Vānrama alian khītpu
18
1 Hatuka hava hun tak dēna zolāi ngāi chu Isua kōma ahonga:
“Hanle vānrama hin tu mo alian khīt rang?”
ati u na.
2 Hankēng Isuan nāipangte khat apāia amalāi u taka amandinga.
3 Taktaka kei na ril ani u zei:
“Na kīr rēta nāipangte anga na ni u nōk ten,
vānrama lūt thei u nō ta ni.
4 Hasika han tukareng hiva nāipangte anga annuai tak ha vānrama alian khīt rang ani na.
5 Hanūk chu tukareng hiva nāipangte anga nāipangte khatpei ka raminga apom tak chu,
koi ana pom ani na.
Āsia thō lama achulna
6 Tenchu tukareng koi ana iam nāipangte ngāi bila angkhat pei achulna athō chu arīnga busukna lung alianpa khat akhita tipuilian anthūka vānning sela ama ranga sa bet inti.
7 Achulna ei hong suak sika maniapūr ranga avānduai rase.
Achulna chu ei hong suak ngēt rang ngal ani na,
tenchu ama sik taka achulna ansuak miring um avānduai rase.
8 Na kutin mo na kēn mo ana masul ten,
tan tānla pei ro.
Asik chu kut anni mo ke anni mo adōna tāituan moipuia na chul nēk ten,
piangsuala mo kekhora mo,
damnana alūt chu na ranga sa bet inti.
9 Hanūk chu na mitin ana masul ten,
kel tānla pei ro.
Asik chu mit anni adōna Gehenna moipuia na chul nēk ten,
mit khat adōna damnana alūt chu na ranga sa bet inti.
Bera anpei lehan ankhīna
Lk.15:3 -7
10 En u ro,
hiva asīnte ngāi bila angkhatte ngal mumāk makhāi u ta ni.
Asik chu kei na ril ani u zei,
anvāna apalāi u ngāiin ka Pa anvāna om amēl chu ei en chian u kēng.
11 Asik chu anpei ngāi andam ranga koi Miring Nāi Pasal hi ahong ka ni.
12 Hontin mo nangnīn na mandon u?
Mi khatin bera raza khat dōn sela,
hava bila angkhat lam anvāi vinga.
Hava tika han hava sōmakua akua ngāi māka mual ngāia vakala lam anvāite chu varok nō ni mo?
13 Taktaka kei na ril ani u zei,
havate ha avatok ten,
lam anvāi lui sōm akua le akua ngāi nēka ama chunga rāi mansān ual inti.
14 Havan tin anga han hiva asīnte ngāi bila angkhatte ngal anpei rang hi na Pa u vāna mi ei zōt ni mak.
Na chunga āsia thō na parual
Lk.17:3 -4
15 Hanūk chu na parualin na chunga āsia athō ten,
akōma sē tānla nang le ama rong riata ei dik nōkna vaman thei ro.
Hatuka na hē ana rangāi pe ten,
na parual chu nei man rēt ani zei.
16 Tenchu na hē ana rangāi pe nōk ten mitei angkhat mo anni mo na bila ruai tānla akōma sē ro.
Asik chu:
‘Ruiriltin dōra chu anni mo anthum mo ariatpui mūra chong le kēng ei chat,’
(Dān.19:15 )
ati na.
17 Tenchu amāni hē ngal arangāi nōk ten,
kuibing kōma mantung u ro.
Hatuka kuibing hē um arangāi nōk ten,
ama chu na ranga nam atei le siachōi ansuang ngāi anga chang rase.
Phil chunga ankhit le anzōk rui
18 Taktaka kei na ril ani u zei,
nangnīn phil chunga nei khit u chu chungvānām ankhit inti.
Hatuka nangnīn phil chunga nei mazōk u chu chungvānām anzōka om inti.
19 Taktaka kei na ril rēt ani u zei,
maniapūra hin nangni bila annin ei zong u tak peia anrual u ten,
hava ha amāni ranga ka Pa vāna mīn ei thō pe rang.
20 Mi anni mo anthum mo ka raminga ei anchun u na tak abil u na om ka ti,”
ati na.
Riangvāimuna dōn lui
suak lehan ankhīna
21 Hatuka Peter chu Isua kōma ahonga:
“Puma,
ka parualin ka chunga āsia thō sela voi ituk ngal mo kei madual rang?
Voi sari pei mo?”
ati na.
22 Isuan akōma:
“Voi sari ni mak kei na ti,
tenchu voi sōmsari voi sari kēng kei na ti.
23 Hasika han vānram chu hivan tin hin na mankhi theia.
Rēng khatin asuak dōn ngāi kōm āta hisāp alāk rang hi anuama.
24 Hatuka hisāp alāk rang aphut le chu mi khat hān,
talent asāng sōm antānga,
hava nāi ha akōma aruai u na.
25 Hatuka apēk theina rang khop itē ei dōn nōk sika apuma hān,
ama le anungāk le anāi ngāi le hanūk chu ei dōn dōra azuar zita athuan ranga chong apēka.
26 Hasika han hava suak chu ama kunga anboka:
‘O ka puma,
nei na maruang zām rang kēng ani zei,
aloma na thuan zit bo ning,’
ati na.
27 Hatuka hava suak apumapa hān atak chunga lungkham amuna ei mazōk hanūk chu ei antāng um ei madual pe ani na.
28 Hatuka hava suak dēn ha asēna asuak changpui bila angkhat avamuna.
Hava nāi akōma han denarī raza khat antāng ani na.
Ama tak chunga han akut avaleka arīng avasōmtit pena:
‘Nei antāng ha na thuan ta ro,’
ati na.
29 Hatuka hava asuak changpui ha ake kunga anboka:
‘Nei na maruang zām rang kēng ani zei,
aloma na thuan zit bo ning,’
ati na amathēma.
30 Tenchu zōt mak,
hasika han ei antāng athuan sua māseng pei chu lung ina avakhuma.
31 Hava rui ha asuak changpui ngāiin amu u na achālaka amalung ana u.
Hatuka apuma kōma asēna aloma avaman thei zit u.
32 Hasika han ama chu apuma hān avaman pāi sua le akōma:
‘O suak salui,
nei na mathēm sabak sika nei antāng ngāi dōra kei na ma dual kēng hale!
33 Koiin na chunga lung kei na manpōng anga na suak changpui chungām lung nei manpōng rang ni mak mo?’
ati na.
34 Hasika han apumapa chu atak asi sabaka ei antāng ngāi dōra athuan zit sua māseng chu mīn sinsak ngāi kuta abetōka.
35 Havan tina han nangni ngāi chip hi na malung lehan na parual u ngāi dān ei rakān u na ha na madual u nōk ten,
ka Pa vāna mīn um han tin dēn han na chung u na ei thō rang,”
ati na.