Chong taksa ahong achang
1
1 Aphuta chu chong kēng a om.
Chong chu Pathian kōma a om.
Hatuka hava chong ha Pathian ani na.
2 Aphuta hava ha Pathian kōma a om ani na.
3 Alom peia ama zāra a om zit ani na.
Ānsin ngāi dōra hi ama nōk āta ānsin khat ngal om mak.
4 Ama kōm han damna a om a.
Hava damna ha miring ngāi ra-āng ani na.
5 Hava ra-āng chu azīng kāra ahong ēla.
Tenchu āzīngin hava lei maham thei mak.
6 Pathianin mi khat ei hong tīr a om a.
Ama araming chu Johan ani na.
7 Ra-āng rui ahong anriat ranga ama chu anriatpu ranga āhong ani na.
Ama zāra mi dōrān ei iam theina ranga.
8 Ama chu ra-āng ni mak.
Tenchu ra-āng rui ahong anriat ranga ahong kēng.
9 Hava ra-āng tatak ha mi tin ranga a ēl chu maniapūra ei hong.
10 Ra-āng chu maniapūra om ani na.
Maniapūr hi amān ei sin ani na,
tenchu maniapūrin ama lei riat mak.
11 Ama ei sin ngāi kōma ahonga tenchu ami ngāiin lei pom mak.
12 Tenchu ama āpom dōra chu Pathian nāi chang ranga ningneina apēka.
Ama raminga ei iam u sika.
13 Amāni ha thisen āta suak ni u mak.
Taksa ningōl atām ni mak.
Miring ei zōt ātām ni mak.
Tenchu Pathian āta anpiang kēng.
14 Hatuka chu hava chong ha miring taksa ahong achanga.
Koini ngāi bila ahong a oma.
Nāi Pasal nei salep Pain ei anlianpui anga ama ei anlianna chu nei mu.
Ama chu lungkhamna le chong taka ābit ani na.
15 Johanin ama rui tak ha ei hong manriata ankhēka:
“Arui kei na ril u ha ama hi ani zei.
Ka nūka ahongpu hin ei na hong khēl kēng ani zei.
Ama chu ka māna alei om sa ei ni sika,”
ati na
16 Koinīn na loma ama ei bitna nāta alom peia,
lungkhamna chunga lungkhamna nei man.
17 Pathianin dān rui chu Mosi kōma ahong pēka.
Tenchu lungkhamna le chongtak chu
Isua Krista nāta ahong kēng.
18 Tenchu Pathian hi tutēn āmu la om ngāi mak.
Pa rōp suama om Nāi Pasal nei salep rong kēng ama rui ahong apuang.
Baptispu Johan
chu Krista ni mak
Mt.3:1 -12 Mk 1:1 -8 Lk.3:1 -20
19 Hatuka Jihudi ngāiin:
“Tu mo na ni?”
ati na,
ānkel ranga Jerusalem āta chāizūng le Levi chi na mi ngāi ama kōma atīr u na.
Hatuka Johanin ei manriatna chong ei ril chu hiva hi ani.
20 Amān ip thak luia apuanga:
“Krista ni makung,”
ati na.
21 Hankēng amānīn arakel u na:
“Hanle tu mo na ni?
Elija mo na ni?”
ati u na.
Hatuka amān:
“Ni makung,”
ati na.
Hanle,
amānīn:
“Deari ha mo na ni?”
ati u na.
Hatuka:
“Amān ni makung,”
ati na amasanga.
22 Hatuka chu amānīn:
“Hanle tu mo na ni?
Mi ana honga tīr ngāi kōma nei vamasang theina ranga na ruia hin imo nei anti na manthei ro,”
ati u na.
23 Amān:
“ ‘Koi hi philchār rama
ānkhēkpu ha ka ni zei.’
Deari Isaian ei ti anga:
‘Puma lampui chu mandīn u ro,’
(Isa.40:3 )
ati,”
ati na.
24 Mi ei tīr u ngāi ha Pharisi ngāi bila mi ani u na.
25 Hatuka amānīn akōma:
“Nang chu Krista hām na ni nōka,
Elija hām na ni nōka,
deari hām na ni nōk anten,
ichanga mo baptisma nei pēk chachak?”
ati na arakel u na.
26 Johanin amasanga:
“Koiin tīna baptisma kei na pēk u.
Tenchu na kār u na nei riat u nōk mi khat ānding a om a.
27 Ama chu ka nūka āhong ani nakām ka māna alei om sa kēng.
Akekok khitna rī ngal āsūt rua ni makung,”
ati na.
28 Hiva rui ngāi dōra ei
omna chu Jordan dung varāla Bethabara khuana ani na.
