Isua aningneina ruia ankelna
20
1 Ni khat chu Pathian biak ina mi amanchūna,
Pathian chong thang ahui aril lāi tak han,
chāizūng ngāi le dān mīnchū ngāi,
Jihudi pātar ngāi bila senkhat akōm ahong u na.
2 Hatuka akōma:
“Hong zāt ningneina le mo hiva ngāi hi nei thō chachak?
Tu mo hiva ningneina ngal ana pēk?
Na ril ro,”
ati na arakel u na.
3 Hatuka amān amasanga:
“Hano ten koi um chong bāi khat na rakel u ka ti,
na ril u ro.
4 Johan abaptisma pēk ha anvān āta mo ole miring āta mo?”
ati na arakela.
5 Hatuka amānīn anininga hintin hin ankelna adōn u na,
koinīn:
“ ‘Anvān āta,’
na ti ten.
‘Hanle ichanga mo ama nei iam u nōk?’
na tīnti.
6 Hanūk chu koinīn:
‘Miring āta,’
na ti rēt ten,
mi dōrān lung le na dēng unti.
Asik chu Johan chu mi dōrān deari,”
ani,
ati na ei iam u ani na.
7 Hasika han amānīn amasang u na:
“Hava ha hontiang āta mo,
riat mak me,”
ati u na.
8 Hankēng Isuan amasanga:
“Hano ten koi um hong zāt ningneina le hiva ngāi kei thō mo,
na ril u nō ning,”
ati na.
Gerep rahuan anrāk
ngāi lehan ankhīna
9 Hatuka mipui kōma hiva ankhīna chong hi arila:
“Mi khatin gerep rahuan khat asina.
Hatuka chu hava ha rahuan athō ngāi kuta aman rāka nikhua sōtpa ranga ram ateia asēna.
10 Hatuka amara kham hun ahong asuakle gerep mara ei man rang bāt alei apēka avalāk ranga asuak khat anrāk ngāi kōma atīra.
Tenchu hava gerep rahuan anrāk ngāiin alei zēm sabak u na,
kut koronga alei makhīr u na.
11 Hanūk chu suak atei atīr rēta,
hava nāi um alei zēm rēt u na.
Hatuka māimōk asak u na,
kut korong dēna alei makhīr rēt u na.
12 Hanūk rēt chu anthumna atīr rēta,
hava hām apop aliama azēm u na apanga apei rak u na.
13 Hatuka gerep rahuan pumapān:
‘Hong mo kei thō rang ani zei?
Hano ten,
ka nāi pasal madit nei salep hi tīr ka ti,
ama chu lalchi lei thō bet u bo ni,’
ati na andona.
14 Tenchu rahuan anrāk ngāiin alei mu na alei anril u na:
‘Hiva nāi hi kēng dōnglua aluak rang.
Hasik han hong u ro,
thāta pei u rei.
Hatuka adōnglua chu koini ta chang bo ni,’
ati u na.
15 Hava sika han rahuan āta anuka amasuaka athat u na.
Hanle hava gerep rahuan pumapān amāni chunga hontin mo thō ni?
16 Ama chu honga rahuan athō ngāi chu hong that zit intia,
hatuka rahuan chu mi tei kuta betōk inti,”
ati na.
Mipui ngāiin hava chong ariat u na:
“Havan tin han ni nō rase ba,”
ati u na.
17 Tenchu Isuan amāni tiang anhoi laka:
“Lekhabu ānthianga hiva chong anziak omzia hi hong zāt mo?
‘In asin ngāiin lung ei pei u
ngēt ha,
In akila lung alu khīt ahong
achanga,’
(Sām 118:22 )
ti ha.
18 Tukareng hiva lung chunga achul tak chu azōi chita kiak inti,
hanūk chu hava lungin ei dēng tak um adi changa zōi chit inti,”
ati na.
19 Hatuka hava lāi taka han chāizūng ngāi le dān mīnnchu ngāiin ama asūrna aval u na.
Tenchu amānīn mipui achi u na.
Asik chu hiva ankhīna chong hi amāni derdīna ei ril kēng ti ha ariat u na.
Kaisar kōma siachōi apēk rui
20 Hatuka ama chunga amit aman zūl chian u na,
mi dik om aphuazek om athō u na maruka mi sī ngāi ha ama chong ril masial asūr ranga atīr u na.
Asik chu nangkana ningneina dōn ram oppu matona ruiril ranga ei betōk thei u na ranga.
21 Hatuka chu amānīn akōma arakel u na:
“Mīnchūpu,
nangin adik taka chong nei ril le,
mi nei manchū chachak.
