Isua ansūrna aval u
26
1 Isuan hiva ngāi dōra aloma aril suale azolāi ngāi kōma ati na:
2 “Nei riat u anga Zōkna Pānta hi nīnni alān sama.
Miring Nāi Pasal chu krosa antār ranga anbetōk inti,”
ati na.
3 Hatuka chu chāizūng le pātar ngāi Kaiapha ei ti u chāizūng ulian atuala anchun u na.
4 Isua chu ahuang zāma asūra,
athat ranga ei val u ani na.
5 Tenchu:
“Pānta lāi tak ni nō rase,
asik chu mipui kāra anbuaina aliantak a om thei,”
ati u na.
Bethani khuana Isua
sariak anthi rui
6 Hatuka Isua Bethani khuana mīn aphār ei ti Simon ina a om a.
7 Hava lāi han nupang khatin longvār bodola aman alu sariak marim ahui lehan ama kōma ahonga.
Hatuka bu nēka ansut lāi tak han alu sīpa ahong lei pe na.
8 Azolāi ngāiin hava ha amuna atakasi u na:
“Ichanga mo pei ei manchang so?
9 Hava sariak marim ahui ha aman ātampa lehan anzuara hava man lehan anriang ngāi kōma anpēk rase ba,”
ati u na.
10 Hava ha Isuan alei riata amāni kōma:
“Ichanga mo hiva nupang hi havan tin han nei manbuai u?
Ama chu ka ranga sin āsa athō kēng.
11 Anriang ngāi chu na bil u na a om babang rang ani na.
Koi chu na bil u na om babang lāi nō ning.
12 Amān ka chunga marim ahui ei lei hin,
kei anphūmna ranga alei mansūk kēng.
13 Taktaka kei na ril ani u zei,
maniapūra thang ahui ei anrilna mun tina ama riattitna ranga asin thō hīm anril inti,”
ati na.
Iskariot Judān Isua ansūr azōt
14 Hatuka chu Sōmleianni ngāi bila angkhat Iskariot Juda anti chu chāizūng ngāi kōma asēna avati na:
15 “Ama chu na kut u na,
betōk ka ti,
hong mo nei na pēk zōt u?”
Hasika han sumru sōmanthum atela aman lōn u na.
16 Hava hun len āta chu Judān akut u na ei betōk theina rang lampui aroka.
Puma Zāndui
Jn.13:21 -30 1 Kor.11:23 -25
17 Chol anchel lui ruti Pānta nikhua mānsana,
azolāi ngāi chu Isua kōma ahonga arakel u na:
“Zōkna pānta bu nēkna ha hon tiang mo nei mansūk ranga nei zōt?”
ati u na.
18 Amān amasanga:
“Khopuia sē u tānla mi khat kōma varil u ro:
‘Anānchupūn ka hun ahong anāi zei.
Zōkna pānta hi ka zolāi ngāi le na ina kēng kei mang rang,’
ati,”
ati na varil u ro.
19 Hasika han Isuan ei ti anga azolāi ngāiin Zōkna pānta bu nēkna chu ei vamansūk u ani na.
20 Nikhua ahong abui suale Isua azolāi Sōmleianni ngāi le bu anēka.
21 Hatuka bu anēk u lāi tak han amān ati na:
“Taktaka kei na ril ani u zei,
nangni bila mi khatin koi hi na mansūr u na ti,”
ati na.
22 Hasika han amalung u anngūi sabak chunga amānīn angkhakhata:
“Puma,
koi mo ka ni?”
ati na arakel u na.
23 Isuan amasanga:
“Ka bila akut khēng anpūr tak hīn koi anānsūr rang ani zei.
24 Tenchu Miring Nāi Pasal chu ama ruia Pathian Lekhabūna ei anziak ang taka ei sē rang ani na.
Hanum nisela Miring Nāi Pasal ansūr rangpu chu vān aduai kēng.
Ama chu anzir ngal nō sela chu aranga sa ual inti,”
ati na.
25 Hatuka Juda,
ama ansūr rangpūn amasanga:
“Rabbi,
koi mo ka ni?”
ati na.
Isuan amasanga:
“Ani,
nangin nei ti anga ani zei,”
ati na.
26 Hatuka anēk u lāi tak han Isuan ruti alāka,
rāisān chong aril suale akhiaka,
hatuka azolāi ngāi kōma apēka:
“La u tān sa u ro,
hiva hi ka taksa,”
ati na.
27 Hava suale khuri alāka,
rāisān chong arila,
akōm u na apēka:
“Hivan āta na lom u na buang u ro.
28 Hiva hi dān khit athara ka thisen,
mi tamtak āsia sāina ranga azān ani na.
