Nungāk ānthiang
sōm ngāi lehan ankhīna
25
1 Hatuka Isuan:
“Hava hun tika vānram chu nungākte ānthiang sōm ngāi lēm achōia mākpa antongpui ranga asuak ngāi ang ni unti.
2 Amāni bila mi rangā āmo,
hanūk mi rangā āhian ani u na.
3 Āmo ngāiin alēm chu achōi u na tenchu abila lēmti chōi u mak.
4 Tenchu āhian ngāi chu alēm u bila akoka lēmti achōi u na.
5 Hankēng mākpa chu ei hong sōt sika han alom u na anvuanga alei in u ani zei.
6 Hatuka zān chim ripa chu:
‘En u ta ro,
mākpa chu ahong rang ani zei!
Antongpui ranga suak u ta ro,’
ati na hē ahong anthanga.
7 Hatuka nungāk ānthiang ngāi alom u na anthui u na
alēm u amanliang chip u na.
8 Hankēng āmo ngāiin āhian ngāi kōma:
‘Na lēmti u na sem lalak u ro ba,
asik chu koini na lēm athi rang ani zei,’
ati u na.
9 Tenchu āhian ngāiin amasang u na:
‘Koini le nangni ranga chu anhun nō mani hile,
hanēk ten azuar ngāi kōma sē u tān varachōk u ro,’
ati u na.
10 Hatuka anchōk ranga asē u lāi tak han mākpa chu alei hong atunga.
Ansin vanga aleia om ngāi chu ama bila mui ruaina bu nēk ranga alūtpuia,
hatuka suakkhār chu ankhāra.
11 Hava suale mi nūka nungāk ānthiang atei ngāi um ahong atung u na:
‘Puma,
Puma,
na hong malong pe ta ro,’
ati u na.
12 Tenchu amān:
‘Taktaka kei na ti ani u zei,
na riat u makung,’
ati na amasanga.
13 Hasika han,
ahar chiana lei om u ro.
Asik chu koi Miring Nāi Pasal ei hong rang nikhua le hun re u mak che,”
ati na.
Talent lehan ankhīna
Lk.19:11 -27
14 Hanūk rēt chu Isuan:
“Pathian ram chu mi khat ram alana asē ranga asuak dōn ngāi dōra akuia adōnglua ngāi amāni kuta ei betōk ang hi ani na.
15 Asuak khat kōma talent rangā,
hanūk angkhat kōma talent anni,
hanūk angkhat rēt kōma talent khat apēka.
Amāni ei thei u ang chipa han apēka,
hatuka ama chu khuala anzin ranga asuaka asē lena.
16 Hatuka talent rangā achangpu chu asē lena hava lehan avānlōna
hanūk talent rangā avamaphunga.
17 Havan tin dēn han,
talent anni achangpu hām hanūk talent anni avamaphunga.
18 Tenchu talent khat achangpu chu asēna phila khur avakhuara apumapa sum chu avakhum rapa.
19 Hankēng hun asōtpa suale hava suak ngāi apuma chu ahong akīra,
amāni kōm āta sum hisāp chu ahong lāka.
20 Hatuka talent rangā achangpu chu ahonga hanūk atei talent rangā ahong chōia akōma:
‘Puma,
nangin talent rangā ka kuta nei na pēk ha,
enta,
hava nēka hanūk talent rangā ka hong maphung,’
ati na.
21 Hatuka apumapa hān akōma:
‘Suak āsa le aiamrua na ni,
nei thō hi achālaka āsa kēng.
Rui alakte chunga aiamrua nei ni sika rui ātampa chunga uliana na siak ka ti.
Na puma rāisānnana lūt ro,’
ati na.
22 Hanūk talent anni achangpu hām ahonga:
‘Puma,
talent anni ka kuta nei na pēk ha enta,
hanūk atei talent anni ka hong maphung,’
ati na.
23 Apumapa hān akōma:
‘Suak āsa le aiamrua na ni,
nei thō hi achālaka āsa kēng.
Rui alakte chunga aiamrua nei ni sika rui ātampa chunga uliana na siak ka ti.
Na puma rāisānnana lūt ro,’
ati na.
24 Hava suale talent khat achangpu hām ahonga:
‘Puma,
nang chu āsing nōk na ni ti hi ka na riata.
Hanūk chu chimuru nei tu nōkna muna sāng a-āt,
nei thek nōkna muna avānsuang chachak kēng na ni.
25 Hasika han kei na chi sika ka sēna talent nei na pēk ha phila ka vasiak rapa enta,
na neinun chu amun bang dēna a om,’
ati na.
