Sinsiana amu
ranga amathēm u
16
1 Hatuka Pharisi le Sadduki ngāi chu Isua kōma ahonga,
ama ansinna ranga anvān āta sinsiana khat na man mu ro,
ati na ahong mathēm u.
2 Tenchu amān amasanga:
“Nikhua abui rang le:
‘Nikhua ahui rang kēng,
asik chu kōlkung asena anthiang vung,’
na ti u chachaka.
3 Hatuka zīnga chu:
‘Avian chu nikhua hui nō ni,
asik chu kōlkung asena khua annīm zuak,’
na ti u chachaka.
Nangni phuazekām ngāi!
Kōlkung om zia chu na riat thei sabak u na,
tenchu hun sinsiana om zia chu riat thei u mak che mo?
4 Hiva huna mi salui ngāi le uiare ngāiin sinsiana mu ranga ei val u,
tenchu deari Jona sinsiana rong nōk chu atei itē sinsiana akōm u na anpēk nō ni,”
ati na.
Hatuka amāni amāka Isua chu asēna.
Pharisi ngāi chol le
Sadduki ngāi chol
Mk.8:14 -21
5 Hatuka tipuilian son tiang varāl ankān u lāi han zolāi
ngāiin ruti chōi rang amangil u na.
6 Isuan akōm u na:
“Anrung u tānla,
Pharisi le Sadduki ngāi chol āta anrēng u ro,”
ati na.
7 Hatuka amāni le amāni achong u na:
“Na bila ruti nei hong chōi lāi nōk sika kēng ei ti ni zei ni,”
ati na anril u na.
8 Isuan hava achong u ha ariata:
“O iamna tōm ngāI,
ichang mo ruti dōn mak me ati na nei anril u?
9 Atun tena la riat thei u mak che mo?
Mi asāng rangā le ruti rangā rui ha riat u lāi mak che mo?
Hanūk chu hava lāi han ralei ituk mo nei rūt u ha re u mak che mo?
10 Hanūk rēt chu mi asāng manli le ruti sari rui hale imo nei mangil u mo?
Hava lāi hanle kok ituk mo nei manbit u?
11 Anrēng u ro kei na ti u hi ruti sika ni mak ti hi ichang mo nei riat thei u nōk?
Tenchu Pharisi le Sadduki ngāi chol āta kēng anrēng u ro kei na ti u,”
ati na.
12 Hankēng amān ruti na chol anchel rui ni mak ei ril,
tenchu Pharisi le Sadduki ngāi mi ei manchūna dān āta anrēng ro ti kēng ei ril ti ha ahong riat thei u na.
Krista kōma Peter
ei anpuang rui
13 Isua chu Kaisari-Philippi khua ravēla avatung u le azolāi ngāi kōma arakela:
“Koi Miring Nāi Pasal hi mīn tu mo ei na ti u?”
ati na.
14 Hatuka amānīn amasanga:
“Mi senkhatin chu ‘Baptispu Johan,’
ana ti u.
Senkhatin chu:
‘Elija,’
ana ti u.
Atei senkhatin chu:
‘Jeremia nōk ten deari ngāi bila angkhat pei chu ani,’
ana ti u,”
ati u na.
15 Tenchu amān akōm u na:
“Nangnīn koi hi tu mo nei na ti u?”
ati na arakela.
16 Simon Peterin amasanga:
“Nang chu Krista,
Pathian adam Nāi Pasal kēng na ni,”
ati na.
17 Hatuka Isuan akōma:
“Jona nāi pasal Simon,
bōrsāng atung na ni zei,
asik chu taksa le thisen adōn miringin hava ha na kōma ei hong manlang ni mak,
tenchu ka Pa vāna mi kēng ahong anlang.
18 Hasik han koi um na kōma kei na ti ni zei,
nang Peter,
hatuka hiva lungpui chunga hin ka kuibing manding ka ti,
thīna suakkhār ngalin zui nō ni.
19 Na kōma hin vānram chabi ngāi chu na pe ka ti,
hatuka nangin phila nei khit chu anvānam ankhit inti,
hanūk chu nangin phila nei mazōk chu anvānam anzōk inti,”
ati na amasanga.
20 Hava suale azolāi ngāi kōma han,
koi Krista kei ni hi tutē kōma rpuang u ta ni,
ati na chong apēka.
Isuan ama ei thī rang
rui aphāmān alei ril
21 Hatuka hava hun len āta Isua chu Jerusalem khopuia asē ei nānga Jihudi pātar ngāi,
chāizūng ngāi le dān mīnchū ngāi kōm āta antakna tam ei vatiar rang.
Ama ei thīna rang zia hava suale chu nīnthum nikhuana athi nāta ei anthui rēt rang rui azolāi ngāi kōma aloma anthiang vanga aril aphuta.
22 Hasika han Peterin apanga aruaia avān ngo rang athōna:
“Puma,
han tin han ni thei nō ni,
hava ngāi ha na chunga chul thak nō ni,”
ati na.
23 Tenchu Isua ama tiang anhoia:
“Soitān,
ka maton āta ankhāi ta ro,
ka ranga anakhār kēng na ni hile.
Asik chu Pathian mandon ni mak nei chōi,
tenchu miring mandon kēng nei chōi hile,”
ati pena.
24 Hatuka Isua azolāi ngāi kōma:
“Tukareng ka nūk ana zī zōt tak chu aninga ei anngil rang anāng,
hanūk chu akros raputa ka nūk ei na hong zī rang anāng.
25 Asik chu tukareng ama ei damna anzōk zōt chu machān inti.
Tenchu tukareng ka sika ama ei damna anchān zōt chu man rēt inti.
26 Mīn maniapūr pumpui hi man sela tenchu ama ei damna amachān ten,
ama ranga imo ei nemna?
Hanūk chu ama ei damna rathūla miringin imo aman ei pēk thei rang?
27 Asik chu koi Miring Nāi Pasal hi avānpalāi ngāi bila Pa ei anlianna lehan ahong rang ka ni zei.
Hava tika chu mi tinin asin thō anga ei lō u chu hong pēk chip ka ti.
28 Taktaka kei na ril ani u zei,
hiva muna anding ngāi bila senkhat koi Miring Nāi Pasal ka rama kei hong amu māseng chu thīna tem lui rang a om,”
ati na.