Isuan raluai ei sūr
mi khat amandam
5
1 Hatuka chu tipuilian varāla Gadara mi ngāi ram chu ahong atung u na.
2 Hatuka chu rakuang āta achum phingle raluain ei sūr mi khat thān āta ahong asuaka.
Hatuka ama ahong antongpui lena.
3 Hava nāi ha thāna kēng ei om chachak.
Hanūk chu tūtēn zīngzir le ngal thung thei om mak.
4 Zīngzir le thirkuala athung babang u zeia.
Hanum nisela zīngzir ngāi asāta thirkual ngāi ei khiak chachak ani na.
Tūtēn mantep thei mak.
5 Asūn azāna thāna le muala ei vaom babanga ei ankhēk chachak.
Hanūk chu aninga lung lehan ei an āt chachak ani na.
6 Hatuka chu rāl āta Isua ei mu le atāna ake kunga avānboka.
7 Ahē anring sabaka ankhēka:
“Hong zāt mo nei na thō zōt?
Isua,
Chungannung khīta Pathian Nāi Pasal,
Pathian raminga kei na ril,
na sinsak nō ro,”
ati na.
8 Asik chu Isuan ama kōma han:
“Nang raluai,
hiva miring sūng āta suak ta ro,”
ei ti sua kēng ani zei.
9 Hatuka Isuan arakela:
“Hong zāt mo na raming?”
ati na.
Amān:
“Ka raming chu Sipai ngāi,
asik chu atampa kēng na ni,”
ati na amasanga.
10 Hanūk chu amānīn hava ram āta amāni ei razūl nōkna ranga Isua kōma achālaka amathēm sabaka.
11 Hatuka hava mual kōl tāng han vok rual ātampa anvāi ani u na.
12 Hatuka chu raluai ngāi dōra:
“Asūng u na nei valūt theina ranga,
vok rual bila son na tīr ro,”
ati na akōma amathēm u na.
13 Hatuka Isuan aphal lena,
raluai ngāi chu asuak u na vok ngāi sūngkuana avalūt u.
Hanūk chu vok rual ha asāng anni tāng ani na,
hava ngāi ha mual tianga tipuiliana tīrakham ansānga avachul u na athi zit.
14 Hatuka chu vok avāi ngāi chu arot u na,
khote le khopuia hava rui ha avamanthei u na.
Hatuka chu hong zāt mo ani zei ati na a en ranga mipui dōra ahong asuak u na.
15 Hatuka Isua kōma ahong asuak u le sipai raluain ei sūr mi ha ahong mu u na.
Ama chu puan arasila asūngrīl adam hiaia alei ansuta.
Hatuka amanīn āchi u na.
16 Hatuka hava amu ngāiin raluain ei sūrpa rui le vok ngāi rui ha mi ngāi kōma alei ril u na.
17 Hatuka hava mi ngāiin Isua chu aram u nāta amāk ranga amathēm u na.
18 Hatuka rakuanga avachuang rang lāi tak han raluain ei sūrpu hān Isua bibila a om chian ranga amathēma.
19 Hanum nisela Isuan phal mak,
tenchu akōma:
“Ina na mal na rual ngāi kōma sē tānla,
Pumān na ranga sin alian tak ei na thō pe le na chunga lungkham ei na mu zia ngāi ha varil ro,”
ati na.
20 Hatuka asēna,
Isuan aranga sin alian tak ei thō pe ha Dekapoli khua ngāi han tāng avahāia.
Hatuka chu mi dōrān aboi amandong u na.
Nāi nupangte khat athi le nupang ana khat rui
21 Hatuka Isua chu rakuanga sontiang varāla avān kān rēt lehan mipui ātampa akōma ahong anchun rēt u na.
Hava lāi han ama chu tipuilian kōla ala om a.
22 Hatuka chu ankhōmna ina ruaitu khat araming Jaira chu akōma ahonga.
Isua amu le ake kunga anboka.
23 Hatuka amān akōma:
“Ka nāi nupangte athi rang vit ani zei,
lungkham taka hong tānla ei hara ei dam theina ranga achunga na kut na hong bāng pe ro,”
ati na achālaka amathēma.
24 Hatuka ama bila Isua chu asēna.
Hatuka mipui ātampan avazīna,
achunga avāndel zuzut u na.
25 Hatuka chu nupang khat hi kum sōmleianni thīn ei mazān a om a.
26 Hava nupang hān daktor ātampa kōma an ena achālaka dūk ei tiar ani zeia.
Aloma anei dōrām ei thām zit ani zei.
Hanum nisela adam bet nēka anrikpe riama.
27 Hava nāi hān Isua rui ariata,
anūk tiang āta mipui kāra ahonga apuan chu ahong tōna.
28 Asik chu amān:
“Apuan duai ngal ka tōn ten,
dam boning,”
ati na ei mandon ani na.
29 Hatuka chu thīn ei mazān ha among pe lena,
Hanūk chu hava rikhua nāta adam zei ti ataksana alei riata.
30 Hatuka anlāiseka Isuan ama asūng āta sin thōtheina ranak asuak ti anriata.
Hatuka mipui tiang anhoia:
“Tu mo ka puan atōn?”
ati na arakela.
31 Hatuka azolāi ngāiin akōma:
“Mipuiin ei na hualbub na mu hale.
Hanum nisela:
‘Tu mo ana tōn,’
nei la ti?,”
ati u na.
32 Hanum nisela Isuan hava athōpu amu ranga alom pei tianga anhoia.
33 Hatuka nupang hān achunga sin anthō chu ariat chunga anchi le annōk chunga ahonga.
Amatona anboka akōma alom peia adik laka aril zita.
34 Hatuka amān akōma:
“Ka long,
nei iamna lehan na dam zei,
phūkdāia sē ta ro.
Na rikhua nāta na zōk zei,”
ati na.
35 Hanūk chu amān chong aril lāi tak han ankhōmna ina ruaitu khat in āta mi senkhat ahong u na:
“Na nāi nupang chu athi zei.
Ichang ual mo anānchūpu nei la manpōng rang?”
ati u na.
36 Hatuka chu Isuan achong hong ril u ngāi ha alei riat le ankhōmna ina ruaitupu kōma:
“Na ratha manta nō ro,
iam pei duai ro,”
ati na.
37 Hatuka Peter,
Jakob,
Hanūk chu Jakob aparual Johan rong nōk chu tutē ama azī ranga phal mak.
38 Hatuka ankhōmna ina ruaitupa in chu avasuak u na.
Isuan rahupui ei om ei anpōn u,
mi alei chap le alei ankhēk u avamuna.
39 Hatuka avalūta akōm u na:
“Ichanga mo rahupui le nei chap u?
Nāipangte chu
āthi la ni mak,
a-in kēng,”
Hatuka hava ngāi ha alom u na in āta amasuak zita.
Nāipangte anu le apa hanūk chu abila a om ngāi lim le nāipangte ei zālna muna avalūt u na.
41 Hatuka nāipangte kut asūra:
“Talitha Kumi!”
hava ti omzia chu “Nupang voibakte” ti na ani na.
Akōma:
“Anthui ro,
kei na ti ani zei,”
ati na.
42 Hatuka nupang sanāite chu anlāiseka ahong anthuia kal achōi lena.
Asik chu ama akum ha kum sōmleianni ani zeia.
Hatuka amāni chu achālaka aboi adong u na ati na chang re u mak.
43 Hatuka amān akōm u na:
“Hiva rui hi tū tēn re nō rase,”
ati na aman theia.
Hanūk chu anēk asāk apēk ranga chong arila.