27
1 Hatuka zīng khuavār le chāizūng alian ngāi le Jihudi pātar ngāi alom u na Isua thatna ranga rui anrilna adōn u na.
2 Hatuka ama chu akhit sua u le ram oppu Pontia Pilat akuta anbetōk ranga aruai u na.
Iskariot Juda ōkri kāia athi
Kts 1:18 -19
3 Hatuka ama anbetōkpu Judān Isua chu āsia anlōna rui achat sua zei ti ariata amalung ansīra.
Hatuka hava sumru sōmanthum achōia chāizūng
le Jihudi pātar ngāi kōma avamakhīr rēta.
4 Amān:
“Masial abui thisen kei na betōk u hi āsiat athō kēng ka ni zei,”
avati na.
Tenchu amānīn:
“Hanle hava ha koini na ranga hong zāt mo?
Hava ha nang kēng ariat,”
ati pe viak u zeia.
5 Hatuka hava sumru chu Pathian mun ānthianga adēng raka asuaka,
asēna ōkri avānthōia ei vathi ani na.
6 Hatuka chāizūng ngāiin hava sumru ha alāk u na:
“Hiva sum hi nuam pēk siakna muna āsiak hi ānthiang nōk kēng ani zei,
asik chu hiva hi mi thisen man kēng,”
ati u na.
7 Hatuka amānīn rui anrilna adōn u na hava lehan khual thān mun rang bēl abuakpu ram chu avarachōk u na.
8 Hava sika han kēng avian ten pei hava mun ha mīn ‘Thisen Mun,’
ati u na.
9 Hivan tin hin deari Jeremian hiva chong alei ril ha ei hong kip ani na.
Asik chu amān ei ti:
“Hatuka sumru sōmanthum
chu alāk u na,
Hava ha ama aman ranga
antet sua.
Hava ha Israel nāi ngāi bila
mīn ei tet sua man ha
ani na.
10 Hatuka Pumān ka kōma ei
na manthei anga,
Hava lehan bēl buakpu ram
aman ranga avapēk u na,”
ti ha ani na.
Ram oppu Pilat
matona Isua amanding u
11 Hava suale Isua chu ram oppu matona avamanding u na.
Hatuka ram oppūn akōma:
“Jihudi ngāi rēng mo na ni?”
ati na arakela.
Isuan amasanga:
“Ani,
nangin nei na ti anga ka ni,”
ati na.
12 Havan tin han chāizūng le Jihudi pātar ngāiin achunga chong āsia aman tung u nām nisela amān chu itē makhal mak.
13 Hasik han Pilatin akōma:
“Na chunga chong āsia ahong antung ngāiin ei ril u ngāi dōra hi riat mak che mo?”
ati na arakela.
14 Tenchu amān bāi khatte ngal ei masang nōk sika han ram oppu chu aboi adong sabaka ariata.
Isua thīna ranga rui anril
15 Hatuka hivan tin hin ahong ani na,
Jihudi ngāi pānta nikhua chu mipui bila lung ina ankhum khat,
amāni ei zōt u tak pei ram oppūn anzōk theina dān ei dōn ani na.
16 Hava lāi tak han Barabba ati na mi salui raming anthang khat lung ina ankhum adōn u na.
17 Hatuka amāni ngāi ahong anchun kiar u lehan Pilatin:
“Tu mo kei na mazōk pe u ranga nei zōt u?
Barabba mo ole Krista ei ti u Isua ha mo?”
ati na arakela.
18 Asik chu amān hiva hi khāmaret ei thō u sika ei betōk rak u kēng ti hi ariata.
19 Hatuka Pilat ruiril zōla avānsut lāi han anungākin chong aman sē na:
“Hava mīn thiang chunga han anchelna itē dōn nō ro,
asik chu ama sika avian ka ramanga antakna tampa kei tiar kēng,”
ati na chong abena.
20 Tenchu chāizūng le Jihudi pātar ngāiin Barabba azonga Isua chu akhāi ranga mipui amanchāng u na.
21 Hava sik han ram oppūn:
“Hiva anni ngāi bila hova mo kei na mazōk pe ranga nei zōt u?”
ati na arakela.
Hankēng amānīn:
“Barabba kēng,”
ati u na.
