Zakaia siachōi ansuangpu
19
1 Hanūk chu Isua Jeriko apal phita khuana alūta asēna.
2 Hava han mi khat araming Zakaia ati na siachōi ansuang ngāi bila ulian khat a om a,
hanūk chu āneipa khat ani na.
3 Hatuka amān Isua hi tu mo ati na āmu rang azōta,
tenchu adung ei bonga mipui ei tam sabak sika mu thei mak.
4 Hasik han atāna Isua āmu ranga apūta razīl kunga alei vakala.
Asik chu hava lampui tiang han Isua ei hong rang ani na.
5 Isua hava mun tak ha avasuakle chung tiang atanga akōma:
“Zakaia,
anrapa hong chum ro,
avian na ina khual kei chang rang anāng,”
ati na.
6 Hasik han anrapa ahong chuma rāisān taka aman tunga.
7 Hatuka hava ha lokōn amu u na.
“Mi salui ina khual avatung ranga asē sole!”
ati u na alom u na achiar u na.
8 Tenchu Zakaia andinga Puma kōma:
“Enta,
Puma,
atun āta kei nei dōra anbāk anriang ngāi ranga pe ka ti.
Hanūk chu mi kei huanga kei lāk a om ten hava ha thep manlina thuan ka ti,”
ati na.
9 Hatuka Isuan akōma:
“Avian hiva ina hin sandamna ahong atung zei,
asik chu ama hīm Abraham anāi pasal khat ani na.
10 Asik chu Miring Nāi Pasal hi anpei ngāi anroka damna apēk ranga ahong kēng ka ni,”
ati na.
Sumsenru sōm le suak
sōm ngāi lehan ankhīna
11 Hatuka havan āta Jerusalem khopui ha aliak la lāi mak.
Hatuka hava achong ngāi arangāi u lāi han amānīn Pathian ram chu anrapa hong anlang inti ati na ei mandon u ani na,
hasik han hiva ankhīna chong hi arila:
12 “Malal angkhat hi arēng changna rang avalāk suale ahong akīr rēt ranga ram alāpana asēna.
13 Asē rang tiang han asuak dōn sōm ngāi akuia akōm u na sumsenru sōm seng apēk chipa:
‘Ka honga kīr rēt māseng hiva lehin lei anlō u tān lei maphung u ro,’
ati na.
14 Tenchu arama mi ngāiin amumāk u na,
hasik han anūka palāi atīr u na:
‘Hiva mi hin koini na chunga rui aril ranga zōt mak me,’
ati na chong aman sē u na.
15 Hanum nisela ama chu rēng akāia ahong akīra sum ei pēk asuak ngāi avamankuia.
Hatuka itutuk mo hava lehan alei maphung thei ani u zei ti ariat ranga ei kui ani na.
16 Hatuka angkhat changnapu ahonga:
‘Ka pu,
na sum lehan hanūk sumsenru sōm le alei apung zei,’
ati na.
17 Hatuka apumapān akōma:
‘Nang chu ka suak asa na ni,
rāisān a om.
Asik chu rui asīnte chunga aiam rua nei ni sika,
kho sōm chunga ruirilna la ro,’
ati na.
18 Hanūk chu anni changnapu ahonga:
‘Ka pu,
na sum lehan hanūk sumsenru rangā le alei apung zei,’
ati na.
19 Hatuka ama kōm um ati na:
‘Kho rangā chunga ruirilna la ro,’
ati na.
20 Hava suale nukhōna angkhat achangpu ahong rēta:
‘Ka pu,
enta,
na sumsenru hi hile,
hiva hi puan bongtena ka thuama ka siak rap.
21 Asik chu arāng sabak mi nei ni sika kei na chi ani na.
Asik chu nangin nei siak nōk ha nei lāk chachak.
Hanūk chu nangin nei tu nōk ha nei āt chachaka,’
ati na.
22 Hatuka apumapān akōma:
‘Nang suak sa lui,
na mūra chong asuak len lehan na chunga āsia na manlō ka ti.
Nangin arāng kei ni hi nei na riat,
hanūk chu kei siak nōk ha kei lāk chachak.
Hanūk chu kei tu nōk ha kei āt chachak ti hi nei na riat.
