Bethani khuana Isua
sariak ei anthi rui
14
1 Jihudi ngāi Zōkna pānta le chol anchel lui Ruti pānta ha avian āta nīnni suale ei om rang ani na.
Hava lāi han chāizūng ulian ngāi le dān mīnchū ngāiin Isua chu maruka ansūra athatna rang lampui arok u na.
2 Tenchu amānīn:
“Pānta om lāi tak chu ni nō rase,
hanoten mipui kāra anbuaina lian tak asuak rang kēng,”
ati
u na.
3 Hatuka Isua chu Bethani khuana aphār khat Simon ina avaom a.
Hatuka bu nēk ranga ansut lāi han nupang khat longvār bodola achālaka aman alu sariak marim ahui ahong chōia ahonga.
Hatuka hava akok akhuia Isua lu chunga akhua pena.
4 Hatuka havana a om ngāi senkhat chu amalung om manhui u mak.
Hasika han:
“Ichanga mo hivan tina sariak marim ahui pei ei manchang?
5 Hiva sariak marim ahui hi denari raza anthum nēka ātama anzuara anriang ngāi kōma anpēk rase ba,”
ati u na.
Hatuka hava nupang ha achālaka angō u na.
6 Isuan:
“Itē chong u nō ro,
ichang mo amalung nei manbuai pe u?
Ka ranga sin āsa kēng ei thō hile.
7 Anriang ngāi chu na kōm u na a om babang u kēng.
Na zōt u tik peia na san thei u.
Tenchu koi na bil u na om babang nō ning.
8 Ama chu ei thōthei tuk ei thō ani zei.
Ama chu aphāmān āta thānkhura ranga ka taksana marim ahui alei khua zēt kēng ani zei.
9 Taktaka kei na ti ani u zei,
maniapūr pumpuia hiva thang ahui anrilna mun tina ama riattitna ranga hiva ei thō rui hi anril inti,”
ati na.
10 Hatuka Iskariot Juda,
Sōmleianni ngāi bila angkhat
ha Isua anbetōk ranga chāizūng ulian ngāi kōma asēna.
11 Hatuka ama chong alei riat u na achālaka arāi asān u na sum apēk ranga chongatin u na.
Hatuka Judān ei betōk theina rang lampui aroka.
Puma Zāndui
1 Kor.11:23 -26
12 Hatuka chol anchel lui Ruti pānta nikhua mānsa,
Zōkna pāntana berate anthatna rang nikhua han azolāi ngāiin akōma:
“Zōkna pānta bu nēkna ranga hova muna mo nei vamansūk ranga nei zōt?”
ati u a.
13 Hatuka chu azolāi ngāi bila anni atīra.
Amāni kōma:
“Khopuia valūt u tān tīkolana tī chōi pasal khat vāntongpui un na ti.
Ama anūk ha vazī u ro.
14 Hatuka ama ei lūtna in taka inpumapa kōma:
‘Anānchūpūn ei ti,
ka zolāi ngāi le Zōkna pānta zāndui kei nēkpuina ranga khual tungna in ha hontiang mo?’
ati na varakel u ro.
15 Hatuka amān chunga insūng alianpa anzēk vang le ansūk chīt sua amān na man mu unti.
Hava han koini ranga vamansūk u ro,”
ati na.
16 Hatuka chu azolāi ngāiin amāka khopui sūnga avalūt u na.
Isuan ei ti ang taka avamu u na.
Hatuka Zōkna pānta zāndui nēkna ranga amansūk u na.
17 Hatuka zān ahong azīng le Sōmleianni ngāi le hava muna han ahong u na.
18 Hatuka ansuta bu anēk u lāi tak Isuan akōm u na:
“Taktaka kei ti ani u zei,
nangni bila angkhat ka bila bu ana nēkpuiin na betōk inti,”
ati na.
19 Hasika han amalung ana
u na,
angkhakhata akōma arakel u na:
“Hava ha koi mo?”
ati u na.
Atei angkhatin:
“Koi mo?”
ati na.
20 Hatuka amān akōm u na amasanga:
“Hiva Sōmleianni ngāi bila angkhat,
khēnga ka bila akut aphūmpu tak hi.
21 Miring Nāi Pasal chu achunga ānziak anga asē rang ani zei.
Tenchu Miring Nāi Pasal anbetōkpu miring chu avān aduai ba!
Hava miring chu anzir ngal nō sela aranga sa ual inti,”
ati na.
22 Hatuka chu anēk u lāi tak han Isuan ruti alāka rāisān chong arila akhiaka akōm u na apēka:
“Hiva hi la u tānla sa u ro.
Hiva hi ka taksa kēng,”
ati na.
