Zuina lehan Isua
Jerusalem alūt
11
1 Hava suale chu Jerusalem khopui avasuak u rang tiang,
Maruan mual kōla Betphage le Bethani khua kōla ahong u na.
Hatuka azolāi ngāi bila anni atīra.
2 Hatuka:
“Na maton u na khuana son sē u tānla,
sova son na valūt u le sakuarparte khat achunga tutē la chuang ngāi lui anthunga vamu un na ti.
Hava ha vasūt u tān hong chōi u ro.
3 Hatuka mīn:
‘Hava ha ichanga mo nei thō u?’
ana ti u ten,
hiva hi Pumān ei nāng kēng.
Hatuka amān hiva hin dēn hong makhīr len inti,’
ati na ril u ro,”
ati na.
4 Hatuka asē u na lampui sīra suakkhār kōla anthung chu amu u na avasūt u.
5 Hava kōla anding ngāi bila senkhatin:
“Hong zāt rang mo sakurparte ha nei sūt u ha?”
ati na arakel u na.
6 Isuan akōm u na ei ti anga amasang u na,
hatuka hava ngāi hān aman chōi u na.
7 Hatuka sakuarparte chu Isua kōma ahong chōi u le apuan u ngāi achunga aphāna adāp u na.
Hatuka hava chunga Isua achuanga.
8 Hatuka mipui ātampān lampuia apuan u ngāi alei phāna adāp u na.
Senkhatin thing bāk atuka lampuia alei dāp u na.
9 Amatona asē ngāi le anūka azī ngāiin:
“Hosanna!
Puma raminga ahong chu
anpāka om rase.
(Sām 118:25,26 )
10 Ram ahong atung rang,
koini na pa David aram
chu anpāka om rase.
Chungannung khīt kōma
Hosanna,”
ati na ankhēk u na.
11 Isua Jerusalem khopui avalūta Pathian biak ina asēna.
Hatuka asīr apang aloma a en zita.
Tenchu ani bui rang ei ni sika Sōmleianni ngāi aruāia Bethani khuana asē u na.
Isuan Theichang
kung khomāk asam rui
Mt.21:18 -19
12 Hanūk rēta zīngkhua vāra Bethani khua nāta ahong asuak
u na Isua avon anchāma.
13 Hatuka rālkhat āta theichang kung khat abua kopbub amu na.
Hava han amara mo om ati na avapana.
Tenchu abua rong nōk chu itē vaman mak,
asik chu theichang anra hun la suak mak.
14 Hatuka Isuan theichang kung chu:
“Atun āta hava pang mīn na mara na sa lāi nō rase,”
ati na.
Amān hava chong ei ti ha azolāi ngāiin ariat u na.
Isuan biak in arathial
15 Hatuka Jerusalem khopui ahong asuk u le Isua chu Pathian biak ina avalūta hava na neinun azuar le anchōk ngāi amasuaka.
Hanūk chu sumru athūl ngāi tebul le pharvali zuar ngāi ansutna mun dōra amalet pe zita.
16 Hanūk chu Pathian biak ina han tutē neinun
“ ‘Ka in chu aloma nam tin
ranga bōrzongna in
kēng ei anti rang,’
ti anziak mak mo?
(Isa.56:7 )
Tenchu nangnīn ‘Misuam ngāi
omna khur,’
nei manchang
u ani zei,”
(Jer.7:11 )
ati na.
18 Hava ha chāizūng ulian ngāi le dān mīnchū ngāiin ariat u na athatna ranga lampui aravān u na.
Tenchu ama ha ei achi u ani na,
asik chu mi ei manchūna ngāi ha mi dōrān aboi aman donga.
19 Hatuka nikhua ahong abui le khopui āta asuaka asē u na.
Theichang kung athēm
Mt.21:21 -22
20 Hanūk zīngkhua vāra hava lampuia ei sē balam u han theichang kung chu abul len āta achār bianga amu u na.
21 Peterin Isua chong amalunga amandona akōma:
“Rabbi,
enta!
theichang kung khomāk nei sam ha achār biang zei,”
ati na.
22 Isuan akōm u na:
“Pathian duai pei iam u ro.
23 Taktaka kei ril ani u zei,
tukareng hiva mualpa rang hi:
‘Anphōi tānla tipuiliana vachul ro,’
ati nān ten amalung sūnga songankharna dōn luia ei ti tak ha ei anthō pe rang ani na.
Asik chu aiam tak kōma ei ti anga anthōnti.
24 Hasika han kei ti ani u zei,
bōrzonga nei zong u tak chu aman sua anga an-iam u ro,
hava ha man lele un nati.
25 Hanūk chu bōr azong ranga nān ding u le angkhat peiin na chunga masial khat pei athō ten madual u ro.
Vāna na Pa um dān nei rakān u na ngāi ei na madual thei u na ranga.
26 Tenchu nangnīm mi na madual u nōk ten,
vāna na Pa um nei masial u ngāi na madual u nō ni,”
ati na.
Isua aningneina ruia ankelna
27 Hatuka chu Jerusalem khopuia ahong asuak rēt u na.
Isua Pathian biak in kholāia achei lāi tak han chāizūng ulian ngāi,
dān mīnchū ngāi,
le pātar ngāi chu akōma ahong u na.
28 Isua kōma:
“Hong zāt ningneina le mo hiva ngāi hi nei thō?
Hanūk chu hiva ngāi thōna ranga tu mo ningneina ana pēk?”
ati na arakel u na.
29 Hatuka Isuan akōm u na:
“Hano ten koi um chong khat na rakel u ka ti,
nangnīn na masang u ro.
Hankēng koi um tu ningneina le mo hiva ngāi hi kei thō,
na ril u ka ting.
30 Johan abaptisma ha anvāna ningneina le mo ole miring ningneina le mo?
Hava ha na masang u ro,”
ati na.
31 Hatuka amāni le amāni ankel u na:
“Anvāna ningneina lehan na ti ten,
amān hanle:
‘Ichanga mo ama nei iam u nōk?’
na ti rēt inti.
32 Hanūk chu miring ningneina lehan ti rēt thei mak me,”
ati u na.
Asik chu mipui āchi u na.
Asik chu mi dōrān Johan chu deari tatak kēng,
ati na ei riat u ani na.
33 Hasika han amānīn Isua kōma:
“Riat mak me,”
ati u na.
Hatuka Isuan:
“Hano ten koi um tu ningneina le mo hiva
ngāi hi kei thō,
na ril u nō ning,”
ati na.