Hava ha Johanin baptisma ei pēkna mun ani na.
Pathian Berate Isua
29 Zīng khua vāra han Johan akōma Isua chu ei hong alei mu na ei ti:
“En u ta,
Pathian Berate maniapūr siatna āchōi rang so.
30 Sova mi rui tak so kei ril ani zei.
Ka nūka mi āhong rangpu hi ka nēka ālian ani na.
Asik chu ka māna alei omsa ani na.
31 Ama chu kei hong riat nōk ani na.
Tenchu Pathianin ama chu Israel ngāi kōma ei manlang theina ranga koi chu tīa baptisma kei hong pēk kēng,”
ati na.
32 Hatuka chu Johanin ama ei riatna chong arila:
“Ratha chu vasu anga anvān āta honga chuma ka mu na,
ama chunga ahong a oma.
33 Ama chu kei hong riat nōk ani na.
Tenchu tīa baptisma āpēk ranga ana honga tīrpu hān ka kōm chong ei ril:
‘Ratha ahong achuma achunga ei hong omna mi tak ha Ratha Ānthiang le baptisma ana pēk u rang ani zei.’
34 Hava ha ka mu suana hiva hi Pathian Nāi Pasal kēng ati na kei hong riatpui thei ani zei,”
ati na.
Isua azolāi mānsa ngāi
35 Hatuka chu zīng khuavār rēta Johan le azolāi ngāi anni lehan andinga.
36 Isua kal honga chōia Johanin alei mu lāi han:
“En u ta,
Pathian Berate so,”
ati na.
37 Hatuka Johan azolāi anni ngāi hān achong ril ariat u na Isua anūk azī u na.
38 Isua anhoia anūk ei zī u amu na amāni kōm:
“Imo nei thūn u?”
ati na.
Amāni hān,
“Rabbi,
hon mo nei omna?”
ati u na.
Rabbi chu Mīnchūpu ti na ani na.
39 Amān akōm u na:
“Hong u ro,
mu u na ti,”
ati pe na.
Hatuka asē u na ei omna chu avamu u na.
Hava nikhua len han ama bila a om u na.
Hava lāi tak ha khului dār manli tāng ni
zei ni.
40 Johan achong ariata Isua nūk āzī anni ngāi bila angkhat chu Andria,
Simon Peter anāipa ani na.
41 Ama hi mān khīta ei thō chu aparual Simon antongpui ani na.
Ama kōma han:
“Koinīn Krista na mu zei,”
ati na.
Krista a omzia chu Sariak anthipu ti na ani na.
42 Andria hān Isua kōma aruaia.
Isuan ama tiang alei ena:
“Nang Jona nāi pasal Simon hi Kipha antīn nati.”
Kipha ti na chu lung ti na ani na.
Philip le Nathaniel Isuan apāi
43 Zīng khua vār rēt han Isua chu Galili rama ā sērang ei zōt ani zei.
Hankēng Philip chu avamu na:
“Ka nūk na hong zī ro,”
ati na.
44 Philip chu Betsaida khuana mi Andria le Peter omna khua dēna mi ani na.
45 Philip hān Nathaniel avān tongpuia:
“Mosi Lekhabūna le deari ngāiin um ama ruia ei maziak u ha koinīn na mu zei.
Ama ha Nazaret khuana Isua,
Joseph anāi pasal ani,”
ati na.
46 Hatuka Nathaniel hān:
“Nazaret khua nāta āsa angkhatte ngal hi asuak mo thei?”
ati na.
Philippin ama kōma:
“Hong tānla hong en ro,”
ati na.
47 Isuan Nathaniel chu ama tianga ei hong amu na arui alei rila:
“Enta,
Israel mi tatak so,
amalung sūnga anhuangna reng ābui,”
ati na.
48 Nathaniel hān:
“Hontin mo nei na riat?”
ati na.
Hatuka Isuan:
“Philippin ana kui mān āta theichang kung thuaia nei om kei na mu kēng,”
ati na amasanga.
49 Nathaniel hān:
“Rabbi,
nang hi Pathian Nāi Pasal na ni,
Israel ngāi rēng na ni,”
ati na amasanga.
50 Isuan ama kōma:
“Theichang kung thuaia ka na mu kei na ti sika mo nei iam?
Hiva ngāi nēka rui ālian la mūn na ti,”
ati na amasanga.
51 Hatuka chu amān Nathaniel kōma:
“Taktaka kei na ril ani zei,
vānram anlong intia Pathian vānpalāi ngāiin Miring Nāi Pasal tak chunga hin āchum ākal la mu u na ti,”
ati na.