Lalchi man lui deari
6
1 Hatuka hava mun āta asuaka ei omna khua chu ahong atunga.
Hanūk chu azolāi ngāiin azī tir u na.
2 Hatuka Pōngansa nikhua ahong asuaka ankhōmna ina avamanchūna,
achong ariat ngāi dōra aboi adong u na.
Hatuka:
“Hiva mi hin hiva chong ngāi hi hovan āta ei riat ngal mo hi?
Hiva mi kōma hianna anpēk hi hong zāt hianna ngal mo hi?
Hanūk chu akutin hi dōr peia tichang abui sin ei thō hi hovan āta ngal mo?
3 Hiva mi hi thingthiampu ha ni mak mo?
Hanūk chu Mari nāi pasal ha ni mak mo?
Jakob Jose,
Juda le Simon ngāi aparual u ni mak mo?
Asarnu ngāi um hivan koini bila om ni u mak mo?”
ati u na.
Havan tin han achunga amalung om hui u mak.
4 Hatuka Isuan akōm u na:
“Deari chu akhua,
aunāi ngāi le ain ngāi rong nōk chu lalchi man luia om ngāi mak,”
ati na.
5 Hatuka chu alakte ana ngāi tak chunga akut abānga ei mandam rong nōk chu hava muna han tichang abui sin itē thōthei lāi mak.
6 Hanūk chu ei iam thei u nōk sika atina chang re mak.
Isuan Sōmleianni ngāi atīr
Hatuka mi amanchū tira khua tin pei avalūta.
7 Hatuka chu Sōmleianni ngāi chu apāia,
anni senga atīra.
Hanūk chu ratha annim ngāi chunga ningneina dōn ranga chong apēka.
8 Hanūk chu ei ānzin u na ranga,
sunrol khatdak rong nōk anten chu atei itē ruti,
marsa,
akōng u na sum zuli ngal achōi nōkna ranga chong apēka.
9 Hanūk chu kekok chu abun thei u na,
tenchu kultāi rabo chu atiang nō rase,
ati na.
10 Hatuka ama dēnin akōm u na:
“Nei valūt u na in taka han om chian u ro,
hava mun na māk u māseng chu.
11 Hanūk chu nei sē u na khua takin ana lei pom u nōk anten,
na chong alei rangāi zōt u nōk anten,
na māk u rang tika amāni riatna ranga na ke philvut ha athinga māk u ro.
Chong tataka kei na ril ani u zei,
ruiril nikhua tika chu Sodom le Gomora khua nēka hava khua ha adūk na ual inti,”
ati na.
12 Hatuka asuaka asē u na mīn amalung ei mansīr theina ranga chong avaril u na.
13 Hatuka raluai ātampa arazūl u na.
Hanūk chu dam lui ātampām sariak akhuana amandam u na.
Baptispu Johan alu antan rui
14 Hatuka hava ngāi dōra ha rēng Herodān alei riata.
Asik chu Isua raming ha anthang sabak ani zeia.
Hasik han amān:
“Baptispu Johan kēng athi nāta anthui rēt ani zei,
hasik han kēng amān hiva tichang abui sin alianpa ngāi ei thōthei,”
ati na.
15 Mi senkhtin chu:
“Elija kēng,”
ati u na.
Hanūk mi senkhat rētin:
“Deari khat kēng nīnti.
Hanōk ten deari ngāi bila amām angkhat nīnti,”
ati u na.
16 Tenchu Herodān hava ha ariat le chu:
“Alu kei mantan sua Johan kēng ahong anthui rēt ni zei ni!”
ati na.
17 Asik chu Herod ngētin anāipa Philip anungāk Herodi sika Johan ha ei vamansūra lung ina amankhuma.
Asik chu anungāk ranga Herodi ha ei lāk ani na.
18 Johanin Herod akōma:
“Na nāipa nungāk nei lāk hi dān anthiang ni mak,”
ati pena.
19 Hasika han Herodi chu Johan achunga atak asina that ranga avala.
Hanum nisela thōthei mak.
20 Herodān Johan chu mi dik le mīnthiang ani ti ei riat sika āchīna.
Hasik han ama chu arungna athōtita.
Amān Johan achong arangāi le hong zazāt mo ei thō chachak ngāi ha amalunga amandona,
hatuka rāisān hiaia arangāi chachaka.
21 Ni khat chu hun anhēr ahong asuaka.
Herod ei anzirna nikhua han khohui amanga arama ami lian ngāi,
sipai ulian ngāi le Galili rama mi lian ngāi ranga zānbu nēkna khat amansūka.
22 Hatuka Herodi nāi nupang chu ahong alūta alāma.
Hankēng Herod le abu nēkpui ngāi arāi amansān sabaka.
Hatuka rēngin nupangte kōma:
“Nei zōt tak pei na zong ro,
na pe ka ting,”
ati na.
23 Hatuka akōma anchang sabaka khomāk ansama:
“Nei na zong tak pei chu,
ka ram anbāk ngal ni rase na pe ka ting,”
ati na.
24 Hatuka ama chu asuaka anu kōma asēna:
“Imo kei zong rang?”
ati na avarakela.
Anu hān:
“Baptispu Johan alu zong ro,”
alei ti na.
25 Hatuka ama chu anrappana rēng kōma avalūt lena:
“Khēnga Baptispu Johan alu atun len nei na pēk rang ka zōt,”
ati na avazonga.
