Isua athi nāta anthuirēt
16
1 Hatuka Jihudi ngāi Pōngansa nikhua ahek suale chu Magdalini Mari,
Jakob anu Mari le Salomi ngāi hān ama aruaka ei vakhua u rang marim ahui ngāi arachōk u na.
2 Hapta nikhua mānsa khīta ārkhuan chunga zīngphit mānsa thāna asē u na.
3 Hatuka amāni le amāni achong u na:
“Tu mo thān makot āta lung alianpa ana khāi pe rang ani zei?”
ati u na.
4 Hatuka chu chung tiang atanga a en u na,
hava lung ha ankhāia a om a.
Asik chu hava lung ha alianpa ani na.
5 Hatuka thāna alūt u lāi han ruathar angkhat puan ngui ansila achang tianga ānsut chu avamu u na.
Hava sika han achālaka aratha ta u na.
6 Hatuka amān akōm u na:
“Na ratha manta u nō ro,
krosa ei tār u Nazareta Isua ha nei arok u ani.
Ama chu anthui rēt zei!
Hiva hin ama chu om lāi mak.
En u ta,
hiva hin ei siak u na mun ani na.
7 Tenchu sē u tānla azolāi ngāi le Peter akōma:
‘Ama chu Galili rama na maton u na alei sē zei.
Na kōm u na ei na ril u anga sova son ama chu vamu un na ti,’
varil ro,”
ati na.
8 Hatuka amāni chu aratha ta annōk u na aboi adong sabaka thān āta asuaka atān u.
Aratha ta rahei u sika tutē kōma itē ril ngam u lāi mak.
9 Hatuka hapta nikhua mānsa khīt ārkhuan chunga Isua anthui rēt sua le chu Magdalini Mari kōma anlang mānsana.
Ama tak chunga hin rathasia sari pei ei razūl ani na.
10 Ama apum ngēt hi asēna Isua bila a om babang ngāi le aning abuia alei
achap ngāi kōma avaman theia.
11 Tenchu Isua ahong adam rēta amān ei antongpui ti chong ha amānīn iam thei u mak.
12 Hatuka chu amāni bila mi anni khua tianga apan ngāi kōma mēl atei adōna amāni kōma anlang rēta.
13 Hatuka amānīn zolāi atei ngāi kōma avamanthei rēt u na.
Tenchu amāni chong um lei iam thei u mak.
14 Nukhōna Isua azolāi sōmleikhat ngāi bu anēk u lāi tak akōm u na ahong anlang rēta.
Hanūk chu ama anthui suale ei antongpui u le achong ril u ngāi ei iam thei u nōk sika le amalung u ei ankhirtit sika angōna.
15 Amān akōm u na:
“Maniapūr pumpuia sē u tānla,
aloma amān ei sin ngāi dōra kōma thang ahui varil u ro.
16 Tukareng aiama baptisma alāk chu sandama om inti.
Tukareng aiam nōk tak chu āsia anlōna om inti.
17 Hanūk chu aiam ngāi tak chunga hiva sinsiana ngāi hīn anūk zī unti.
Ka raming le raluai ngāi razūl unti,
chong athara chongril unti.
18 Marūl sūr unti,
hanūk chu thīna tūr angkhat pei abuang u nām nisela itēn masiat u nō ni.
Āna ngāi chunga akut asiak u le hong dam unti,”
ati na.
19 Havan tin han Puma chu akōm u na chong aril suale anvān tianga akala Pathian chang tianga ansuta.
20 Hatuka amāni chu asuak
u na ram tina chong avaril u.
Pumān amāni bibila sin athōna.
Hanūk chu sinsiana ngāiin azī tira achong ril u ngāi ha adet riama.
Amen.