Gerep rahuan anrāk
ngāi lehan ankhīna
12
1 Hatuka chu Isuan akōm u na ankhīna khat chong aril rēta.
“Mi khatin gerep rahuan khat athōna,
hava akōla rakul aphana.
Gerep anchīlna khur khat akhuara,
hatuka chu arungna in ansāngpa khat amansina.
Hava suale gerep rahuan anrāk ngāi kōma apēka ama chu ram ateia asēna.
2 Hatuka mara khamna hun ahong asuak le gerep mara akham ranga gerep rahuan anrāk ngāi kōma asuak ngāi bila mi angkhat atīra.
3 Tenchu hava asuak ha alei sūra azēm u,
hatuka kut koronga alei makhīr u na.
4 Hanūk asuak khat athara atīr rēta.
Amām lung alei dēng u na alu akhuia u na māimōk asaka alei makhīr u na.
5 Hanūk asuak atei khat atīr rēta.
Amām alei that u na.
Hava suale asuak atei ātampa athara atīr rēta.
Tenchu amāni bila asen alei zēm u na,
asen alei thāta apei u na.
6 Atun chu angkhat dak anniang ala om a,
hava ha anāi pasal madit nei salep ani na.
Hatuka ei hek khītnana chu ama hām atīra:
‘Ka nāi pasal lua chu lalchi lei thō u bō ni,’
ti ei mandon ani na.
7 Tenchu rahuan anrāk ngāi ha alei anril u na:
‘Hiva nāi tak hi dōnglua aluak rang ani zei,
hong u ro that u rei.
Hankēng adōnglua rang dōra chu koini na ta ei chang rang,’
ati u na.
8 Hasik han ama chu alei sūr u na alei that u,
hatuka gerep rahuana rakul panga avapei u na.
9 Hanle rahuan pumapa hān hong zāt mo ei thō rang ani zei?
ti u ta.
Ama chu hong intia,
rahuan anrāk ngāi chu hong that zit inti.
Hatuka hava rahuan chu mi tei kuta betōk inti.
10 Pathian Lekhana hiva chong hi pore u mak che mo?
Asik chu hiva hi anziaka:
‘Lung in asin ngāiin
lung ei heng u lung
ngēt ha akila lung alu
khīt ahong achanga.
11 Hiva hi Puma asin thō,
Hatuka hava ha koini ngāi
mitmuna tichang abui sabak
ani na,’ ”
(Sām 118:22, 23 )
ati na.
12 Hasika han chāizūng alian ngāiin ama asūrna rang lampui aval u na.
Asik chu hiva ankhīna chong hi amāni ei mankhīna rui kēng ti ei riat u ani na.
Tenchu amānīn mipui ei achi u sika han ama chu amāk u na asē kiar u na.
Kaisar kōma siachōi apēk rui
13 Hava suale nukhōna Isua achong rila ei anpala ei sūr thei u na ranga Pharisi ngāi bila senkhat le Herod atianga mi ngāi chu akōma atīr u na.
14 Hatuka amāni chu akōma ahong u na:
“Mīnchūpu,
mi āsa angkhat na ni ti hi koinīn nei na riat.
Hanūk chu tutē tak chunga anchinām dōn mak che ti nei na riat.
Hanūk chu nei mandang abuia adik taka Pathian lampui rui kēng nei manchū chachak ti nei na riat ani na.
Hanle atun hin na ril ta Kaisar rēng kōma siachōi apēk hi adik mo ole dik mak mo?
15 Koinīn nei pēk rang mo ole nei pēk nōk rang mo?”
ati u na.
Tenchu amān phuazekām ei ni u ariata akōm u na:
“Nangnīn ichang mo nei na mansin u?
Sumru khat ha hong chōi u tān na manmu u ta,”
ati na.
16 Hatuka chu ahong chōi u na amān akōm u na:
“Hiva ramīl hi tu mo,
hanūk chu tu raming mo anziaka akop?”
ati na arakela.
Amānīn:
“Kaisar rēng,”
ati u na.
17 Hatuka chu Isuan akōm u na:
“Kaisar rēng āta chu Kaisar rēng kōma pe u ro.
Pathian ta chu Pathian kōma pe u ro,”
ati na.
Hatuka achong rila han amānīn achālaka aboi amandong u na.
Āthi ngāi anthuirētna
huna inneina ruia ankelna
18 Hatuka Sadduki ngāi senkhat chu akōma ahong u na.
Amāni ngāi hi athi nāta anthui rētna om mak ati ngāi ani u na.
19 Amānīn:
“Mīnchūpu,
Mosīn koini ranga dān ei na maziak pe chu,
mīn aparual angkhat pei nāi dōn luia anungāk amāka athi ten,
aparualpa ranga chi ei mākna ranga āthipa nungāk ha aparualin lāk rase.
20 Hanle atun hin parual sari ngāi a om u na.
Ulian khītin inaneia nāi dōn luia athi na.
21 Aparual annina hān hava nupang ha alāka nāi dōn lui dēna athi rēta.
Aparual anthumna hām hantin dēn han ani na.
22 Hantin han parual sari ngāi chu nupang khat alāk u na nāi dōn luia athi zit u na.
Nukhōn khīta chu hava nupang um athīna.