22 Tenchu Pilatin amāni kōma:
“Hanle Krista ei ti u Isua hile hong zāt kei na thō pe u rang?”
ati na.
Amānīn alom u na:
“Ama chu krosa tār ro,”
ati u na.
23 Hatuka ram oppūn:
“Ichanga mo?
Amān hong mo masial ei thō?”
ati na.
Tenchu amānīn alom u na ankhēk riama:
“Ama chu krosa tār ro,”
ati u na.
24 Hasik han Pilatin hava ei ti han itē nem lāi mak.
Tenchu anbuaina lian kēng ei suak ti ariata.
Hasika han tī alāka mipui matona akut arasūka:
“Koi chu hiva mi dik thisen āta kān thiang,
nangni kēng ariat na ni u,”
ati na.
25 Hatuka mipui ngāi alom u na:
“Ama thisen chu koini na chunga le koini na nāi ngāi chunga om rase,”
ati na amasang u na.
26 Hasika han amān Barabba chu amazōk pena tenchu Isua chu amanzīk sabaka,
hatuka krosa antār ranga amāni kuta ei betōk ani zei.
Rom sipai ngāiin
Isua mani ēro athō u
27 Hankēng ram oppu asipai ngāiin Isua chu lal ina aruai u na,
ama kōma sipai rabu pumpui
chu ahong anbūm zit u na.
28 Apuansil chu akhek pe u na,
puan senaduk sabak khat amansil u na.
29 Raling lukhum anphan chu aluna amankhum pe u na.
Achang kut tiang husop kuang khat amanlek u na.
Hatuka ama matona amankhūk abil u na:
“Chibai,
Jihudi ngāi Rēng!”
ati na maniēro athō u na.
30 Hatuka achunga amachil u na luangsār kuang alāka hava lehan alusīp azēm pe u na.
31 Hatuka manitāngzār athō sua u le puansen chu akhek pe u na ama apuan ngāi dēn amansil rēta krosa antār ranga ei suakpui u
ani na.
Isua Krosa antār
Jn.19:17 -27
32 Hatuka asuaka asēpui u lāi han Kurini khuana mi khat araming Simon chu antongpui u na.
Ama ha Isua akros anput ranga asūrtit u na.
33 Hatuka Golgotha ei ti u “Luru Mun” muna,
a omzia chu han avasuakpui u na.
34 Hava han zu athūr sabak mitkha le anpol ha abuang ranga apēk u na.
Tenchu hava ha atem le chu abuang rang zōt mak.
35 Hankēng krosa atār sua u le apuan ngāi chu ravān enna athō u na amāni lim ansem u na.
Hava tak ha deari achong ril chu ei hong kipna ani:
“Amānīn ka puan chu ansem
u na.
Ka puansil chu ravān enna
athō u na,”
(Sām 22:18 )
ati na.
“HIVA ISUA HI
JIHUDI NGĀI RĀNG,”
ati na hiva āsia ei manlō u na chong hi alu chunga amakhop u na.
38 Hatuka ama bila han misuam anni ngāi atār u na.
Achang tiang angkhat hanūk chu avoi tiang angkhat.
39 Hava lampui tianga anlōi ngāiin alu athinga maniēro athō u na.
40 Amānīn ei ti u:
“Nang hi mo na ni zei Pathian biak in ansiama nīnthum sūnga anding rang!
Pathian Nāi Pasal nei ni sika na theia andam ta ro.
Hatuka kros āta hong chum ta ro,”
ati u na.
41 Hantin dēn han chāizūng alian ngāi um nisela dān mīnchū ngāi le pātar ngāi bila maniēro athō u na.
42 Amānīn:
“Mi tei chu amandama,
ama aninga chu andam thei mak hile!
Ama chu Israel ngāi Rēng kēng hale,
atun kros āta hong chum ta rase,
hatuka koinīn iam inti.
43 Ama chu Pathian a iam kēng do,
ama ha ei dōn aniten,
atun hong mandam ta rase.
Asik chu amān:
‘Pathian Nāi Pasal kēng ka ni,’
anti hale,”
ati u na.
