Isuan mipui asāng manli avāi
Mt.15:32 -39
8
1 Hatuka hava nikhua lāi han mipui ātampa athara anchun rēt u na.
Hava ngāi hān itē asāk rang ei dōn u nōk sika azolāi ngāi chu akōm akuia arila:
2 “Mipui ngāi hi aviana le nīnthum pei ani zei ka bila ei om u.
Amānīn itē asāk rang ei dōn u nōk sika hin achān ka malung apōng sabak.
3 Hanūk anchām chunga ina ka mansē u ten lampuia anvuai unti.
Asik chu senkhat chu mun alapa nāta ahong u kēng,”
ati na.
4 Azolāi ngāiin amasanga:
“Tu mo hiva mibuina rama hin hovana mo ruti avalāka amāni ānkhop thei rang?”
ati u na.
5 Hatuka amān akōm u na:
“Ruti ituk mo nei dōn u?”
ati na arakela.
Amānīn:
“Ruti sari chu na dōn,”
ati u na.
6 Hatuka Isuan mipui ngāi chu phila ansut ranga chong apēka.
Hatuka ruti sari chu alāka rāisān chong aril suale akhiaka.
Hatuka mipui ngāi kōma āsem ranga azolāi ngāi kuta apēka.
Hatuka amānīn mipui ngāi matona asem u na.
7 Hanūk chu ngā sīnte ngāi um alakte adōn u na.
Amān rāisān chong aril suale hava ngā hām mipui ngāi matona āsem ranga chong apēka.
8 Hatuka alom u na asāk u na akhop kiar u.
Asāk sua u na adi anōite ngāi amaniang ha ralei sari pei ala bita.
9 Hava mi ngāi ha mi asāng manli tāng ani u na.
Hatuka amān aman sē kiara.
10 Hatuka hava suale azolāi ngāi le ile rakuanga avachuang lena Dalmanutha biala asē u na.
11 Hatuka chu Pharisi ngāi ahong u na ahong ankhalpui u na.
Ama ansinna ranga,
anvān āta sinsiana khat amu rang azong u na.
12 Tenchu ama chu amalung ana ariata phūkpui alāka,
akōm u na:
“Ichang mo atun tak huna hiva khūka mi ngāiin sinsiana ei ravān u?
Chong tataka kei na ti ani u zei,
atun tak huna hiva khūka mi ngāi kōma itē sinsiana reng anpēk nō ni,”
ati na.
13 Hatuka amāni amāka rakuanga avachuang rēta son tiang varāla asēna.
Pharisi ngāi le Herod chol rui
Mt.16:5 -12
14 Zolāi ngāiin ruti achōi rang amangil u na,
rakuanga han abil u na ruti khat dak rong nōk chu atei itē dōn u mak.
15 Hatuka amān akōm u na:
“Anrēng u ro,
Pharisi ngāi chol le Herod achol āta anrung u ro,”
ati na chong apēka.
16 Hatuka amāni le amāni anril u na:
“Na bila ruti nei dōn nōk sika kukui mo tāk?”
ati na.
17 Hatuka amāni ei anril u ariata Isuan akōm u na:
“Ichanga mo ruti dōn mak me ati na nei ankel u?
Atun tena la mandona la riat thei u mak che mo?
Atun ten na malung u alān khirtit mo ala ni?
18 Mit na dōn u nām la mu thei u mak che mo?
Kuar na dōn u nām la rangāi thei u mak che mo?
Hanūk chu na malung u nām la chui u mak mo?
19 Miring asāngrangā ngāi kōma ruti rangā ka sem lāi han amaniang ralei abit ituk mo nei rūt u ha?”
ati na.
Hatuka amānīn:
“Kok sōmleianni.”
ati u na.
20 Hanūk chu:
“Miring asāngmanli ngāi kōma ruti sari ka sem lāi han amaniang ralei abit ituk mo nei rūt u ha?”
ati na arakel rēta.