26 Hatuka rēng chu amalung ana sabak pena.
Hanum nisela khomāk ei ansam sika le abu nēkpui ngāi sika nupangte chong chu nial thei lāi mak.
27 Hasika han rēngin anrarapa mitanpu khat atīra Johan alu avalāk ranga chong apēka.
Hatuka ama chu asēna lung ina han alu avatana.
28 Hauka alu chu khēnga ahong chōia,
nupangte kōma ahong pēka.
Hatuka nupangte hān anu kōma avapēka.
29 Hava ha azolāi ngāiin ariat u le aruak chu avamalom u na thāna avaphūm u.
Isuan mipui asāng rangā avāi
30 Hatuka zolāi ngāi chu Isua kōma ahong ankhōm u na,
aloma asin thō u ngāi le ei manchū u na ngāi dōra akōma aril zit u na.
31 Hatuka chu mi tampa āsē zut le āhong zut sika amāni chu bu nēkna hun ngal dōn thei u lāi mak.
Hasik han azolāi ngāi kōma:
“Nangni lim mibuina muna adāi riamnana hong u tān pōng hong ansa u ta ro,”
ati na.
32 Hasika han amāni chu rakuanga achuang u na mibuina mun adāi riamnana asē u na.
33 Tenchu amāni ei sē u ha mi tampān amu rēta.
Hanūk mi tampān amāni chu ei riat u sika,
khopui dōr āta hava han ke na atān u na amāni matona alei vasuak u.
Hatuka Isua kōma ahong anbūm u na.
34 Hatuka Isua rakuang āta ahong achum le mipui ātampa ahong muna.
Asik chu aruai abui bera ang ei ni u sika amalung apōng sabaka ariata.
Hatuka amāni kōma chong ātampa lehan amanchū lena.
35 Hatuka chu nikhua ahong abui rang ani zeia,
azolāi ngāi chu akōma ahong u na:
“Hiva mun hi mibuina ram ani na,
Hanūk chu nikhuam abui rang ani zei.
36 Hiva ngāi hi na kōl na kianga khote le khopui ateteia asēna anēk rua ei varachōk thei u na ranga mansē ta ro.
Asik chu anēk rua abui u kēng,”
ati u na.
37 Tenchu amān akōm u na:
“Nangnīn anēk rang pe u ro,”
ati na amasanga.
Hatuka amānīn akōma:
“Koinīn mo denari razānni bak manle ruti nei varachōka anēk ranga āpēk rang?”
ati u na.
38 Hatuka amān akōm u na:
“Ruti ituk mo nei dōn u?
Sē u tānla vaen u ta,”
ati na.
Hatuka asēna avamu u na akōma:
“Ruti rangā le nga anni,”
ati u na.
39 Hatuka amān alom u na chiak aring chunga anchun loloka ansut kiar u ranga azolāi ngāi kōma chong apēka.
40 Hatuka razakhat razakhata,
sōmrangā sōmrangāna antāng ansut u na.
41 Hatuka amān ruti rangā le ngā anni alāka,
chungvān a ena bōr apēka.
Hatuka ruti chu akhiaka,
mipui matona āsem ranga azolāi ngāi kōma apēka.
Hanūk chu ngā anni hām alom u ranga asema.
42 Alom u na anēka akhop kiar
44 Ruti asāk ngāi dōra pasal duai asāngrangā dām ani u na.
Isua tī chunga kal achōi
45 Hatuka amān mipui amathāna ansenpui rang toto
han sontiang varāla Betsaida khuana ama matona alei asē u ranga azolāi ngāi chu rakuanga amanchuang lena.
46 Hatuka amān anthānpui kiar suale bōr azong ranga muala avakala.
47 Hatuka khului ani lūt ahong azīng le chu rakuang ha tīpui malāi taka a om a.
Ama
chu atheia tāngkōla a om a.
48 Hatuka zolāi ngāiin antak sabaka rakuang ei vei u ha amu na.
Asik chu thīnthīn ei duina tianga om ani u na.
Hasik han khua ahong ansāl rang vita han tīpui malāia ke na kal achōia amāni ahong pana.
Amāni ākhēl ranga ahong thō na.
49 Tenchu tī malāia kal ei hong chōi alei mu u na,
ralīm kukui mo ati na ankhēk u na.
50 Asik chu alom u na ei mu u han achālaka aratha ta sabak u na.
Tenchu amān akōm u na:
“Anngām u ro,
koi kēng ka ni hile.
Āchi u nō ro,”
ati pe lena.
51 Hankēng abil u na rakuanga avakal lena,
hanūk chu thīnthīm among riaia.
Hasik han achālaka aboi adong u na,
atina chang re u mak.
52 Asik chu ruti rui ha riattit thei u mak,
asik chu amalung u anchang pe ani na.
53 Hatuka sontiang varāl ankān suana avasuak u le Genesaret ram avasuak u na,
tīpui rakhama rakuang chu athung u na.
54 Hatuka rakuang āta Isua le azolāi ngāi achum sua phing u le tāng kōla mi dōrān ama alei riat zit len u na.
55 Ama amu ngāi dōra chu hava rama atān susup u na,
ama a om ati na ei riat u na mun tak peia ana ngāi azamun le arazōn u na ei ruai u ani na.
56 Hatuka khote,
khopui le phāi rama mo ama ei sē na tak peia bazār muna ana ngāi chu amanzāl u chachaka.
Hava ngāi hān apuan mērte lua chu ei tōn thei u na ranga amathēm u na.
Hatuka ama atōn tak pei chu ahong adam len u na.