Hanūk chu tutē nei mandang abuia chongtaka Pathian rui mi nei manchū ti nei riat ani na.
22 Hanle,
Kaisar akōma siachōi apēk hi koini na ranga adik mo adik nōk mo?”
ati u na.
23 Tenchu Isuan amāni azia thei u ariata akōm u na:
“Ichang mo nei na mansin u?
24 Rāngkachak dangka chēng khat na man mu u ta.
Hava chunga han tu ramīl le tu raming mo achuang?”
ati na.
25 Amānīn:
“Kaisar,”
ati u na.
Hankeng amān akōm u na:
“Kaisar ta chu Kaisar kōma pe u ro.
Pathian ta chu Pathian kōma pe u ro,”
ati na.
26 Havan tin han amānīn mipui makunga achong ril masial chu sūr thei u mak.
Tenchu amān ei masangna chu aboi adong u na adāi rek u na.
Āthi nāta anthuirētna
le inneina rui
27 Hatuka Sadduki ngāi bila senkhat,
athi nāta anthui rētna om mak ati ngāi ha akōma ahong u na ahong rakel u na:
28 “Mīnchūpu,
Mosīn koini ranga dān ei maziaka ei māk chu,
pasal khat pei anungāk amāka nāi dōn luia athi ten,
aparualpa ranga chi andamna ranga athipa nungāk ha aparualin la rase.
29 Hano ten,
ama hān parual sari a nei a,
ulian khītin nungāk alāka nāi dōn luia athi na.
30 Aparual anni changnān hava nungāk ha alāk rēta,
tenchu nāi dōn luia athi rēta.
31 Aparual anthum changnān hantin dēn han alāk rēta.
Hantitin han parual sari ngāi hān tutē nāi nei pui luia athi kiar u na.
32 Ahek khīta chu hava nupang hām athīna.
33 Hantin han aniten,
athi nāta anthui rētna nikhua tika hava nupang ha tu nungāk mo ei chang rang?
Asik chu mi sari ngāiin ei lāk kiar u ani na,”
ati u na.
34 Hatuka Isuan amasanga:
“Atun taka hi maniapūra mi ngāi chu nungāk anlāk ruathar anlāk u na,
anom ansāk u na.
35 Tenchu nangkan sova hun ahong rang tika athi āta anthui rētna achang ranga anruat sua ngāi ranga chu nungāk anlāk ruathar anlāk,
anom ansāk u lāi nō ni.
36 Hanūk chu hava panga athīm thi pial u lāi nō ni.
Asik chu vānpalāi ngāi ang rang kēng ani u zeia.
Athi āta anthui rētna nāi ei chang u sika Pathian nāi chang unti.
37 Athi ngāi athara anthui rēta om unti ti Mosīn um tūka moi achuang ruia han ei hong manlang ani na.
Asik chu Puma rang:
‘Abraham Pathian,
Isaak Pathian,
Jakob Pathian,’
(Ant.3:6 )
ati na.
38 Ama chu athi ngāi Pathian ni mak,
adam ngāi Pathian kēng,
asik chu ama sika kēng mi dōra hi adama ei om,”
ati na.
39 Hatuka dān mīnchū ngāi senkhatin:
“Mīnchūpu,
nei ril ngāi dōra ha adik zit,”
ati na amasanga.
40 Tutēn chong atei itē ankel ngam om u lāi mak.
Krista hi tu Nāi Pasal mo?
41 Hatuka amān akōm u na:
“Hanle hontin mo mīn Krista hi David achina Nāi Pasal ei ti u?
ati na arakela.
42 Asik chu David ama lenin Sām ziaka ati na:
‘Pumān ka Puma kōma ei ti,
Ka chang tianga ansut ro.
43 Na rāldui ngāi na kepha
siakna mun ka manchang
māseng,’
(Sām 110:1 )
ati na.
44 Davidan ama rang ‘Puma,’
ati na apāia.
Hanle hontin mo ama anāi pasal ei ni thei rang?”
ati na.
45 Hatuka mi dōrān ei rangāi thei u na ranga azolāi ngāi kōma arila:
46 “Dān mīnchū ngāi kōm āta anrēng u ro.
Amāni chu kultāi anchualpa ngāi ansila achei kēng ei zōt u,
hanūk chu bazār muna mīn ei mōk u rang,
ankhōmna ina sutmun ansāng le bu nēkna muna sutmun ahuia ansut kēng ei zōt u.
47 Amānīn arōng ngāi dōnglua ei lua u.
Tenchu mi mit muna rang khopa aseipa ngāi bōr azong u chachaka.
Hava ngāi ha ruiril tika aliaktena adūk na unti,”
ati na.