26 Hatuka apumapān akōma:
‘Suak salui le andōk,
nangin kēng chimu kei tu nōkna muna kei āt,
hanūk chu kei thek nōkna muna kei mankhōm chachak ti hi nei na riat mo?
ati na amasanga.
27 Havan tina rang aniten,
ka sum ha sum anphung ngāi kōma nei pēk ranga chong ani na.
Hatuka ka hong akīr tika ka ta chu alei pungna lehan kei hong man rang ani rang,’
ati na.
28 Hasika han:
‘Akōm āta talent ha apot pe u ro.
Hava ha talent sōm adōnpu kōma pe u ro.
29 Asik chu tukareng adōn tak kōma anpēk riam inti,
ama chu ātama ei nei riam theina ranga.
Tenchu tukareng adōn nōk kōm āta ei nei tukte ngal ha anpot pe hiam inti.
30 Hava suak ei nemna bui ha tual panga azīng kāra vapei u ro,
sova son chapna le rakam anrialna om inti,’
ei ti,”
ati na.
Bera le kēl ngāi
31 Hatuka Isuan:
“Miring Nāi Pasal chu ama ei anlianna le hanūk avānpalāi ānthiang ngāi dōra le ahong tika ama chu ei anlianna lehan chōmphānga ansut inti.
32 Ama matona nam tin la hong anchun inti.
Hankēng bera enpūn hontin mo kēl ngāi āta bera ngāi ei zen anga amān mipui la hong zen inti.
33 Bera ngāi chu achang tianga siak inti,
kēl ngāi chu avoi tianga siak inti.
34 Hava tika han Rēngin achang tianga a om ngāi kōma:
‘Hong u ro,
ka Pa bōrsāng atung ngāi,
phil lung ansin len āta nangni rang ram alei ansin sua chu hong lua u ro.
35 Asik chu ka von anchām lāi han,
asāk rua nei na pēk u.
Ka tī anrāl lāi han
anēk rua nei na pēk u.
Khual ka chang lāi han,
nei na mantung u.
36 Puanchōi buia ka om lāi han,
puan nei na mansil u.
Ka dam nōk lāi han,
nei na kiavāng u.
Hatuka lung ina ka om lāi han,
nei na hong en,’
ei la ti rang ani na.
37 Hava tika han mi dik ngāiin:
‘Puma,
hova tik han mo na von anchām nei na mu na asāk rua nei na pēk?
Hanūk chu na tī anrāl
nei na mu na anēkrua nei na pēk?
38 Hova tik han mo khuala mi nei chang nei na mu na,
nei na mantung?
Hanūk chu puanchōi buia nei na mu na,
puan nei na mansil?
39 Hanūk chu hova tik han mo nei dam nōk le lung in nei om nei na mu na nei na hong en?’
ati na la masang unti.
40 Hatuka chu Rēngin amāni kōma:
‘Taktaka,
kei na ril ani u zei,
ka unāi bila asīn khīt tak chunga nei thō u tak ha ka chunga nei na thō ani u zei,’
ati na la masang inti.
41 Hatuka hava suale avoi tianga a om ngāi kōma:
‘Khomāk atung ngāi,
ka kōm āta ankhāi u ta ro.
Soitān le apalāi ngāi ranga ansin sua tāituan moipui muna son sē u ro.
42 Asik chu ka von anchām lāi han,
asāk rua na pe u mak che na.
Ka tī anrāl lāi han anēkrua na pe u mak che na.
43 Khuala mi ka chang lāi han,
na mantung u mak chena.
Puanchōi buia ka om lāi han,
puan na mansil u mak che na.
Ka dam nōk lāi le lung ina ka om lai han,
na hong en mak chena,’
ei la ti rang ani na.
44 Hava tika han amānīn:
‘Puma,
hova tik han mo na von anchāma le na tī anrāla nei na pēk nōk?
Khuala mi nei changa le puanchōi buia nei oma nei na zon nōk?
Hanūk chu dam luia nei om a le lung ina nei om a nang nei na hong en nōk?’
ati na ei la masang u rang.
45 Hatuka amān akōm u na:
‘Taktaka,
kei na ril ani u zei,
hiva asīn khītte ngāi bila mi angkhat pei chunga nei thō u nōk tak ka chunga nei thō u nōk ani zei,’
ati na ei la masang rang ani na.
46 Hava ngāi dōra chu tāituan ansinsakna muna sē unti.
Tenchu midik ngāi chu tāituan damna muna sē unti,”
ati na.