Nungāk ansenpui rui
10
1 Hava suale Isua hava mun ha amāka Judia ram le Jordan dung varāla asēna.
Hava han mipui ātampa akōma ahong rēt u na,
amān abalama ei thō babang anga mi ngāi amanchū rēta.
2 Pharisi bila senkhat ahong u na ama ansinna ranga arakel u na:
“Pasalin anungāk ei ansenpui rang hi dān anthiang ani mo?”
ati na.
3 Tenchu Isuan akōm u na:
“Mosīn hong zāt mo chong ei na pēk u?”
ati na arakela.
4 Amānīn:
“Mosīn chu ansenna lekha maziaka anungāk ansenpui ranga phalna ana pēk,”
ati na amasang u na.
5 Isuan akōm u na:
“Na malung ei ankhir u sika Mosīn hava chong ha nangni ranga ei maziak kēng,”
ati na amasanga.
6 Tenchu aphut āta chu:
“Pathianin,
nupang le pasal ei
sin ani na.
(Anp.1:27 )
7 Hava sik han,
pasalin anu le
apa māka anungāk tianga
“Amāni anni ha taksa
pumkhat chang unti,
anni
ni u lāi nō ni.”
(Anp.2:24 )
Tenchu taksa pumkhat kēng ani u zei.
9 Hasik han Pathianin ei manzom chu miringin mansen nō rase,”
ati na.
10 Hatuka ina avaom rēt u lāi han azolāi ngāiin hava ruia arakel u na.
11 Amān akōm u na:
“Tukareng anungāk ansenpuia nupang atei avalāk ten,
anungāk chunga uiare ani na.
12 Hanūk chu nupangin um aruathar ansenpuia pasal atei avalāk ten aruathar chunga uiare kēng,”
ati na.
Isua le nāipangte ngāi
13 Hatuka mi ngāiin nāipangte ngāi ha amān ei tōnna ranga akōma ahong ruai u na.
Tenchu azolāi ngāiin bāi alei mankham u na.
14 Isuan hava ha amuna amalunga atak asina akōm u na:
“Nāipangte ngāi ka kōma hong ruai u ro,
khār u nō ro.
Asik chu Pathian ram chu hiva anga nāipangte ngāi ta rang ngal kēng.
15 Taktaka kei na ti ani u zei,
tukareng hiva nāipangte ngāi anga Pathian ram pom lui chu hava han lūt pial thei nō ni,”
ati na.
16 Hatuka nāipangte ngāi chu akut le apoma,
achung u na akut asiaka bōrsāng apēka.
Ruathar anchongpa rui
17 Hatuka Isua asuak ranga lampuia asē lāi han,
mi khat ahong atāna amatona mankhūk abila akōma:
“Mīnchūpu Āsa,
tāituan damna kei chang thei na ranga imo kei thō ranga ānāng?”
ati na arakela.
18 Isuan akōma:
“Ichang mo āsa nei na ti?
Āsa angkhat dak a om a,
ama chu Pathian ani na.
Ama rong nōk chu tutē Āsa om mak.
19 Pathian chongpēk ngāi dōra na riat kiar mo:
‘Uire nō ro,
Mi that nō ro,
Marusa nō ro,
Milak chong
arila ariatpui chang nō ro,
Mi huang nō ro,
Na nu le na pa lalchi thō ro,’
ti ngāi ha,”
ati na.
20 Hatuka hava mi hān akōma:
“Mīnchūpu,
hava ngāi dōra chu nāipangtete ka ni lāi āta kei tel kiar kēng,”
ati na.
21 Hatuka Isuan ama tiang anhoia lungkham amuna akōma:
“Nei mansam khat ala om.
Hasika han sē tānla na nei na nung ngāi dōra vazuar tān anriang ngāi kōma vasem ro.
Hankēng anvāna neinung nei chang rang.
Hatuka hong tānla kros raputa na hong zī ro,”
ati na.
22 Hava chong ha ariatle amēl anngūi khapa,
amalung ana chunga asuaka asēna.
Asik chu hava mi ha achālaka ānchongpa ani na.
23 Hatuka Isuan akōl akiang dām anhoia azolāi ngāi kōma:
“Ānchong ngāi Pathian rama ei lūt u rang hi ituk mo ei antak hi!”
ati na.
24 Hiva chong ei ril sika azolāi ngāi chu achālaka aboi adong u na.
Tenchu Isuan akōm u na:
“Ka nāi ngāi!
Neinung chunga anngamna ādōn ngāiin Pathian rama ei lūt u rang chu antak rang ba!
25 Ānchong ngāi Pathian rama alūt thei u nēk ten simphuai kuana mākingkang ei lūt thei rang bei ual inti,”
ati na amasanga.
26 Hatuka azolāi ngāi chu atina achang re u mak:
“Hantin han aniten tu ngal mo azōk thei rang ani zei?”
anti u na.
27 Tenchu Isua amāni tiang anhoia:
“Miring ranga hava ha ni thei lui ani na.
Tenchu Pathian ranga chu han tin han ni mak.
Asik chu Pathian ranga aloma ani thei zit kēng,”
ati na.
28 Hatuka Peterin akōma:
“Enta,
koinīm aloma na māk zita nang na nūk na hong zī zei,”
ati na.
29 Isuan amasanga:
“Tukareng koi ka sika le thang ahui sika in lui mo,
parual sarzuar mo,
nu pa mo,
sanāi rati mo,
phāi lung mo,
nungāk sanāi mo amāk chu.
