Bōrsāng ātung ngāi
Lk.6:20 -23
5
1 Hatuka amān mipui ngāi amuna muala akala avānsuta,
zolāi ngāi chu ama kōma ahong u na.
2 Hatuka amāni kōma amanchūna chong arila:
3 “Sūngrīl tianga anriang ngāi
chu bōrsāng ātung kēng.
Asik chu vānram chu amāni ta
ei la ni rang.
4 Malung dūk ana ngāi chu
bōrsāng ātung kēng.
Asik chu lungngamna ei la
man u rang.
5 Āsing ngāi chu bōrsāng ātung
kēng.
Asik chu amānīn maniapūr ei
la lua u rang.
6 Ādik sika anchām le anrāl
ngāi chu bōrsāng ātung kēng.
Asik chu akhopa ei la om u rang.
7 Lungkhamna adōn ngāi chu
bōrsāng ātung kēng.
Asik chu lungkhamna ei la
man u rang.
8 Malung ānthiang ngāi chu
bōrsāng ātung kēng.
Asik chu Pathian ei la mu u
rang.
9 Anngoina asin thei ngāi chu
bōrsāng ātung kēng.
Asik chu Pathian nāi ei lānti u
rang.
10 Ādik sika ansinsakna atiar
ngāi chu bōrsāng ātung kēng.
Asik chu vānram amāni ta ei
la ni rang.
11 Koi ka sika mīn māimōk ana saka,
ana sinsak u tik,
hanūk chu milak chong arila āsia tin dōra le ana ngo u tik,
bōrsāng atung na ni u zei.
12 Na rāi mansān u tānla phām u ro.
Asik chu vānrama nangni ranga rātpāk ātampa ansiak a om.
Asik chu havan tin dēn han na mān u na deari ngāi chu ansinsaka ei om u chachak ani na.
Machi le ra-āng rui
13 Nangni hi maniapūra machi na ni u.
Tenchu machi ei alna ahek ten,
hontin mo ei al rēt thei rang?
Hava chu itē ei nemna om lāi mak.
Mīn ei peia ake le ei thin duai rang kēng ani zei.
14 Nangni hi maniapūra ra-āng na ni u.
Mual ansānga khua om chu anthup thei ngāi mak.
15 Mīn lēm aman chuanga kok sūnga siak ngāi mak.
Tenchu in sūnga mi om dōra ei ēl theina ranga lēm chuangna chunga kēng ei siak ngāi.
16 Havan tin anga na ra-āng u chu mitin mitmuna ēl rase.
Hankēng amānīn na sin thō u āsa amuna vāna na Pa u ei manpāk thei u rang.
Dānbu ei makhipna
17 Dānbu mo,
deari ngāi lekhabu mo angkhat pei ni rase,
apei ranga hong ati na mandon u nō ro.
Hava ngāi apei ranga hong ni makung,
tenchu ankhip ranga hong ka ni.
18 Taktaka kei na ril ani u zei:
Phil le anvān anpei māseng,
dānbūna ansun dapa anziak mo,
ankei rēka anziak mo ngal anpei thak nō ni.
Aloma akip zit māseng anpei nō ni.
19 Tukareng hiva ansun dap ngāi bila angkhat dak ngal ansiāta ākhēl le hava anga athō ranga mi anchū tak chu vānrama asīn khīt antīnti.
Tenchu tukareng hava ngāi azīna,
hava anga athō ranga mi anchū tak chu vānrama alian antīnti.
20 Asik chu kei na ril ani u zei,
nangni nei sat u na hi Pharisi le Dān mīnchū ngāi satna na khēl u nōk ten,
vānrama lūt pial u nō ta ni.
Mi that rui
21 Dānin hīn tiana mi ngāi kōma:
‘Mi that nō ro,’
(Ant.20:13 )
ei ti ha na riat u na.
Hatuka ‘Tukareng mi that tak chu achunga rui antak ei suak rang,’
ti ha na riat u na.
22 Tenchu koiin kei na ti u chu,
tukareng aparual chunga asik abuia atak ansi tak chu,
achunga antakna ei suak rang.
Hanūk chu tukareng aparual rang,
‘Āsiatpa,’
ati tak chu achunga antakna rui ei suak rang.
Tenchu tukareng aparual ranga,
‘Āmopa,’
ati tak chu antakna moikunduna ei chul rang.
23 Hasika han māichāma dāli dar rang na hong chōi lehan na parualin na chunga malung siatna ei dōn ha na malunga achui theia.
24 Māichām matona na dāli dar rang māk tānla sē ro.
Na parual le vānngoi bak tānla,
na dāli chu hong dar ro.
25 Anānduipuia ruirilnana ana ruai lehan lampuia nei sēpui bibila anngoina thōpui ro.
Hano tenchu anānduipui hān ruiril ngāi kuta na betōk inti.
