Ānthiang le ānnim rui
Mt.15:1 -20
7
1 Hatuka Pharisi le dān mīnchū ngāi senkhat Jerusalem khopui āta ahong ngāi ha ama kōma ahong anchun u na.
2 Hatuka amāni ngāi hān azolāi ngāi bila senkhatin annim chunga bu nēka amu u na.
Hava ti na chu kut rasūk luia ānēk āsāk ani na.
Hasik han Pharisi ngāiin bāi ei mankham u.
3 Asik chu Pharisi le Jihudi ngāi alom u na pipu om dān marua ei sūrtit u sika han,
akut pumpui rasūk luia bu nēk u ngāi mak.
4 Hanūk chu bazār āta ahong sua u le tī anbual luia bu nēk u ngāi mak.
Hanūk chu pipu om dān marua atei atei ātampa ei la zī u a oma,
hava ngāi ha ani zei khuri,
tīkola,
māirāng,
ansutna lukham ansūk ti na ani na.
5 Hasika han hava Pharisi ngāi le dān mīnchū ngāi hān Isua kōma:
“Ichang mo na zolāi ngāiin pipu om dān marua ngāi anga kal ei chōi u nōk hanūk chu kut rasūk luia bu ei nēk u?”
ati na arakel u na.
6 Tenchu Isuan amasanga:
“Nangni phuzekām ngāi,
deari Isaian nangni ruia chong alei ril hi ādik kēng.
Asik chu hintin hin anziaka:
‘Hiva mi ngāi hin amūr u le
lalchi ana thō u na.
Tenchu amalung u chu ka
kōm āta ankār kēng.
7 Hanūk chu ami manchū u na
ngāi chu miring manchū
nāta kēng ei manchū u.
Hasika han,
amānīn akoronga
kēng ei na biak u,’ ”
(Isa.29:13 )
ati na.
8 “Nangnīn Pathian chongpēk amāka miringin ei sin pipu om dān ngāi ha nei sūrtit u.
Asik chu nangnīn tīkola,
khuri ngāi le atei atei ngāi nei rasūk u chachak,”
ati na.
9 Hanūk chu ama dēnin akōm u na:
“Nangnīn pipu om dān ngāi ha nei sūrtit thei u na ranga Pathian chongpēk akhāi chu āsa ati na nei riat u,”
ati na.
10 Asik chu Mosīn:
‘‘‘Na nu le na pa lalchi thō ro,’
ati na.
Hanūk chu:
‘Tukareng anu mo apa mo āsiat
aril tak chu,
hava nāi ha thi
rase,’
ati na.
11 Tenchu nangnīn nei ti u:
‘Mīn anu mo apa kōma nangni ranga sanna ka kōm āta nei man u rang ha ‘Korban’ kēng ani zei,’
nei ti u chachak.
Hava ti na chu ‘Pathian ranga ānpēk’ kēng ani zei ti na ani na.
12 Nangnīn anu rang mo apa rang mo itē sanna apēk ranga phal u mak chena.
13 Havan tin han pipu om dān marua nei hong manlōn tir u na han Pathian chong chu ei nemna buia nei sin u.
Hanūk chu havan tin han rui ateitei ngāi um nei thō u ala tam,’ ”
ati na.
14 Hanūk chu athara mipui dōra apāia akōm u na:
“Na lom u na ka chong rangāi chip u tānla asa dima riat u ro.
15 Apang āta miring sūngkuana alūtin miring ei mannim itē om mak.
Tenchu miring sūngkua nāta asuak ha kēng ama chu ei mannim ani na.
16 Tukareng anngāina kuar adōn takin rangāi rase!”
ati na.
17 Hatuka mipui ngāi chu amathāna ina ahong alūt le azolāi ngāiin ankhīna rui ha arakel u na.
18 Amān:
“Nangnīm hadōr pei mo riatna buia nei om ani u zei?