29 Tenchu kei na ti ani u zei,
ka Pa rama nangni ngāi le ka buang rēt māseng chu hiva gerep zu hi buang lāi nō ning,”
ati na.
30 Hatuka la athō sua u le,
Maruan muala avakal u na.
Peterin Isua ei maniang
rang aphmān alei ril
31 Hava suale chu Isuan amāni kōma:
“Atun zān ngēta hin koi ka sika na lom u na anbuai un na ti,
asik chu hintin hin anziaka:
‘Koiin bera enpu ka zēm tik le
bera rual ngāi chu anchēn
kiar unti,’
(Zak.13:7 )
ati na.
32 Tenchu ka hong anthui rēt tika chu,
nangni māna Galili rama sē ka ting,”
ati na.
33 Hatuka Peterin amasanga:
“Na loma anbuai kiarām koi chu anbuai nō ning,”
ati na.
34 Isuan amasanga:
“Taktaka,
kei na ril ani zei,
atun zān lena hin ār akhuang mān voi anthum na maniangin na ti,”
ati na.
35 Tenchu Peterin amasanga:
“Na bila kei thi ten pei koi chu na maniang thak nō ning,”
ati na.
Hatuka zolāi atei ngāi um hantin dēn han ati u na.
Getsimani rahuan
36 Hatuka Isua chu Getsimani ei ti u muna han azolāi ngāi le asē u na.
Amān akōm u na:
“Sova son bōr ka vazong kār pei hiva hin lei ansut u ro,”
ati na.
37 Ama bila han Peter le Zabedai anāi pasal anni ngāi aruaia,
hatuka amalung ana na anngūi pe sabak u.
38 Amān hava ngāi kōma:
“Thīna rang tenpei ka malungdūk ana ka riat.
Hiva hin lei om u tān ka bila meng chian u ro,”
ati na.
39 Hatuka ama chu ala miaia asēna,
phila anbok laka bōr avazonga:
“Ka Pa,
ani thei ten,
hiva khuri hi ka maton āta ankhāi rase.
Hanum nisela koi kei zōt anga ni maka nang nei zōt anga ni rase,”
ati na.
40 Hankēng azolāi ngai kōma ahong,
alei in chīta ahong toka.
Peter akōma:
“Ka bila hin dār khat ngal meng thei u lāi mak che mo?
41 Ahara om u tānla bōr zong u ro,
ansinnana nei chul u nōk rang.
Ratha chu zōt ngal sela taksa chu achuai kēng,”
ati na.
42 Hatuka voi anni changna asuaka bōr avazong rēta:
“Ka Pa,
ka buang māseng hiva khuri hi ankhāi nōk ten,
na malung vong tung rase,”
ati na.
43 Ama chu ahong akīr rēta han,
alei in chīt dēna ahong toka,
asik chu amit akhu pe sabak ani u zeia.
44 Hankēng hava ngāi amāk rēta hanūk voi khat asēna voi anthum changna rang bōr avazonga,
han tin dēn han
avati na.
45 Hatuka ahong akīr sira azolāi ngāi kōma:
“Atun tena hin alei in chiana pōng nei lan sa u mo?
En u ta,
hun ahong asuak zei,
Miring Nāi Pasal chu misalui ngāi kuta anbetōk rang ka ni zei.
46 Anthui u ta ro,
sē u ta rei,
koi anasūr rangpu chu ahong anāi zei,”
ati na.
Isua ansūr
47 Hatuka amān chong ala ril lāi tak han Juda,
Sōmleianni ngāi bila angkhat ha ahong asuaka.
Ama bila sipai ātampa khendāi le sunrol achōia ahong u na.
Hava ngāi ha chāizūng le pātar ngāiin ei hong tīr ani u na.
48 Atun chu ansūr rangpu hān amāni lehan andangna khat aril pe vanga:
“Abiang kei tum tak ha ama ani len zei,
hava nāi ha sūr u ro,”
ati na.
49 Hatuka Isua tiang avapana Judān:
“Chibai,
Rabbi!”
ati na abiang avatum
pe na.
50 Isuan alei masanga:
“Ka mal,
nei hongna asik ha thō pei ta ro?”
ati na.
Hatuka hava mi ngāi hān ahong pan u na,
Isua achelbo u na,
ei sūr u ani na.
51 Hatuka enta,
Isua alōm ngāi bila angkhatin akut aleka.
Hatuka akhendāi aphōia chāizūng ulian suak khat atuka,
akuar a-āt pe vinga.
52 Isuan akōma:
“Na khendāi ha akok dēna siak ro.