23 Hava suale khuri alāka rāisān chong aril suale akōm u na apēka.
Hatuka havan āta alom u na abuang kiar u na.
24 Amān akōm u na:
“Hiva hi dān khit athara ka thisen ani na.
Mi tamtak ranga asuak rang chu ani.
25 Taktaka kei na ril ani u zei,
nangkana Pathian rama hiva hi athara ka buang rēt māseng chu hiva gerep zu hi buang lāi nō ning,”
ati na.
26 Hatuka la angkhat athō u na Maruan muala avakal u na.
Peterin Isua ei maniang
rang aphāmān alei ril
27 Isuan akōm u na:
“Na lom u na koi ka sika atun zān hin sōkcha kiar un na ti.
Asik chu:
‘Bera enpu chunga
ka zēm tika,
Bera ngāi dōra chu anthek rak
unti,’
(Zek.13:7 )
ti anziak ani na.
28 Tenchu thīna nāta kān thuirēt suale Galili rama nangni na maton u na lei sē ka ting,”
ati na.
29 Peterin akōma:
“Aloma sōk acha kiar u nām koi chu sōkcha nō ning,”
ati na.
30 Isuan akōma:
“Taktaka kei na ti ani zei,
atun hiva zān ngēta hin ār voi anni akhuang mān nangin voi anthum na maniangin na ti,”
ati na amasanga.
31 Tenchu Peterin anring riama ati na:
“Na bila āthi rang aninām,
nang chu na maniang thak nō ning,”
ati na.
Han tin han alom u na ati kiar u na.
Getsimani rahuana Isua
32 Hatuka Getsimani ei ti u muna han asē u na.
Hatuka azolāi ngāi kōma:
“Bōr ka vazong kār pei chu hiva hin lei ansut u ro,”
ati na.
33 Hatuka chu Peter,
Jakob,
Johan ngāi lim abila aruaia.
Hatuka ama chu achālaka amalung ana pe sabaka anngūia.
34 Amān akōm u na:
“Thīna rang tenpeia anbuaia ka malungrīl ana sabak zei.
Hiva hin lei om u tān,
lei meng chian u ro,”
ati na.
35 Hava suale ala uala asēna phila anboka bōr avazonga:
“Athei ten,
hiva hun hi ka kōm āta anlēn rase,”
ati na.
36 Amān:
“Abba,
ka Pa,
nangin alom peia na thōthei zit.
Hiva khuri hi ka maton āta na khāi pe ro.
Hanum nisela koi kei zōt ni mak,
tenchu nang nei zōt ni rase,”
ati na.
37 Hava suale ama chu ahong akīra amāni ngāi chu alei ina ahong muna.
Hatuka chu Peter akōma:
“Simon,
a in mo na ni?
Dār khat ngal lei meng thei lāi mak che mo?
38 Ansinna nei chul nōkna ranga meng tānla bōr zong ro.
Ratha chu azōt tenchu taksa chu achuai,”
ati na.
39 Hava suale asē rēta ei ti ngāi dēn arila bōr azonga.
40 Hatuka ahong akīra amāni ngāi ha ala in chiana ahong muna,
achālaka amit ei khu sabak u sika ansangna chang re u mak.
41 Hanūk chu voi anthum changna akōm u na ahong rēta:
“Atun tena nei la in chiana pōng nei lānsa u mo?
Hatuk ngal ahun zei!
Hun ahong asuak zei.
En u ro,
Miring Nāi Pasal chu mi salui ngāi kuta anbetōk rang ani zei.
42 Anthui u ta ro,
sē u ta rei.
En u ro,
ana dui ngāi kuta koi anānbetōkpu chu ahong rang ani zei,”
ati na.
Isua ei ansūr rui
43 Havan tin han amān chong aril lāi tak han Sōmleianni ngāi bila Juda chu ahong asuaka.
Ama bila chāizūng ulian ngāi,
dān mīnchū ngāi le Jihudi patār ngāiin ei tīr mi ātampa khendāi le sunrol ahong chōia ahong u na.
44 Hatuka chu anbetōk rangpu hān aphāmān āta sinsiana alei ril zēta:
“Abiang kei tumpu tak ha ama ani zei.
Sūr len u tān asa dima ruai u ro,”
ati na.
45 Hatuka ama chu ei vasuak le Isua kōma avapan lena:
“Rabbi,
Rabbi,”
avatina abiang atum pena.
46 Hatuka amāni hān achelbo len u na asūr u.
47 Hatuka akōla anding ngāi bila angkhatin akhendāi arasuana chāizūng ulian suak khat atuka akuar a-āt pe vinga.
48 Isuan akōm u na:
“Khendāi,
sunrol achōia misuam ngāi āsūr ranga anga ana
sūr ranga mo nei hong u?
