phuazekām ngāiin khuri le khēng ngāi apang chu nei rasūk u.
Tenchu hava ngāi sūnga han khāmaret le huat anhamna kēng ābit.
26 Mit achō Pharisi,
khuri le khēng ngāi ha asūng rasūk mānsa ro,
hatuka apang tiang um anthiang inti.
27 Dān mīnchūpu le Pharisi ngāi,
na vān aduai u.
Asik chu nangni phuazekām ngāi hi chūn anpele thān mun ang kēng na ni u.
Hava ha apang tiang chu āsa anga anlanga tenchu asūnga chu mi thi aru le aloma annim annok dōra kēng ābit.
28 Havan tin ang han nangnīm apang tiang chu mīn ei na mu ranga chu mi dika anlanga.
Tenchu na sūng u chu phuazekām le dān anrakānna kēng ābit.
29 Dān mīnchūpu le Pharisi ngāi,
na vān aduai u.
Asik chu nangni phuazekām ngāiin deari ngāi thān khur nei sin u.
Hanūk chu mi dik ngāi thāna lung nei phuna nei manliang u.
30 Hanūk chu:
‘Koini na chipui ngāi hun lāia a om ni ila chu deari ngāi thisen phuba pēl nō mani ba,’
nei ti u.
31 Havan tina nei ti u sik tak han,
deari that ngāi sanāi na ni u ti ha ei na manriat u ani zei.
32 Na chipui u ngāiin ei mantung u nōk ha nangnīn mantung u ro.
33 Marūl ngāi!
marūl tūr anei tezia ngāi!
ruiril tika hontin mo Gehen moia ansinsakna nāta nei zōk thei u rang?
34 Hasika han en u ro,
deari le mi hian le dān mīnchūpu ngāi nangni bila hong tīr ka ti.
Amāni bil āta senkhat chu thāta krosa pe un na ti,
senkhat chu nei ankhōm u na ina zēm un na tia hanūk chu kho khat āta kho khata razūl un na ti.
35 Havan tin han mi dik Abel athisen len āta Barakia nāi pasal Zakaria,
Pathian biak in le māichām kongkāra nei that u.
Hatuka athisen ten pei maniapūra masial abui ngāi thisen asuak dōra phuba chu nangni chunga ei chul theina ranga kēng.
36 Kei na ril tatak ani u zei,
atun tak huna mi ngāi chunga hava ngāi dōra ha aloma ei la chul zit rang.
Isuan Jerusalem
ranga lung amanpōng
Lk.13:34 -35
37 O Jerusalem,
Jerusalem,
nangin deari ngāi na lei thāta,
na kōma ei hong tīr ngāi um lung adēnga na lei thāta!
Ārpuiin ate ruai amantha thuaia ei opa ei siak anga voi ituk mo na nāi ngāi a opa asiak ranga kei zōt ani na.
Tenchu nangnīn lei zōt u mak chena.
38 En u ro,
na in chu nangni sika achiama anpei rang ani zei.
39 Asik chu kei na man thei ani u zei,
‘Puma raminga ahong chu anpāka om rase,’
na ti u māseng chu atun āta na mu u lāi nō ta ni,”
(Sām 118:26 ) ati na.