23 Athi nāta anthui rētna nikhua tika hava nupang ha tu nungāk mo ei chang rang ani zei?
Asik chu hava parual sari ngāi chipin ama ha ei lāk u ani,”
ati u na.
24 Isuan akōm u na:
“Pathian lekhabūna chong um re u mak che hanūk chu Pathian sin thōtheina rui um re u mak che,
hasik han nei machāi ani u zei.
25 Āthi nāta anthui rētna hun tika chu mīn inannei um u lāi nō ni,
in mannei um u lāi nō ni.
Tenchu anvāna vānpalāi ngāi anga om unti.
26 Tenchu thīna nāta anthui rētna rui ha Mosi lekhabūna ram anbūk akānga ei manlang ha
pore u mak che mo?
Asik chu Pathianin akōma:
‘Koi hi Abraham Pathian,
Isaak Pathian le Jakob Pathian
ka ni,’
(Ant.3:6 )
ati na.
27 Ama chu athi ngāi Pathian ni mak,
adam ngāi Pathian kēng.
Hasik han achālaka nei machāi ani u zei,”
ati na.
Chongpēk alian khīt
28 Hatuka dān mīnchū ngāi bila mi khat Isua kōma ahonga.
Amān ei ankhal u na ngāi ariata,
hanūk chu Isuan adik taka amāni kōma ei masang ti ariata.
Akōma:
“Chongpēk ngāi bila hova mo chongpēk alian khīt?”
ati na arakela.
29 Isuan chongpēk alian khīt chu hiva hi:
“ ‘O Israel ngāi,
rangāi u ro.
Koini na Puma Pathian chu
angkhat dak kēng.
30 Puma na Pathian chu na
malung dōra le,
na rīlru
dōra le,
na sūngrīl dōra le,
na ranak dōra lehan nei
madit rang,’
‘Na ninga nei andit anga na
inkōl mi ām ādit ro,’
(Lev. 19:18 )
ti hi ani na.
Hiva chongpēk ngāi nēka atei alian om lāi mak,”
ati na amasanga.
32 Dān mīnchūpūn akōma:
“Mīnchūpu,
nangin nei ti ha achālaka ādik kēng,
chongtak chong kēng nei ril.
Asik chu Pathian angkhat dak ani na,
ama rong nōka atei tutē om lāi mak.
33 Hanūk chu,
na malung dōra le,
nei hianna dōra le,
na rīlru dōra le,
na ranak dōra le ama andit le,
hanūk chu na ninga nei andit anga na inkōl mi andit hi sake manli ahāla anbōl le dāli tetei adar ngāi dōra nēka ālian khīt ani,”
ati na.
34 Amān hava ha ahian sabak chunga ei masang ti Isuan ariata akōma:
“Pathian ram le ankār rei ni mak che,”
ati na.
Hatuka havan āta chu tutēn itē ankel rang ngam u mak.
Krista hi tu Nāi Pasal mo?
35 Hanūk chu Isuan Pathian biak ina amanchū lāi han:
“ ‘Krista hi David anāi Pasal kēng,’
ti hi dān mīnchū ngāiin hontin mo
‘Pumān ka Puma kōma ei ti,
Na rāldui ngāi na kepha
siakna thuaia ka siak
maseng,
Ka chang tianga ansut ro,’
(Sām 110:1 )
ati na.
37 David ama ngētin ama rang ‘Puma’ ati na apāi ten hontin mo anāi pasal ei ni thei rang?”
ati na.
Dān mīnchū ngāi
āta anrēngna rui
Isua achong ril ngāi chu mipui ātampān rāisān taka arangāi u na.
38 Hanūk chu Isuan mi amanchūna chong aril lāi han:
“Dān mīnchū ngāi āta anrēng u ro.
Amāni chu kultāi athuai anchualpa ngāi antianga achei kēng ei zōt u.
Bazār muna mīn chibai ei thō u rang kēng ei zōt u.
39 Hanūk chu ankhōmna ina sutmun alian le bu nēk pāntana sutmun ansānga ansut kēng ei zōt u.
40 Amānīn arōng ngāi dōnglua ei sāk u.
Mīn muna rang khopa bōr azong āseipa ngāi ei zong u chachak.
Hava ngāi ha ruiril tika achālaka antakna tēng unti,”
ati na.
Arōngnu nuampēk ei pēk rui
Lk.21:1 -4
41 Hatuka Isua chu nuam pēk sum siakna kōl taka ansuta mīn nuam pēk sum siakna muna sum ei pēk u ngāi ha alei en chiana.
Hatuka ānchong ngāi tamtakin sum ātampa ngāi ahong bun u na.
42 Tenchu arōng anriang khat ahonga siki anni bak ahong pēka,
hava poisa ha aduli khat dak
ani na.
43 Hatuka Isuan azolāi ngāi akōma akuia:
“Taktaka kei na ti ani u zei,
nuampēk siaknana ahong asiak ngāi dōra bila hiva arōng anriangin ei hong pēk hi ātam khīt.
44 Asik chu mi dōra chu amāni anei anung maniang āta ei hong pēk u ani na.
Tenchu ama hi chu abui chungām ei dōn salep āta ei damna ranga ei anmangpui ha aloma ahong pēk zit,”
ati na.