49 Anikhuan tina Pathian biak ina na bil u na ka oma ka manchū lāi han na sūr u mak chena.
Tenchu Pathian lekhana chong ngāi ei kipna ranga kēng,”
ati na.
50 Hatuka azolāi ngāi dōrān ama chu amāk rak u na arot zit u.
51 Hatuka ruathar khat sāikoronga puan ansil ropa ama anūk avazīna.
Tenchu ama hām ruathar ngāiin alei sūr u na.
52 Hanum nisela apuan amāk raka sāikoronga arota asēna.
Ruirilna ulian ngāi
matona Isua aruai u
53 Hatuka chu Isua chu chāizūng ulian khīt kōma aruai u na.
Chāizūng ulian ngāi,
Jihudi pātar ngāi,
dān mīnchū ngāi alom u na akōma ahong anchun u na.
54 Peter chu rāl āta chāizūng ulian khīt tuamāi tenpei anūk avazīna.
Hatuka biak in arung ngāi bila ansuta moi an uana.
55 Chāizūng ulian ngāi le ruirilna liana ulian ngāiin Isua ei that theina u na ranga ariatpui aphun ranga arok u na.
Hanum nisela itē man thak u mak.
56 Mi tampān milaka ariatpuia anphun u na,
tenchu achong ril u ngāi ha anmun u lāi mak.
57 Hankēng hava muna senkhat chu anding u na hiva milaka ariatpui anchanga:
58 “Hiva monisi hin:
‘Kut le ansin in anthiang hi masiat zit ka tinga,
hatūka chu nīnthum sūnga kut le ansin lui mun ānthiang atei manding rēt ka ting ati na,’
na riat,”
ati u na.
59 Hanum nisela hantin han na mu na riat anti u nām achong ril anmun u lāi mak.
60 Hankēng chāizūng ulian khīt chu mi lāi taka andinga Isua kōma:
“Itē masang nō ta ni mo?
Na chunga hiva chong āsia ngāi hi ichanga mo ei hong chōi u?”
ati na arakela.
61 Tenchu Isua chu adāi reka itē masang mak.
Chāizūng ulian khītin athara:
“Nang hi Bōrsāng atung Nāi Pasal,
Krista mo na ni?”
ati na arakel rēta.
62 Isuan:
“Ka ni.
Hatuka chu nangnīn,
miring Nāi Pasal hi Pathian ranak anei chang tianga ansuta hanūk chu chungvān sūmpui bila ahonga la mu un na ti,”
ati na.
63 Hatuka chāizūng ulian khītin apuan athēta:
“Imo ariatpui āphun ngal nāng lāi mak hile?
64 Pathian siat ei ril hi na riat u hile.
Hontin mo nei mandon u rang?”
ati na.
Hatuka alom u na ama chu athat apei rua kēng ati na āsia amatung u na.
65 Senkhat chu achunga amachil len u na,
amāi amahīp pe u na,
akut būr le asuk u na:
“Atun le deari anga chong ril rēt ta!”
ati u na.
Hanūk chu biak in arung ngāiin um akut maza le aben u na.
Peterin Isua amaniang zei
Jn.18:15 -18, 25 -27
66 Peter chu apang tianga kholāia a om lāi han chāizūng ulian khīt suak nupangte khat ahonga.
67 Peter moi ei an-ua amu na atianga a en chiana:
“Nang um Nazareta mi Isua bila a om kēng na ni hile,”
ati na.
68 Tenchu Peterin ariat nōk om athōna:
“Hong zāt mo nei ti,
ama chu re makung,
thei um makung,”
ati na.
Hatuka tual panga ei vasuak le ār ahong akhuanga.
69 Hatuka hava han suak nupangte khatin avamu rēta akōla anding ngāi kōma:
“Hiva nāi um amāni bila angkhat kēng,”
ati rēta.
70 Hatuka athara re makung ati rēta.
Hankēng asōt miai suale akōla anding ngāiin Peter akōma:
“Nang hi amāni bila ngēt kēng na ni.
Asik chu Galili rama mi na phua,
na chongrila andang,”
ati u na.
71 Tenchu Peter khomāk atiang arakuia khomāk ansama:
“Hava mi ruia nei ril u ha re ngal pial makung,”
ati na.
72 Hava suale chu voi anni ār ahong akhuang lena.
Hankēng Isuan akōma chong ei ril:
“Ār voi anni akhuang mān,
nangin voi anthum na maniangin na ti,”
ti chong ha Peter amalunga ahong achuia.
Hatuka hava ha amandona ei chap ani na.