3
1 Hatūka nikhua tei rēta Jihudi ngāi ankhōmna ina avalūt rēta,
hava muna han akut ānhīp khat alei om a.
2 Hatuka Isua āsia ei manlō u na ranga Jihudi ngāi pōngansa nikhuana hava mi ha athīr chian u na.
Hatuka enta amandam mo mandam mak mo ati na mi senkhatin maruka asi chian u na.
3 Isuan akut ānhīppu kōma:
“Lokō malāi taka hong anding ro,”
ati na.
4 Hatuka amān akōm u na:
“Dān anga Jihudi ngāi pōngangsa nikhuana sin āsa thō mo adik ole sin āsia thō mo?
Andam mo adik ole athat mo?”
ati na arakela.
Tenchu amāni ha adāi reka a om u na.
5 Hatuka atak asina amāni tiang anhoia amalung u ei ankhir sabak sika amalung ana ariata akut ānhīppu kōma:
“Na kut alāng ro,”
ati na.
Hatuka akut alānga kiang khat tianga anga ahong adampe vanga.
6 Hatuka Pharisi ngāi chu asuak len u na Herod mi ngāi bila akopa Isua thatna rang lampui amansūk
u na.
Mipuiin Isua nūk azī
7 Hatuka Isua azolāi ngāi lehan tipuilian kōla asē vat u na,
tenchu Galili ram āta le Judia ram āta mipui ātampān anūk avazī u na.
8 Hanūk chu amān sin alian tak ei thō ngāi rui ariat u na,
Jerusalem khopui āta,
Idumai ram āta,
Jordan dung varāl āta,
Tura le Sidon khua ravēl dām āta mipui ātampa akōma ahong u na.
9 Hatuka mipui ei tam sika mīn achunga lam na del u ni ati na,
azolāi ngāi kōma rakuang asīnte khat alei ansūk zēt ranga chong apēka.
10 Asik chu amān mi tam sabak ei mandam ani zeia.
Hasika han rikhuatin adōn ngāiin ama ei vatōn thei u na ranga achālaka antuar annam u na.
11 Hanūk chu raluai ngāiin ama chu ei mu u le amakunga anbok u na:
“Nang chu Pathian Nāi Pasal ha na ni,”
ati na ankhēk u na.
12 Tenchu amān tutē kōma ama rui apuang nōkna ranga akōm u na chong akhārtita.
Zolāi Sōmleianni
ngāi ei anthangna
13 Hava suale Isua chu muala avakala,
amān ei zōt ngāi ha akōma apāia.
Hatuka amāni chu akōma ahong u na.
14 Hatuka chu ama bibila ei om thei u na rang le chong arila ei tīr theina ranga Sōmleianni ngāi chu athanga.
15 Hanūk chu ana ngāi andam rang le raluai ngāi ei razūl thei u na ranga ningneina ei dōn thei u na rang ani na.
16 Hiva ngāi hi amān athanga.
Simon,
Peter ati na amān raming aphuana.
17 Zabedai anāi pasal Jakob le Jakob aparual Johan,
amāni hi Boanerge ati na raming aphuana.
Hava ti na chu Khuanri Sanāi ngāi,
ti na ani na.
18 Andria,
Philip,
Bartholomoi,
Mathāi,
Thoma,
Alphai anāi pasal Jakob,
Thaddaia le Zelot Simon ani u na.
19 Hanūk chu ama anbetōk rangpu Iskariot Juda ani na.
Hatuka chu in sūnga avalūt u na.
Isua le Beelzebul
20 Hatuka mipui ātampa athara ahong anchun rēt u na.
Hasika han ama le azolāi bu ngal nēk thei u lāi mak.
21 Hatuka ama insūng mi ngāiin hava ha ariat u na ama asūr ranga asē u na.
Asik chu,
“Achāng kēng ni zei ni,”
ati u na.
22 Hava suale Jerusalem khopui āta ahong dān mīnchū ngāiin ama rang:
“Beelzebulin ei sūr kēng ani zei!
Raluai ngāi rēng dēn le kēng raluai ngāi ei razūl chachak,”
ati u na.
23 Hasika han Isuan amāni apāia akōm u na ankhīna amanga chong arila:
“Soitānin hontin mo soitān dēn ei razūl thei?
24 Ram khat hi ama le ama andui ten,
hava ram ha anding thei mak.
25 Hanūk chu insūngkua khat um ama le ama andui ten,
hava insūngkua ha anding thei mak.
26 Havan tin anga soitān um ama le ama anduia ansen ten,
anding thei mak,
tenchu ama ei hekna kēng ei chang rang.
27 Mīn arātpa khat ina alūta aneinun ngāi rusum vathōthei mak.
Mānsana arātpa ha akhit bak suale kēng ha in ha rusum ei thō pe thei ani na.
28 Chong tataka kei na ril ani u zei,
aloma miring nāi ngāiin āsia ei thō u ngāi dōra le Pathian tak chunga Pathian siat ei ril u na ngāi dōra anduala om zit inti.
29 Tenchu tukareng Ratha Ānthiang tak chunga āsiat aril chu andualna om pial lāi nō ni.
Tenchu ama chu tāituana āsia tianga āsia anlōna om inti,”
ati na.
30 Amān hiva chong ngāi akōm u na ei rilna asik chu:
“Raluai ei anloppui kēng ani zei,”
ei ti u sika ei ti ani na.
Isua anu le aparual ngāi
31 Hatuka chu anu le aparual ngāi ahong asuak u na,
tual panga anding u na,
ama avakui ranga insūnga mi atīr u na.
32 Akōla han mipui ātampa alei ansut u ani na,
hava ngāi hān akōma:
“Enta,
tual panga son na nu le na parual ngāiin ana ravān u,”
ati u na.
33 Amān akōm u na:
“Tu mo ka nu hanūk chu tu mo ka parual ngāi?”
ati na arakela.