Isua thī nāta anthui rēt
24
1 Tenchu hapta nikhua mānsa ārkhuan chunga marim ahui ei sin u ngāi achōia thāna asē u na.
Amāni bila atei nupang senkhat um asē u na.
2 Hatuka thāna lungpa ha ankhāia avamu u na.
3 Tenchu asūng avalūt u na Puma Isua aruak chu vamu u mak.
4 Hatuka hava sika han aboi adong u lāi tak han enta,
puan avāra aēl sabak ansil pasal anni akōl u na ahong anding u na.
5 Hatuka arathāta rahei u na thuai tiang amāi athup u na.
Hava lāi tak han hava pasal anni ngāi hān amāni ranga:
“Ichanga mo athi ngāi kāra adam chu nei ravān u?
6 Ama chu hiva hin om lāi mak,
anthui zei.
Galili rama a om lāi han imo ei na ti u ha re u lāi mak che mo?
7 Asik chu:
‘Miring Nāi Pasal hi mi salui ngāi kuta anbetōk intia,
krosa tār unti hanūk chu nīnthum nikhuana anthui
rēt inti,’
ti rui ha,”
ati u na.
8 Hankēng ama chong ngāi dōra amalung u na ahong achuia.
9 Thān āta ahong akīr u na azolāi sōmleikhat ngāi le atei ngāi kōma hiva rui ngāi hi avamantung zit u na.
10 Hava nupang ngāi bila a om ani zei,
Magdalini Mari,
Joanna,
Jakob anu Mari le nupang atei ngāiin kuitīr ngāi kōma hava chong ngāi ha avamantung u na.
11 Tenchu achong ril u ngāi dōra ha amāni ranga chong koronga chong anga abe pe u na.
Hasik han achong ril u ngāi iam pe u mak.
12 Hanum nisela Peter chu anthuia thāna atāna asēna.
Hatuka asūnga anbūna avaena,
puan asa zāt ngāi rong anbuk chīta avamuna.
Havan tin han alei om sika ati na chang
re mak ahong akīra ei sē ani na.
Emmau lampuia Isua anlang
Mk.16:12 -13
13 Hava nikhua dēn han mi pasal anni hi khua angkhat araming Emmau ei ti u han asē u na.
Hava khua ha Jerusalem khopui āta kilomitar sōmleikhat dām ala ani na.
14 Amānīn havana rui asuak ngāi dōra ruia anril tira asē u na.
15 Hatuka hintin hin ahong ani na,
amāni ha anrila achong u lāi tak han,
Isua apum len ha abil u na ahonga kal achōipui u na.
16 Tenchu ama ati na ei riat thei u nōkna rang anga amit u ngāi azīng aphuazek u na.
17 Amān akōm u na:
“Na kal chōi u balama hong zāt rui mo nei anril tir u?
Ichanga mo na māi ei anngūi u?”
ati na arakela.
18 Hatuka amāni bila angkhat araming Kleopa hān:
“Jerusalema nang rong mo khual na ni zei?
Hiva nikhua kār sūnga hong zazāt rui mo asuak hi,
riat ngal mak che mo?”
ati na arakela.
19 Akōm u na:
“Hong zāt rui ngāi mo?”
ati na arakela.
Hatuka amānīn amasanga:
“Nazareta Isua rui.
Ama chu Pathian le miring dōra mit muna om dāna le chonga ranak anei le deari raming anthang khat ani na.
20 Hanūk chu chāizūng ngāi le koini na nama ulian ngāiin thīna ten peia ei mansūr u,
hava suale chu krosa ei tār u ngāi rui.
21 Tenchu koinīn na lei mangang chu,
ama hīn Israel nam anzōk rang ani na.
Hava rong ha la ni mak,
hiva rui ngāi hi aviana le chu nīnthum ani zei.
22 Hanūk rēt chu,
koini na bila anchel nupang senkhat ngāiin achālaka koini na boi amandong u na.
Avian ārkhuan chunga thāna asē u na.
23 Tenchu aruak vamu u mak.
Hatuka ahong akīr u na vānpalāi ngāiin um na mu ati na ahong ril u na.
Hava ngāi hān:
‘Ama chu adam kēng zei,’
ati u na.
24 Hanūk chu koini na lōm senkhat ngāi thāna asē u na nupang ngāiin ei ril u anga avamu u.
Tenchu ama chu vamu u mak,’ ”
ati u na.