Apang āta miring sūngkuana alūtin itē mi ei mannim om mak ti hi la riat u mak che mo?
19 Asik chu apang āta miring sūngkuana alūt chu amalung sūnga alūt ni mak.
Tenchu avonsūnga kēng ei valūta apin tianga ei suak.
Hivan tin chong ei rila hin asāk anēk rua dōra chu amanthiang zit ti na ani na,”
ati na.
20 Hanūk chu ama dēnin:
“Miring sūngkua nāta ahong asuak hān miring ei mannim chachak ani na.
21 Asik chu miring sūngkua nāta miring malung sūng āta asuak chu hiva ngāi hi ani,
mandon āsia,
uiare,
rual adōn,
mithat.
22 Marusa,
huat anhamna aphām,
omsa nōk tin āthō zōt,
anhuangna,
hurna tin rēng ādōn,
khāmaret,
chong sanōk aril,
chongpāk ansal,
amōna ngāi hi ani na.
23 Aloma hiva āsiat ngāi dōra hi miring sūngkua nāta asuaka miring ei mannim chachak ani,”
ati na.
Surophoiniki
nupang khat iamna
Mt.15:21 -28
24 Hatuka chu havan āta anthuia,
Tura le Sidon biala rama asēna.
Hava suale in khata avalūta.
Tutēn ama ei riat rang zōt mak,
hanum nisela anthup thei mak.
25 Hatuka chu nupang khatin athang ariat le chu ahonga ake kunga ahong anboka.
Hava nupang ha anāi nupangte khat raluain ei sūr pe ani na.
26 Hava nupang ha Grik chong amang mi ani na.
Anam chu Surophoiniki nam ani na.
Anāi nupangte sūng āta raluai ānot pe ranga akōm ahong mathēma.
27 Isuan akōma:
“Nāi ngāiin khop mānsa di rase.
Asik chu nāi ngāi kōm āta aruti sāk alāka ui ngāi kōma apēk chu dik mak,”
ati pe na.
28 Tenchu amān akōma:
“Ani chu ani,
Tenchu Puma,
ui ngāi um chu nāi ngāi ei sāk u na adi anōi tebul thuaia āchul ngāi chu alei sāk u chachak dō,”
ati na amasanga.
29 Hatuka amān akōma:
“Hiva chong nei ti sika hin sē pei ta ro.
Na nāi nupangte sūng āta raluai chu asuak sua zei,”
ati na.
30 Hatuka hava nupang ha a ina avatung le anāi nupangte zamuna aleia zāla avamuna.
Hanūk chu akōm āta raluai um asuak sua zeia.
Kuar asēt khat le
chong theilui khat ei damna
31 Hatuka chu Tura le Sidon ram amāk rēta Dekapoli ram tiang āta Galili tīpuia ahong asuaka.
32 Hava muna han mi ngāiin akuar asēt le chong thei sadim lui mi khat ahong ruai u na,
hava nāi chunga akut abang ranga amathēm u na.
33 Hatuka mipui bil āta ama chu abingtena aruia,
akut chal le akuar aninīn akherek pena.
Amachila amalei atōn pena.
34 Hatuka chungvān a ena phūkpui alāk suale akōma:
“Epphatha,”
ati na.
Hava ti na chu “Hong vār ta ro,”
ti na ani na.
35 Hatuka chu anlāiseka akuar chu ahong avār pena,
amalei sīngansana anthiang vanga chong ahong ril len theia.
36 Hatuka amān akōm u na:
“Tutē kōma ril u nō ro,”
ati na chong ei khār ani na.
Tenchu ril u nō ro ati na ei khār ual ha achālaka tāng ahāi riam u na.
37 Hatuka mi ngāi chu achālaka aboi adong u na:
“Amān alom peia ei thō dōra āsa kiar kēng.
Amān akuar asēt ngāi anngāina ranak apeka,
chong thei lui ngāi chong theina ranak apēk,”
ati
u na.