Pilat matona Isua aruai u
15
1 Hatuka chu zīng khua ahong avār le chāizūng ulian ngāi chu Jihudi pātar ngāi le dān mīnchū ngāi le ruiril ulian ngāi lehan rui amasat u na.
Hatuka Isua chu akhita aruai u na Pilat akōma avabetōk len u na.
2 Pilatin Isua rang:
“Jihudi ngāi rēng mo na ni?”
ati na alei rakela.
Hatuka amān akōma:
“Nang kēng ana ti,”
ati na amasanga.
3 Chāizūng ulian ngāiin ama chunga āsia tampa amatung u na.
Tenchu amān itē masang mak.
4 Hasika han Pilatin akōma:
“Nangin itē na masang nō tani mo?
Enta,
ituk mo na chunga āsia ei na matung u ani zei,”
ati na arakela.
5 Hanum nisela Isuan itē masang mak.
Hasika han Pilat aboi adong sabaka.
Isua athatna rang rui anril
6 Dān anga akuma Jihudi ngāi pānta kipa ankhumna ina ankhum khat pei mipuiin ei zong tak Pilatin ei mazōk pe chachak ani na.
7 Hatuka chu mi sel ngāi kāra mi khat araming Barabba ati na a oma.
Hava mī ha asel u lāia mi that ani na.
8 Hatuka mipui ngāi chu akōma ahong u na amāni ranga ei thō pe babang anga athō pe ranga Pilat akōma ahong ankhēk u na.
9 Pilatin akōm u na:
“Jihudi ngāi rēng,
anti ha mo kei na mazōk pe u ranga nei zōt u?”
ati na arakela.
10 Asik chu chāizūng ulian ngāiin Isua khāmaret ei thō u sika kēng akōma ei hong betōk u ti ariata.
11 Tenchu chāizūng ulian ngāiin ama rathūla Barabba ei mazōk theina ranga achālaka mipui ama thok u na.
12 Hatuka Pilatin akōm u na:
“Hanle Jihudi ngāi rēng nei ti u ha hong zāt kei thō ranga mo nei zōt u?”
ati na arakel rēta.
13 Hatuka amānīn:
“Ama chu krosa tār ro!”
ati na ankhēk u na.
14 Pilatin akōm u na:
“Ichanga mo?
Hong mo masial ei thō?”
ati na arakela.
Hanum nisela:
“Krosa tār ro!”
ati na anringa ankhēk riam u na.
15 Hatuka chu Pilatin mipui malung phūk ei man dāi zōt sika amāni ranga Barabba chu amazōk pena,
Isua chu arazīka krosa atār ranga abetōka.
Sipai ngāiin Isua
mani ēro athō u
16 Hatuka chu sipai ngāiin ama chu Pretoriam inpui ei ti u han aruaia avalūtpui u na.
Hanūk chu aloma sipai rual dōra mun khata akui zita.
17 Hatuka puan senaduk aman sil u na,
raling lukhum aphan u na aluna amankhum u.
18 Hatuka amānīn:
“Chibai,
Jihudi ngāi Rēng,”
ati na amōk u na.
19 Hanūk chu luangsār kuang le alu azēm u na,
achunga amachil u na.
Hanūk chu amatona mankhūk abila amōk u na.
20 Hatuka maniēro athō sua ule puan senaduk chu akhek pe u na,
apuan dēn amansil rēt u na.
Hatuka krosa antār ranga asuakpui u na.
Isua krosa antār
Jn.19:17 -27
21 Hatuka Kurini rama mi khat araming Simon ha khua nāta hava lampuia han ahonga.
Ama ha Aleksandar le Rupha ngāi apa u ani na.
Ama ngēt ha asūr u na Isua kros amanput khakhak u na.
22 Hatuka Isua chu Golgotha,
hava ti na chu Luru Mun,
ei ti u na muna han aruai u na.
23 Hatuka mura marim ahui le anpol zu anēk rang apēk u na,
tenchu amān ne zōt mak.