44 Hava han ama bila krosa antār misuam ngāiin um havan tin dēn han maniēro athō u na.
Isua athi
45 Hankēng sūn anchim lena dār anthum ten pei ramual pumpui ahong azīng khapa.
46 Hatuka dār anthum ten āta chu Isua he anring sabaka ankhēka:
“Eli,
Eli,
lama sabakthani?”
(Sām 22:1 )
Hava tina chu,
“Ka Pathian,
Ka Pathian,
ichang mo nei na māk?”
ati na.
47 Havana anding ngāi bila senkhatin hava chong ei ril ha ariat u na:
“Hiva mi hi Elija rang kēng ei pāi sole!”
ati u na.
48 Hatuka abil u na mi khat atān lena isponz avalāka,
hava lehan zu athūr sabaka aphūma sunrola amakhopa anēk ranga avapēka.
49 Hatuka atei aleia om ngāiin:
“Om pei di rase,
en di rei.
Ama āsan ranga Elija mo ahong viving,”
ati u na.
50 Hatuka Isua chu hē anring sabaka ankhēk rēt le aratha amathān zeia.
51 Hatuka enta,
Pathian biak ina puan anzār chu achung len āta athuai ten pei anphela bong anni changa anthēta.
Hatuka nīnu ahonga lungpui ngāi dōra akika.
52 Thānkhur ngāi dōra anlonga,
hatuka ain sua mīnthiang ngāi tamtak taksa ahong anthui rēta.
53 Hava ngāi ha ama anthui rēt suale thānkhur āta ahong asuak u na khopui ānthianga avalūt u na.
Hatuka mi tamtakin amu u na.
54 Hatuka sipai razaruaipu le abila Isua angāk ngāiin nīnu hong le hong atei zazāt mo rui asuak ngāi amu u na,
rathatāk alianpa ansak u na:
“Taktataka,
hiva nāi hi Pathian Nāi Pasal ani zei,”
ati u na.
55 Hava han nupang ātampa rālkhat āta alei thir ani u na.
Hava ngāi ha Isua haso le dorbo andom tira Galili ram len āta anūk ahong azī ani u na.
56 Hava ngāi bila han Magdalini Mari,
Jakob le Jose ngāi anu Mari le Zabedai anāi pasal ngāi anu ānchel ani u na.
Isua thāna anphūm
Jn.19:38 -42
57 Hatuka nikhua ahong abui le Arimathāi khuana mi āneipa khat araming Joseph chu ahonga.
Ama len um nisela Isua zolāi ani na.
58 Ama ha Pilat kōma asēna Isua ruak chu avazonga.
Hatuka Pilatin ruak chu apēk ranga chong apēka.
59 Hatuka chu Josephin ruak chu avalāka puan annāl thiang lehan athuama.
60 Hatuka ama ranga thānkhur athar,
lung bila ei khuara han avasiaka.
Hatuka thānkhur makot taka lung alianpa khat amaluaia ei māk ani na.
61 Tenchu Magdalini Mari le hanūk Mari atei chu thān tiang māi asona ei ansut u ani na.
Thānkhur arung ngāi
62 Hatuka nangtuk anga nikhuana,
Ansinna pānta nikhua azomthap len ani na.
Chāizūng alian ngāi le Pharisi ngāi chu alom u na Pilat akōma ahong anchun u na.
63 Hava ngāiin:
“Ka pu,
hava mi ahuang chachakpu ha adam lāi han,
nīnthum suale anthui rēt ka ti,
ei ti ha na la riattit.
64 Hasika han athānkhur hi nīnthum pei chu asa dima arung ranga chong na pe ro.
Hano tenchu azolāi ngāi zāna ahong maruk viaka achōi thei u.
Hatuka mipui vāntāng kōma:
‘Ama chu athi ngāi bil āta anthui rēt zei,’
ti unti.
Hasika han nūka nei machāi hi māna nei machāi nēka āsiat riam rang kēng,”
ati na avaril u na.
65 Pilatin amāni kōma:
“Nangnīn mi arung ngāi na dōn u hale,
hava ngāi ha mansē
u tān nei thōthei u anga asa dima vamanrung u ro,”
ati na.
66 Hatuka asē u na lung chunga andangna sīlmor azēm u na hatuka hava han arung ngāi āsiak u na thān chu asa dima arung u ani na.