Asik chu tukareng khendāi anlek chu khendāi le kēng ei thi rang.
53 Atun len vānpalāi asāng aruk mun sōmleianni nēka tam ka kōma ana hong atīr pe ranga ka Pa kōma azong thei nōk ranga mo nei na iam?
54 Tenchu havan tin han nisela,
Pathian Lekhana chong anga hintin hin ei hong om ngēt rang ti ha hontin mo ei kip thei rang?”
ati na.
55 Hava lāi tak han Isuan mipui ngāi kōma:
“Koi hi misuam mo ka ni?
Khendāi le sunrol achōia ana sūr ranga nei hong u?
Anikhuan tina Pathian biak ina ansuta chong ka ril chachak hale,
hava han na sūr u mak chena,”
ati na.
56 Tenchu hiva ngāi dōra hi deari ngāiin chong ei maziak anga ei kip theina ranga ahong chuk ngal kēng.
Hava suale azolāi ngāi dōrān ama chu amāka arot rak u.
Ruirilpu ulian ngāi
matona Isua aruai u
57 Hatuka Isua asūr ngāiin ama chu chāizūng Kaiapha kōma aruai u na.
Hiva hi dān mīnchū ngāi pātar ngāi ei anchun u chachakna mun ani na.
58 Hatuka Peter chu ankār uala ama nūk avazīna chāizūng atual tenpei asēna.
Hanūk chu ahek ten peia a en ranga insūnga avalūta biak in arung ngāi bila ansuta.
59 Hankēng chāizūng ngāi le ruiril ulian ngāi alom u na Isua ei that thei u na ranga ama chunga milak rui arok u na.
60 Hanum nisela milaka ariatpui ahong asuak sabak ngalam angkhatte ngal man u mak.
61 Nukhōn khīta chu mi anni ahong u na.
Amāni hān:
“Hiva mi hīn:
‘Pathian biak in masiam ka tinga,
nīnthum sūnga manding rēt ka ti,’
ati,”
ati u na.
62 Hasika han chāizūng ulian chu anding rēta:
“Itē masang nō ta ni mo?
Hiva ngāi hīn na chunga āsia anlōna chong ei hong chōi u hi hong zāt ti na mo?”
ati na.
63 Tenchu Isua adāi reka a om a.
Chāizūng ulianin akōma:
“Pathian adam raming asāl chunga chong kei na pēk ani zei,
nang hi Krista,
Pathian Nāi Pasal mo na ni,
na manthei ta?”
ati na.
64 Isuan amasanga:
“Ka ni,
nangin nei na ti anga,
ati na.
Hanum nisela kei na ti ni u zei,
Miring Nāi Pasal chu nangkan tika thōtheina dōn chang kut tianga ansuta,
anvāna sūmpui bila ahonga la mu un na ti,”
ati na.
65 Hasika han kēng chāizūng alian chu apuan athēta:
“Hiva mi hi Pathian siat aril ni mak mo!
Koinīn imo atei ariatpui nei la nāng!
En u ta,
atun len Pathian siat ei ril chu na riat kiar u hale.
66 Hontin mo ei na hong mandon u rang?”
ati na.
Amānīn amasanga:
“Hiva mi hi chu āthirua zēt ngal kēng hile,”
ati u na.
67 Hatuka amāisua taka amachil u na,
akut būr le asuk pe u na.
68 Hatuka senkhat chu akut maza le abēn u na:
“Nang Krista,
koini kōma Pathian chong ril rēt ta!
Tu mo nang ana zēm!”
ati
u na.
Peterin Isua amaniang zei
Jn.18:15 -18, 25 -27
69 Hava lāi han Peter chu kholāi tuamāia moi an-uana ansuta.
Hava han suak nupangte khatin:
“Nang chu Galili rama Isua bila mi kēng na ni hile,”
ahong ti na.
70 Tenchu amān mipui matona:
“Tu rui mo nei ril ha,
koi chu re makung,”
ati na amaniang zeia.
71 Hatuka nupang khat rētin ama chu tual makot tianga ei pan amuna havana a om ngāi kōma:
“Hiva mi hīm Nazaret khuana Isua bila a om ha kēng,”
ati na.
72 Hatuka amān:
“Hava miring ha koi chu riat u makung do,”
ati na khomāk ansama amaniang rēta.
73 Hatuka asōt miai suale ama kōla anding chu Peter akōma ahong u na:
“Taktaka,
nang um amāni bila mi khat kēng na ni hile,
asik chu na chong rila andang,”
ati u na.
74 Tenchu amān:
“Hava miring ha riat makung,”
ati na araming asāla khomāk ansama.