Hatuka ruiril ngāi hān mi sūr ngāi kuta na pēk rēt unti.
Hatuka nang chu ankhumna ina na vakhum unti.
26 Taktaka kei na ril ani u zei,
poisa khatte ngal na thuan māseng chu hong zōk pial nō ta ni.
Uire rui
27 Dānin tiana mi ngāi kōma:
‘Uire nō ro,’
(Ant. 20:14 )
ei ti ha na riat u na.
28 Tenchu koiin kei na ti u chu,
tukareng taksa ningōl sabak chunga nupang a en chu amalung sūnga uiare sua kēng ani zei.
29 Hasik han na chang mitin ana machāi ten,
kel tānla pei len ro.
Na taksa pumpui moikunduna anpei nēk ten,
na taksa her khat ei la siat chu na ranga āsa ual.
30 Na chang kutin ana machāi ten,
tuk tānla pei len ro.
Na taksa pumpui moikunduna anpei nēk ten,
na taksa her khat ei la siat chu na ranga āsa ual.
Nungāk ansenpui rui
31 Hanūk chu dānin:
‘Tukareng anungāk amāk rang azōt tak chu ansenna lekha pe rase,’
(Dān.24:1 )
ati na.
32 Tenchu koiin kei na ti u chu,
tukareng mi tei le achāi sika ni luia anungāk amāk tak chu anungāk uiare ei manchang ani na.
Hanūk chu tukareng nupang ei māk alāk tak um uiare ei manchang ani na.
Khomāk ansam rui
33 Hanūk rēt chu,
dānin tian lāia mi ngāi kōma:
‘Na khomāk ansam masiat nō ro.
Puma kōma na khomāk ansam chu len ro,’
(Dān.23:21 -23 )
ti chong ha na riat u na.
34 Tenchu koiin kei na ti u chu,
khomāk ansam pial u nō ro.
Chungvān raminga khomāk ansam u nō ro.
Asik chu hava ha Pathian ansutna chōmphāng kēng.
35 Hanūk chu maniapūr raminga khomāk ansam u nō ro.
Asik chu hava ha akepha siakna mun kēng.
Jerusalem khopui raminga khomāk ansam u nō ro.
Asik chu hava ha Rēng alian omna khopui kēng.
36 Hanūk chu na lu le khomāk ansam u nō ro.
Asik chu na lu u na samsang khat ngal anngui thei le anhāng thei ni u mak che.
37 Tenchu na chong ril u ngāi ha,
‘Ani’ chu ‘Ani’ ni rase.
Hanūk chu ‘Ani nōk’ chu ‘Ani nōk’ ni rase.
Hava nēka aliak āsap chu āsia nāta asuak kēng ani zei.
Mit rathūla mit,
hā rathūla hā
Lk.6:29 -30
38 Hanūk chu ‘Mit rathūla mit,’
ti le ‘Hā rathūla hā,’
ati na anziak hi na riat u na.
39 Tenchu koiin kei na ti u chu,
āsia ana thō u ngāi dui u nō ro.
Mīn na chang māi abēn ten,
kiang khat tiangām do rēt ro.
40 Hanūk chu mīn ruiril zōla na kultāi anpot rang ati ten,
na puan rasil um pe ro.
41 Hanūk chu mīn mēl khat kal achōi ranga therkhak ana thō ten mēl anni kal chōi pe ro.
42 Mīn na kōma ahonga ana hong zong tak chu pe ro.
Hanūk chu na kōma apūk ana zong tak chu nūksīr lei son nō ro.
Anadui ngāi anditna rui
Lk.6:27 -28, 32 -36
43 Hanūk chu,
‘Na inkōl mi adit ro,’
ti le ‘Na rāldui mumāk ro,’
(Lev.19:18 )
ti ha nei riat u ani na.
44 Tenchu koiin kei na ti u chu,
na rāldui chu adit u ro.
Hanūk chu anānsinsak ngāi ranga bōr zong u ro.
Khomāk anasam ngāi chu bōr zong pe u ro.
Anān mumāk ngāi ranga sin āsa thō pe u ro.
45 Havan tin han vāna na Pa u nāi nei chang thei u na ranga.
Asik chu amān mi salui le mi sa ngāi chunga ama anisa chu ei hong masuak ani na.
Hanūk chu mi dik le mi dik lui ngāi chungām rua ei hong masul ani na.
46 Nangni anāndit ngāi rong na dit u ten,
hong mo anpākna nei lō u rang?
Hava ngāi chu siachōi ansuang ngāi um ei thō u ni mak mo?
47 Hanūk chu na unāi ngāi rong chibai na thō u ten,
mi tei ranga imo aliak nei nem u na?
Hava ha chu nam atei ngāiin um ei thō u chachak ni mak mo?
48 Hasika han vāna na Pa u ei anzui anga nangnīm anzui u ro.