25 Hatuka amān akōm u na:
“Deari ngāi chong ril dōra aiam ranga āmo le malung asēt ngāi!
26 Krista hān hava rui ngāi dōra atiar zita ni mak mo ama ei liannana ei lūt rang?”
ati na.
27 Hatuka chu Mosi le deari ngāi len āta anphuta,
Pathian lekhana ama ruia anziak ngāi dōra omzia akōm u na aril pe na.
28 Hatuka ei pan u na rang khua avasuak u le ama chu ala bet uala ala sē rang om athō na.
29 Tenchu:
“Koini na bila om ta ro,”
ati na akhāpa amathēm sabak u na.
Asik chu:
“Zān ahong azīng rang ani zei,
hanūk chu nikhuam abui rang ani zei,”
ati u na.
Hatuka amāni bila a om ranga in sūnga alūta.
30 Hankēng bu nēk ranga ansut u na ruti alāka,
bōr apēka,
akhiaka akōm u na apēka.
31 Hatuka amit u ngāi anlongpena,
amēl ariat thei u na.
Hatuka amit mu u nāta anpei diaia.
32 Hatuka amāni le amāni anril u na:
“Lampuia ana chongpui tira Pathian lekhana chong ngāi ana ril lāi han koini ngāi malung ha har vung len mak mo?”
ati u na.
33 Hatuka hava lāi tak len han anthui u na Jerusalema akīr len u.
Hatuka kuitīr Sōmleikhat ngāi
le atei alōm u ngāi munkhat
alei ankhōm ngāi avamu u na.
34 Amānīn:
“Puma chu anthui tatak kēng ani zei,
Simon akōmām anlang zei,”
ati u na.
35 Hatuka chu lampuia hong zazāt rui mo ei om hanūk chu ruti akhiak lāia amēl ei riat thei rui ngāi ha aril u na.
Zolāi ngāi kōma Isua anlang
36 Hava ngāi rui anril u lāi tak han Isua apum len amāni bila ahong andinga akōm u na:
“Phūkdāina na kōm u na om rase,”
ati na.
37 Tenchu amāni ha ralīm kēng nei mu ati na amandon u
na arathātana achi sabak u.
38 Hatuka amān akōm u na:
“Ichang mo na malung u ngal sōk ei cha?
Hanūk chu ichanga mo na malung u na ngal andonna nei ma suak u?
39 Ka kut ngāi le ka ke ngāi hi en u ta,
koi hi ka ni zei!
Na tōn u tān en u ta,
koi kei dōn nei na mu u anga ralīm chu taksa le ru dōn mak,”
ati na.
40 Hiva chong ei rila akōm u na akut ngāi le ake ngāi aman mu na.
41 Tenchu arāi asān rahei u na la iam thei u mak ati na chang re u mak.
Hatuka akōm u na:
“Na bil u na hiva hin hongte mo asāk rua mo na dōn u?”
ati na.
44 Hava suale amāni kōma:
“Nangni ngāi bila ka om lāi han hiva hi kei na ril u ani na.
Mosi dānbuna,
deari ngāi lekhabūna hanūk chu Anpākna lekhabūna ka rui anziak ngāi dōra chu ei hong kip zit rang,”
ati na.
45 Hatuka Pathian lekhana chong ei riat thei u na ranga amalung u amalong pena.
46 Hatuka akōm u na:
“Hintin hin anziak ani na,
hanūk chu hava ang taka,
Krista chu antak tiar intia,
nīnthum nikhuana athi ngāi bil āta anthui inti.
47 Hanūk chu ama raminga malung ankhīrna le āsia andualna rui chu Jerusalem khopui āta anphuta nam tin kōma ril unti.
48 Hiva ngāi dōra ariatpui chu nangni hi na ni u na.
49 Hanūk chu rangāi u ro,
Ka Pa chongtin ha na chung u na hong tīr ka ti.
Tenchu chungvān āta sinthōtheina le han anthuama na om u māseng chu hiva Jerusalem khopuia hin om chian u ro,”
ati na.
Isua chungvāna akal
50 Hatuka Bethani khua ei
hek tenpei amāni ngāi aruaia.
Hatuka akut alānga bōr apēka.
51 Hatuka hintin hin ani na,
bōr apēk lāi tak han amāni le ansena chungvān tiang akala.