Isua mēl ei teina
17
1 Hatuka ni ruk suale han Isuan Peter,
Jakob le Jakob anāipa Johan amāni lim aruaia mual ansāng khata avakalpuia.
2 Hava han amāni matona amēl amanteia.
Amāi chu ani anga hin a ēla,
apuan chu ra-āng anga hin avār sabaka.
3 Enta,
hava lāi tak han Mosi le Elija chu amāni matona ahong anlang u na Isua achongpui u na.
4 Hatuka Peterin Isua kōma:
“Puma,
koinīn hivana nei om rang hi āsa kēng hile.
Na zōt ten,
hiva hin chubuk in anthum manding inti,
nang na rang khat,
Mosi rang khat,
Elija rang khat,”
ati na.
5 Havan tin han amān chong ala ril lāi tak han enta,
ansūm alang sabak khatin amāni chu ahong khuma.
Hatuka ansūm bil āta hē ahong anthanga:
“Hiva hi ka Nāi Pasal madit,
ama chunga hin ka rāi ei sānna khīt,
ama chong hi rangāi u ro,”
ati na.
6 Hava ha zolāi ngāiin ariat u na phila anbok u na achālaka aratha ta u na.
7 Tenchu Isua amāni kōma asēna avatōna:
“Anthui u ta ro,
āchi u nō ro,”
ati na.
8 Hatuka chung atang u le Isua rong nōk chu atei tutē ei mu om u lāi mak.
9 Hatuka mual āta ahong achum u susūnga Isuan azolāi ngāi kōma:
“Koi Miring Nāi Pasal hi athi ngāi bil āta kān thui rēt māseng chu
hiva anlārna hi tutē kōma ril u ta ni,”
ati na chong apēka.
10 Zolāi ngāiin akōma:
“Ichang mo dān mīnchū ngāiin Elija kēng ahong mānsa rang ei ti u?”
ati na.
11 Hatuka Isuan amasanga:
“Taktataka,
Elija chu ahong rang ani zei,
hatuka ama ahong tika chu amān aloma hong manding rēt inti.
12 Tenchu koiin kei na ril ani u zei,
Elija chu ahong sua kēng ani zei,
tenchu mīn lei riat mak.
Tenchu achunga amānīn ei zozōt ei thō u ani na.
Havan tin anga han koi Miring Nāi Pasal um amāni kōm āta antakna
tam kei tiar rang anāng,”
ati na.
13 Hankēng zolāi ngāiin Baptispu Johan arui kēng ei ril hile ati na ei la riat thei u.
Isuan raluai ei sūur pasal sanāite khat ei mandam
14 Hatuka amāni chu mipui kōma ahong asuak u le mi khat Isua kōma ahonga mankhūk ahong bila:
15 “Puma,
ka nāi pasalte chunga lungkham na mu pe ro ba,
asik chu thathi thadet ankōk ani na.
Adūk ana pe sabak chachaka,
voi ituk mo moia ei andēng ani zei,
hanūk chu voi ituk mo chu ti nām ei chul ani zei.
16 Ama chu na zolāi ngāi kōma ka ruaia,
tenchu mandam thei u mak,”
ati na.
17 Isuan amasanga:
“Hiva huna iamna bui le lam anvāi miring ngāi!
Ituk ten mo na kār u na kei la om rang?
Ituk ten mo kei na la diar u rang?
Hava nāite ha ka kōma hiva hin hong ruai u ro,”
ati na.
18 Hatuka Isuan raluai chu angōna asūng āta ahong suaka,
hatuka hava hun lena han nāipangte chu ahong adama.
19 Hankēng zolāi ngāi chu maruka Isua kōma ahong u na:
“Koinīn ichang mo hava ha nei razūl thei nok?”
ati u na.
20 Isuan amasanga:
“Hava ha nei iam u na atōm sika ani na.
Taktaka kei na ril ani u zei,
hoiro ru sīnte dōr ngal iamna na dōn u ten,
hiva mualpa hi,
hivan āta son anthot ro na ti u ten anthot inti.
Nangnīn nei thōthei u nōk rang itē om ngal nō ni.
21 Tenchu bōr azong le bungoi rong nōk ten,
hiva ngāi hi anzūl sa mak,”
ati na.
Isuan ama ei thi rang
rui aphāmān alei ril rēt
22 Hatuka Galili rama lokōna a om u lāi han Isuan amāni kōma:
“Atun chu koi Miring Nāi Pasal hi miring ngāi kuta ansūr rang ka ni zei.
23 Amānīn na that untia,
tenchu nīnthum nikhuana āthi nāta anthui rēt ka ti,”
ati na.
Hava sika han azolāi ngāi chu adok achuai khap u na.
Pathian biak ina
siachōi apēk rui
24 Hatuka Kapernaum khua ahong atung u le Pathian biak ina siachōi ansuang ngāi chu Peter kōma ahong u na:
“Nangni anānchupu u hān,
biak in siachōi pēk chachak mak mo?”
ati u na.
25 “Apēk chachak dō,”
ati na amasang u na.
Hatuka Peter chu in sūnga avalūt le Isuan chong alei dō mānsana:
“Simon,
nangin hontin mo nei mandon?
Phila rēng ngāiin tu kōm āta mo siachōi mo,
ōt mo ei sūr u chachak?
Anāi ngāi kōm āta mo ole atei nāi ngāi kōm āta mo?”
ati na.
26 Peterin amasanga:
“Atei nāi ngāi kōm āta ha na,”
ati na.
Hatuka Isuan akōma:
“Hano ten nāi ngāi chu azōk ani u na.
27 Hanum nisela amāni adui nei chang nōkna ranga nang chu sē tānla tipuia rakuai vapei ro.
Hatuka rakuaia ngā akop mānsa khīt ha la tānla abāi phong tānla rupa dangka khat manin na ti.
Hava ha chōi tānla koi le nang na ranga amāni kōma siachōi vapēk ro,”
ati na.