24 Hatuka chu krosa ahēm u na,
apuan chu amāni ngāiin ansem u na.
Hanūk chu tu mo hova mo alāk rang ati na ravān enna athō u na.
25 Isua krosa atār u lāi han zīng dār akua tāng ani zei.
26 Hatuka ama āsia ei manlō u na lekhapēk achung tianga atār u na:
“JIHUDI NGĀI RĀNG,”
ati na anziaka.
27 Ama bila misuam ngāi anni krosa atār u na,
achang tiang khat avoi tiang khat āsiak u na.
28 Hatuka:
“Ama chu dān tel lui mi ngāi
kāra āntel kēng ani zei,”
(Isa.53:12 )
ti Pathian lekhana chong ha ei hong kip ani na.
29 Hatuka hava lampuia anlōi ngāi dōrān ēlsekara athō u na alu āthing u na:
“Hei!
Nang hi mo biak in ānthiang ansiama nīnthum sūnga anding rēt rang ha.
30 Na ninga andam tānla kros āta hong chum ro,”
ati na maniēro athō u na.
31 Hantin ang dēn han chāizūng ngāi le dān mīnchū ngāi um amāni bila:
“Sova mi so mi tei chu amandam theia,
tenchu aninga chu andam thei mak.
32 Nei mu na nei iam theina ranga hiva Krista,
Israel Rēng hi atun len kros āta hong chum ta rase ba!”
ati na maniēro athō u na.
Hanūk chu ama bila krosa antār ngāiin um maniēro athō u na.
Isua athi
33 Hatuka sūn dār sōmleianni āta dār anthum tenpei ram pumpui ahong azīng khapa.
34 Hatuka dār anthum ten ahong ani le Isua chu:
“Eloi,
Eloi,
lama sabakthani?”
ati na anringpana ankhēka.
Hava omzia chu:
“Ka Pathian,
Ka Pathian,
ichang mo nei na māk?”
(Sām 22:1 )
ti na ani na.
35 Hatuka akōla anding ngāi bila senkhatin hava chong ha ariat u le:
“Rangāi u ta,
Elija kēng ei pāi ani zei,”
ati u na.
36 Hatuka mi khat atāna zuthūra isponz amachiana hava ha sunrol mēra amakhopa anēk ranga Isua apēka.
Hatuka:
“Māk u ta,
en di rei,
Elija ahonga ahong masum mo masum mak mo,”
ati na.
37 Hava suale Isua anringpana ankhēka arang ei chat ani na.
38 Hatuka biak in ānthianga puan anzār ha achung len āta athuai tenpei phel anni achanga anthēta.
39 Hatuka amatona anding sipai raza anruaipūn hantina Isua ankhēka arang ei chat amuna:
“Taktataka hiva mi hi Pathian Nāi Pasal kēng,”
ati na.
40 Nupang senkhatin varāl āta alei thīr u na.
Hava ngāi bila Magdalini Mari,
nāipang Jakob le Jose anu Mari le Salomi ngāi anchel u na.
41 Hava ngāi ha Galili rama a om lāi han Isua anūk azī u na ama adorbo andom ngāi ani u na.
Hanūk chu ama bila Jerusalem khopuia ahong atei nupang ātampām ānchel ani u na.
Isua thāna anphūm
42 Hatuka chu hava nikhua ha Pōngansa nikhua khului mānteta Jihudi ngāi Ansinna nikhua ani na.
Hatuka khului ahong azīng rang ani na zeia.
43 Arimathāi khuana mi Joseph,
ruiril ulian ngāi bila lalchi dōn khat ahonga.
Ama hām Pathian ram alei ngāk ani na.
Ama chu angam chaka Pilat kōma asēna Isua ruak avazonga.
44 Hatuka Isua chu ei thi len sika Pilat aboi adong sabaka.
Hasika han sipai raza anruaipa apāia,
Isua itik tena athi sua mo an zei ati na arakela.
45 Hatuka sipai raza anruaipu kōm āta ariat suale chu Joseph akōma Isua ruak chu apēka.