Hun ahek tika sinsiana ngāi
13
1 Hatuka Pathian biak in āta ahong asuak lāi han azolāi ngāi bila angkhatin akōma:
“Mīnchūpu enta,
ituk mo hiva lungpa ngāi ei liana in ei huipa hi!”
ati na.
2 Isuan akōma:
“Hiva lung in alianpa ngāi hi na mu mo?
Hiva ngāi hi lungkhat chunga lungkhat ankama om nō ni,
aloma la chiam zit inti,”
ati na.
3 Hava suale Pathian biak in anūk tiang changa Maruan muala ansuta a om lāi han,
Peter,
Jakob,
Johan le Andria ngāiin abingtena arakel u na:
4 “Koini kōma na manthei ta,
hiva ngāi hi hotik mo ei hong suak rang?
Hanūk chu hiva ngāi dōra ahong atung rang tika hong zāt sinsiana mo ei om rang?”
ati na arakel u na.
5 Isuan amāni kōma:
“Tutēn lampui ateia ei na ruai u nōkna ranga anrēng u ro.
6 Asik chu mi tampa ka raming anputa hong ūnti:
‘Koi hi Krista ka ni zei,’
hong ti ūnti.
Hanūk chu mi tamtak chu lampui nōk tianga maruai unti.
7 Hatuka chu nangnīn antuk ankāpna le anduina thang na riat u tika na ratha manta u nō ro.
Hiva ngāi hi ei hong om ranga ngal kēng.
Tenchu ei hekna chu la hong suak nō ni.
8 Nam le nam andui unti,
ram le ram andui unti.
Mun tamtaka nīnu hong inti,
māitām hong chul inti hanūk chu antakna hong suak inti.
Tenchu hava ngāi dōra ha antakna anphut phing kēng alani.
9 Hanum nisela na ninga ranga anrung u ro.
Mīn nangni ngāi hi ruirilna ina na betōk unti,
ankhōmna ina na zēm unti,
hanūk chu koi ka sika ruiril ngāi le rēng ngāi matona ka rui ariatpui ranga na la manding unti.
10 Tenchu mānsana thang ahui hi aloma nam tin kōma ei lān ril ngēt rang ani na.
11 Tenchu anabetōka ana ruai u tika imo kei ti rang,
ati na aphāmān āta mandon u nō ro.
Tenchu hava hun taka na kōm u na chong ei na manriat u ha ril u ro.
Asik chu nangni ni mak chong aril rang,
Ratha Ānthiang kēng.
12 Hanūk chu anthat ranga parual le parual anbetōk unti,
pain nāi pasal betōk inti,
nāi ngāiin nu le pa chunga sel unti.
Hatuka amāni ha la that unti.
13 Ka raming sika mi dōrān na la mumāk unti.
Hanum nisela ahek ten pei adiartit thei tak chu sandama om inti.
14 Tenchu deari Danielin:
‘Āsiatpu antīr rua neinun,’
ha ei om nōkna muna andinga na mu u tikle hava ha om inti ti ha ani na.
Tukareng hiva anpore takin riat rase.
Judia rama a om ngāi chu muala varot lāi rase,”
ati na.
15 Hanūk chu:
“In chunga a ompu chu hong chum lāi nō rase hanūk chu insūnga neinun alāk ranga chum nō rase.
16 Phāia a ompu chu apuan alāk ranga kīr nō rase.
17 Hava nikhua tika chu ārāi ngāi le ranu nēk adōn nāitenu ngāi chang rang chu anchi om ba!
18 Nūdin adāi taka nei rot hi ei chuk nōkna ranga bōr zong u ro.
19 Asik chu hava nikhua tika chu antakna hong suak intia.
Hava antakna ha chu Pathianin leilung ansin anphut len āta avian tenpeia,
hava ang antakna la om ngāi mak,
om um lāi nō ni.
20 Pumān hava nikhua ha amanbong nōk ten miring nukanei angkhat ngal adama azōk rang om nō ni.
Hanum nisela Pathian ami thang ngāi sika hava nikhua ha ei manbong rang kēng.
21 Hava hun tika mīn na kōm u na:
‘En u ta!
Krista chu hiva hin a om.’
Hanūk chu:
‘En u ta!
Ama chu sovan a om,’
na ti unti.
Tenchu iam u nō ro.
22 Asik chu Krista rothol le deari rothol ngāi la hong suak unti.
Amāni ngāi hān sinsiana ngāi manlang untia boidongkhap sin thō unti.
Athei ten,
amithang sua ngāi um lampui nōk tianga ei la ruai theina ranga.
23 Hasika han nangni ngāi anrēng u ro.
En u ro,
aphāmān āta aloma ka na manriat kiar u zei hale.
24 Hava nikhua tika,
hava antakna ansuale chu ani hong zīng inti,
tha hong ēl nō ni.
25 Anvān āta ārsi ngāi hong chul inti,
chung tianga ranak anei ngāi dōra annīk inti.
26 Hava tika chu Miring Nāi Pasal hi thōtheina lian le anlal sabaka ansūm bila ahonga mu unti.
27 Hava tika avānpalāi ngāi hong tīr inti ami thang ngāi chu kōlkil manli nāta ramual ei hekna tenpeia mankhōm inti.
28 Tenchu theichang kung āta ankhīna lehan anchū u ro.
Abāk annui ngāia han abua ahong ancher ten pāmsāl ahong anāi zei,
ti na riat thei u na.
29 Havan tin anga han nangni ngāi um hava ngāi ha ei hong suak na mu u tikle,
ama chu ahong rang anāi kēng ani zei.
Suakkhār kōla andōn kēng ani zei.
30 Taktaka kei na ti ani u zei,
hiva ngāi dōra ahong akip māseng chu hiva rual ngāi hi anpei u nō ni.
31 Anvān le ramual kēng ei anpei rang tenchu ka chong chu anpei pial nō ni,”
ati na.
Anikhua le ahunbi
tutēn riat mak
Mt.24:36 -44
32 Hatuka:
“ Hava nikhua le ahunbi rui chu Pa rong nōk ten tutēn vānpalāi ngāi um,
Nāi Pasal um ariat om mak.
Tenchu Pa rong kēng āriat.
33 En u ro,
anrung u tān amenga bōr lei zong u ro.
Asik chu hava hun ha itik mo ei hong suak rang tutēn re u mak che.
34 Hintin ang hin ani na.
Mi khat ain amāka ram ateia asēna.
Hatuka asē lāi han asuak ngāi kōma chong apēka asinthō u rang dōra apēk chipa,
hanūk chu suakkhār arungpa kōma,
ameng chiana lei om ro,
ati na.
35 Hasika han inpumapa hova tika mo ei hong rang zān tiang mo,
zān chima mo,
ārkhuana mo ole zīnga mo nei riat u nōk sika lei meng chian u ro.
36 Anlāiseka ahonga na in u lāi taka na hong mu ving u ni,
hasik han anrēng u ro.
37 Koiin na kōm u na kei ril hi tukareng ranga kei ril ani na,
amenga lei om chian u ro!”
ati na.