30 Atun taka hiva huna damsūng nikhua ngēta hin mun raza zotor in lui,
parual sarzuar,
nu,
sanāi rati phāi lung,
hanūk hava ngāi bibila ansinsakna le hun ala hong rang tika tāituan damna aman nōk rang tutē om nō ni.
31 Tenchu mān anta ngāi bila ātam riai chu nūk anta untia,
nūk anta ngāi mān anta unti,”
ati na.
Isuan ama ei thī rang rui aphāmān alei ril voi anthumna
32 Hatuka Jerusalem khopui apan ranga lampuia asē u lāi han Isua chu amāni matona asēna.
Azolāi ngāi chu andona anngūi nget u na.
Hatuka anūk azī
ngāi um arathāta chip u na.
Hatuka zolāi sōmleianni ngāi ha abingtena aruaia atak chunga ahong atung rang ngāi dōra akōm u na aril rēta.
33 Asik chu amān:
“En u ro,
Jerusalem khopui apan rang kēng na ni zei.
Koi Miring Nāi Pasal hi chāizūng ulian ngāi le dān mīnchū ngāi kuta anbetōk rang ka ni zei.
Hanūk chu thīna rang ten peia āsia na manlō untia,
Jentail ngāi kuta na betōk unti.
34 Hanūk chu hava ngāi hān mani ēro na thō untia.
Ka chunga machil pei unti,
na zēm untia.
Hatuka nīnthum nikhuana anthui rēt ka ti,”
ati na.
Isua kōma Jakob le
Johanin ei mathēmna rui
Mt.20:20 -28
35 Hatuka chu Zabedai anāi pasal Jakob le Johan chu Isua kōma ahong u na:
“Mīnchūpu,
kōnīn nei na zong tak hi ana thō pe ranga nei na mathēm zōt,”
ati u na.
36 Amān akōm u na:
“Hong mo kei na thō pe u ranga nei zong u?”
ati na arakela.
37 Hatuka amānīn akōma:
“Anlianna lehan ruirila na om tika na chang tianga angkhat,
na voi tianga angkhat ansut theina ranga bōrsāng na pe ro,”
ati na amasang u na.
38 Isuan akōm u na:
“Nangnīn nei zong u hi riat u lāi mak che.
Asik chu kei buangna khuri lehin nangnīn buang thei un mo?
Hanūk chu baptisma kei changna baptis lehin baptisma chang thei un mo?”
ati na.
39 Hatuka amānīn:
“Na chang thei,”
ati na amasang u na.
Isuan akōm u na:
“Kei buangna khuri lehin nangnīm buang thei un na ti.
Hanūk chu baptisma kei changna baptis lehin nangnīm baptisma chang thei un na ti.
40 Tenchu ka chang tianga le ka voi tianga ansut theina ningneina aphal ranga chu koi ni makung.
Tenchu amāni ranga hava mun alei ansin sua ngāi kēng achang u rang,”
ati na.
41 Hatuka hava chong ha zolāi sōm ngāiin ariat u na Jakob le Johan achunga atak asi u na.
42 Isuan akōma apāi kiara:
“Nam atei ngāi bila ruirilpu ngāi chu ami ngāi chung kēng ei anlal u.
Hanūk chu aruaitu u ngāi um achung u dēna kēng ningneina ei mang u chachak.
43 Tenchu nangni ngāi bila chu hantin han ni mak.
Tukareng nangni bila alian achang rang azōt chu,
nangni ngāi dorbōndom chang rase.
44 Hanūk chu nangni bila mān anta rang azōt chu,
ama ha mi tin suak chang rase.
45 Asik chu Miring Nāi Pasal um ni sela dorbōndom aman ranga ahong ni mak.
Tenchu mi dorbō andom ranga le mi tin anratan ranga ei damna apēk ranga ahong kēng,”
ati na.
Mit achō Bartimai
amit ei vārna rui
46 Hava suale Jeriko khuana ahong u na.
Jeriko khua nāta azolāi ngāi le mipui asuaka asē u lāi han Timaia anāi pasal Bartimai mit achō khat a om a.
Ama chu lampui kōla ansuta kut alei dōna.
47 Hatuka ama hān “Nazaret Isua kēng” ati na chong ei riat suale ankhēk lena:
“David Nāi Pasal Isua,
ka chunga riangvāi na mu ro,”
ati na.
48 Hatuka mi ātampa hān dāirek ro ati na angō u na.
Hanum nisela ama chu:
“David Nāi Pasal,
ka chunga riangvāi na mu ro,”
ati na ankhēk riama.
49 Hatuka Isua chu andinga:
“Ama ha vapāi u ro,”
ati na.
Hatuka amānīn mit achō ha avapāi u na:
“Na ratha manta nō ro,
anthui ta ro.
Amān ana pāi zei,”
ati u na.
50 Hatkua ama chu atak chunga apuan apeia anthui lena Isua kōma asēna.
51 Isuan akōma:
“Hong mo kei na thō pe ranga nei zōt?
Hong mo nei zong?”
ati na arakela.
Mit achō hān akōma:
“Rabbi,
ka mit ei vāra kei mu thei rang hi kei zōt,”
ati na.
52 Isuan akōma:
“Sē ta ro,
nei iamna sika hin adam na ni zei,”
ati na.
Hatuka amit ahong avār pe lena hanūk chu lampuia Isua anūk azī tir lena.