23 Ichang mo ka sum ha sum alei anphung ngāi kōma nei siak nōk?
Asik chu ka hong akīr tika hava ha abi le alei pungna amaniang le ile kei hong man rang ani na,’
ati na.
24 Hatuka akōla anding ngāi kōma:
‘Hava nāi akōma āta sum ha apot u tānla sumsen dangkaru sōm adōnpu kōma pe u ro,’
ati na.
25 Tenchu amānīn:
‘Ka pu,
ama chu sumsen dangkaru sōm pei adōn zei hale,’
ati u na.
26 Amān amasanga:
‘Kei na ti ani u zei,
adōnpu kōma ātama anpēk intia,
ten adōn nōkpu kōma ei dōnte ngal ha anpot zit inti.
27 Hatuka achung u na rēng kei chang rang zōt lui koi ana dui ngāi ha,
hong ruai u tānla ka matona that u ro,’
ati,”
ati na.
Zuina lehan Isua
Jerusalem alūt
28 Hatuka chu Isuan hiva chong ngāi aril suale Jerusalem khopui apan ranga maton asonga.
29 Hankēng chu Maruan mual panga khua Betphage le Bethani khua ei ti u na chu ahong anāi le azolāi anni ngāi atīra:
30 “Na matona khuana son sē u tānla,
sova son na valūt phing u le sakuarpar ate khat anthunga vamu un na ti.
Hava chunga han tutē la chuang ngāi lui,
hava ha sūt u tān hong chōi u ro.
31 Hatuka mīn:
‘Ichanga mo nei sūt u?’
ati na ana rakel ten:
‘Pumān hiva hi anāng,’
ti u ro,”
ati na.
32 Hatuka matona ei tīr ngāi ha asē u na,
akōm u na ei ti ang taka avamu u na.
33 Hatuka sakuarparte chu asūt u lāi tak han apuma ngāiin:
“Ichanga mo sakuarparte nei sūt u?”
ati u na.
34 Hatuka amānīn:
“Pumān hiva hi anāng,”
ati u na.
35 Hatuka chu Isua kōma ahong chōi u na.
Hatuka sakuarparte chunga apuan u ngāi adāp u na,
achunga Isua aman chuang u na.
36 Hatuka Isua ei sēna rang lampuia apuan u ngāi alei pha u na.
37 Hatuka hava mun ha avasuak vit le Maruan mual āta ahong achum lampui ahong asuak u na.
Hava lāi han aruaisi mipui pumpuin amān tichang abui sin ei thō ngāi dōra ei mu u sika rāisāna ankhēka Pathian aman pāk u na:
38 “Puma raminga Rēng ahong
chu anpāka om rase!
Anvāna anngoina om rase,
hatuka chungnung khīta
anlianna om rase,”
(Sām 118:26 )
ati u na.
39 Hatuka mipui bila Pharisi ngāi senkhat Isua kōma:
“Mīnchūpu,
na zolāi ngāi hi adāirek ranga na ngo pe ro,”
ati u na.
40 Hatuka amān amasanga:
“Kei na ti ani u zei,
hiva ngāi hi adāirek u ten,
lungte ngāi hi ankhēk len unti hile,”
ati na.
41 Hatuka Jerusalem ahong dēp ual le khopui chu a ena achap sabaka:
42 “O aviana hin na kōma phūkdāina honga chōi hi nangin lei riat tānla chu!
Tenchu atun hava ha na mit mu ranga anthup kēng ani zei.
43 Hatuka chu na rang nikhua la hong intia hava tika na rāldui ngāiin rakul sin untia,
na hual unti,
kil tin āta na khum rap unti.
44 Nang le na sūnga a om na nāi ngāi dōra phila na thīna na pei untia,
na chunga lungte chunga lungte khat ngal ankam nō ni.
Asik chu lungkham huna Pathianin ana hong thīr lāi han nangin lei riat lāi mak che,”
ti ha ani na.
Isua Pathian biak ina alūt
45 Hatuka Pathian biak ina avalūta,
hava na neinun alei azuar le anchōk ngāi amasuak zita.
46 Akōm u na:
“ ‘Ka in chu bōr zongna in
kēng ei anti rang.’
Tenchu nangnīn hava ha
‘misuam ngāi omna khura
nei sin u,’
ti anziak ani,”
ati na.