Sachi ātupu lehan ankhīna
4
1 Hatuka Isuan tindīl kōla mi amanchū rēta.
Akōla mipui ātampa ahong anbūm rahei u na ama chu tī malāia rakuang atei khata avān suta.
Mipui dōra chu tāngkōla han a om u na.
2 Hatuka ankhīna le chong arila ātampa amanchūna.
Hatuka ei manchūna bila amāni kōma hiva hi arila:
3 “Rangāi u ro!
Sachi ātupu chu sachi chōia ātu ranga asuaka.
4 Hatuka chu hintin hin ani na,
sachi atu lāi han asen chu lampuia achula chunga vā ngāi ahonga ahong sāk tap u na.
5 Hanūk chu asen lung chunga achula,
hava han phil ātam ei man nōk sika anrapa ahong amōnga.
Asik chu phil ha anthūk lui ani na.
6 Tenchu anisa ahong asuak le hava ha ahong ra-ema,
hatuka arazung ei bui sika ahong achāra.
7 Hanūk rēt chu asen raling bila achula,
hatuka hava raling ngāi ha ahong ansōna adīp khapa,
hasik han avui don thei mak.
8 Hanūk rēt chu asen phil āsa chunga achula.
Hava ha chu ahong amōnga ahong ansōna.
Hanūk chu sapār ahong dōna asen mun sōmanthum,
asen mun sōmaruk hanūk asen mun razakhat tenpei ahong masuaka,”
ati na.
9 Hanūk chu amān akōm u na:
“Anngāina kuar adōn takin rangāi rase,”
ati na.
Sachi ātu lehan ankhīna
a omzia
10 Hatuka ama atheia a om lāi han Sōmleianni ngāi le atei abila aruaisi ngāi hān ankhīna a omzia arakel u na.
11 Amān akōm u na:
“Pathian rama chongrīl anthup chu nangni ngāi riat ranga anphal kēng ani zei.
Tenchu apanga mi ngāi ranga chu aloma ankhīna le kēng ei anril rang.
12 Hivan tin hin ei ni na ranga:
Amānīn amu chu mu unti,
tenchu riat pial thei u nō ni.
Anngāi chu rangāi unti,
tenchu riattheina dōn u nō ni.
Hantin han ni nō sela chu
hong kīr u na anduala om
unti,”
ati na.
13 Hatuka Isuan akōm u na:
“Hiva ankhīna omzia hi riat thei u mak che mo?
Hanle,
hontin mo atei vāng chu ankhīna omzia ngāi dōra ha nei riat thei u rang?
14 Sachi ātupūn chong kēng ei tu ani na.
15 Mi senkhat chu lampuia sachi chul anga chong chu akōm u na antuna.
Hatuka hava chong ha arangāi sua u le soitān chu anrapa ahong lena amalung u na chong antu ha apotpe viaka.
16 Mi senkhat chu lung chunga sachi anthek anga,
chong ha arangāi u le rāisān taka apom len u na.
17 Tenchu razung ei dōn nōk sika han hun atōmte adiara.
Hava suale hava chong sika antakna mo ole ansinsakna mo ahong asuak le anūk ankei len u chachaka.
18 Hanūk mi senkhat chu raling bila sachi anthek ang ani u na,
amānīn chong chu anngāi chu arangāi
ranga neinung akorong sika lunghāngna,
le atei atei ningōlna ngāi ahong alūta hava chong ha adīp khapa amara hong dōn thei mak.
20 Hatuka mi senkhat chu phil āsa chunga sachi antu ang ani u na.
Amāni chu chong arangāi sadim u na apom u
na.
Hatuka senkhatin mun sōmanthum,
mun sōm aruk mun razakhat tenpei mara ahong masuak u,”
ati na.
Lēm chuangna chunga lēm
21 Hatuka amān akōm u na:
“Mīn lēm hi ei chuangna muna siak luia kok sūnga mo ole zamun thuaia mo āsiak ngāi?
22 Asik chu anlang nōk rang itē anthup om mak,
hanūk chu anriat nōk ranga itē maruk um om mak.
23 Tukareng anngāina kuar adōn ten rangāi rase,”
ati na.
24 Hanūk chu ama dēnin:
“Hasika han hong mo nei rangāi u ha,
asa dima anrēng u ro.
Asik chu anmāina nei mang u dēn lehan nangnīm anmāi un na ti.
Tenchu nangni anngāi ngāi hava nēka ātama kēng nei lān māi u rang ala ni.
25 Asik chu tukareng adōn kōma ei lān pēksa rang ani,
hanūk chu tukareng adōn nōk kōma ei dōn salep ngal ha ei lānpotsa rang ani,”
ati na.
Chimuru lehan ankhīna
26 Hanūk chu ama dēnin:
“Pathian ram chu hivan tin ang hin ani na.
Mi khatin phila sachi avatuna.
27 Hatuka chu asūna azāna ama,
ain kārām ameng kārām,
sachi chu ahong mōnga akung ahong aliana.
Tenchu amān hontin mo ei hong lian hava ha re mak.
28 Phil hān abalama mara ahong masuaka.
Hatuka mānsana akung,
hava suale avui ani na,
hankēng chu avuia amēra han atak ahong a om a.
29 Hatuka apār chu ahong amin le kōite amakhopa,
asik chu sapār āt hun ei hong
suak sika,”
ati na.
Hoiro ru lehan ankhīna
30 Hanūk rēt chu ama dēnin:
“Pathian ram chu hong le mo nei mankhī rang?
Hanūk chu hong zāt ankhīna le mo nei mankhī rang?
31 Hava ha hoiro ramal khat dak ang ani na.
Phila antu lāi han hava ha chi mu ru ngāi lima asīn khīt chi mu ru ani na.
32 Hanum nisela hava ha antu suale chu ahong ansōna rahuana anna ngāi bila akung alian khīt ahong achanga.
Hanūk chu abāk alian ahong dōna,
hava kung thuaia han chunga vāte suvā ngāiin rabu ahong phan u na,”
ati na.
33 Hivan tin hin anga ankhīna ātampa lehan amānīn ei riat theina rang khopa akōm u na chong arila.
34 Amāni kōma chu ankhīna sim abuia itē chong ril mak.
Tenchu ama rong azolāi ngāi lehan a om u lāi han alom peia a omzia amanthei zita.
Isuan phāivua aman mong
35 Hava nikhua khului han,
amān akōm u na:
“Tho,
sovan tiang varāla son sē u rei,”
ati na.
36 Hatuka amānīn mipui ngāi anthānpui sua u le,
Isua rakuanga ei om a anga aruai u na.
Abil u na rakuang asīn atei um ala omsa.
37 Hatuka nukhōna phāivua anrikpa ahonga tīduar ansokin rakuang ahong soka ti bit thaka.
38 Hava lāi tak han Isua chu rakuang arēl tiang alu kobong athōna alei in zeia.
Hatuka ama amathui u na akōma:
“Anānchūpu,
athi rang na ni zei hile,
na mandon ngal mak che mo?”
ati u na.
39 Hatuka chu ama ahong ahar suale thīnthi chu angōna tipuilian kōma:
“Mong len tānla bāng ta ro,”
ati na.
Hatuka thīnthi chu among lena,
aloma adāi riama.
40 Hava suale azolāi ngāi kōma:
“Ichanga mo achālaka nei chi sabak u?
Atun tena iamna la dōn u mak che mo?”
ati na.
41 Hatuka chu achālaka arathāta u na amāni le amāni anril u na:
“Hiva mi hi hong zāt miring mo,
thīnthi le tipuilian ngalin ahē ei tel hi?”
ati u na.