Amānīn:
“Ralei sari,”
ati na amasang u na.
21 Hatuka amān akōm u na:
“Hanum nisela atun tena la riat thei u mak che mo?”
ati na.
Betsaida khuana mit
achō khat ei damna
22 Hava suale Betsaida khuana ahong atunga.
Hatuka mīn akōma mit achō khat ahong ruai u na.
Amān ei tōnna ranga amathēm u na.
23 Hatuka amān mit achō kut chu asūra khua nāta asuakpuia.
Hatuka amit amachil pena achunga akut asiaka akōma:
“Hong mo nei mu mo a om?”
ati na arakela.
24 Hatuka hava mit achōpu ha chung tiang atanga:
“Monisi ngāi ka mu.
Amāni chu thingkung anga kal achōia āchei ka mu,”
ati na.
25 Hanūk athara amita akut āsiak rēt le chu hava nāi ha aman en chiana.
Hatuka amit ahong avār pe vanga aloma anthiang vanga amu thei zeia.
26 Hatuka Isuan:
“Khuana valūt nō ro,
hanūk chu tutē kōmām ril nō ro,”
ati na a ina amansēna.
Peterin Isua ruia ei apuang
27 Hatuka Isua le azolāi ngāi chu asuak u na Kaisari-Philippi khopui ravēla khua ngāia asē u na.
Lampuia azolāi ngāi kōma:
“Mīn koi hi tu mo ei na ti u?”
ati na arakela.
28 Hatuka amānīn:
“Mi senkhatin Baptispu Johan ana ti u.
Senkhatin Elija ana ti u.
Hanūk mi tei senkhat rētin,
deari ngāi bila angkhat ani,
ana ti u,”
ati na aril u na.
29 Hankēng Isua akōm u na:
“Hanle,
nangnīn koi hi tu mo nei na ti u?”
ati na arakel rēta.
Hatuka Peterin:
“Nang chu Krista,
na ni,”
ati na amasanga.
Krista ti na chu sariak ānthipu ti na ani na.
30 Hatuka Isuan amāni rang ha tutē kōma ama rui aril ranga chong akhār thaka.
Isuan ama ei thi
rang rui aphāmān aril
31 Hatuka amāni kōma amanchū rēta:
“Koi Miring Nāi Pasal hi antakna tam kei la tiar rang ani na.
Hatuka Jihudi pātar ngāi,
chāizūng ngāi le dān minchū ngāiin ei la peia,
na la that unti.
Tenchu nīnthum suale anthui rēt ka ti,”
ati na.
32 Amān hiva chong ngāi hi anthiang vanga arila.
Tenchu Peterin abinga aruaia Isua avangōna.
33 Hatuka Isua anhoia azolāi ngāi tiang a ena Peter kōma:
“Soitān,
ka maton āta ankhāi ro,
Pathian mandon chōi luia,
miring mandon kēng nei chōi hile,”
ati na angōna.
34 Hatuka mipui chu azolāi ngāi lehan akuia akōm u na:
“Tukareng ka nūk ana honga zī zōt chu ama aninga anngil rase.
Hatuka akros raputa ka nūk na hong zī rase.
35 Tukareng ama ei damna anzōk zōt chu,
machān inti.
Hanūk chu tukareng koi ka sika le thang ahui sika ama ei damna anchān chu mazok inti.
36 Mīn maniapūr pumpui hi ata manchang sela tenchu ei damna machān sela aranga imo ei nemna?
37 Mīn ama ei damna rathūla imo aman ei pēk thei rang?
38 Tukareng hiva khūka uiare ngāi le mi salui ngāi kāra,
koi le ka chong sika anānzakpui chu,
koi Miring Nāi Pasal um vānpalāi ānthiang ngāi bila ka Pa ei anlianna le ka hong tika koi um amāni ha anzakpui ka ti,”
ati na.