Arōngnu tholōm pēk rui
Mk.12:41 -44
21
1 Hatuka Isua anhoia a en le chu,
anei ngāiin biak ina nuam pēk sum siakna muna nuam pēk sum ei pēk u ngāi amu na.
2 Hatuka chu arōng anriang khatin siki anni bak ei hong siak hām amu na.
3 Hatuka amāni kōma:
“Chong tataka kei na ril ani u zei,
mi tei mi tei ngāi nēka hiva arōng anriangin ei hong pēk hi ātam khīta.
4 Asik chu hiva mi tei ngāi dōrān chu ei dōn u maniang ngāi āta kēng ei hong pēk u.
Tenchu hiva arōngin chu abui chungām ei damna ranga ei dōn salep ha apēk zita,”
ati na.
Hun hekna sinsiana
5 Hatuka chu azolāi senkhatin Pathian biak in,
lung āsapa ngāi le hanūk chu neinun anpēk ngāi lehan ituk mo ei anliangzia u rui arila.
6 Hatuka amān hava lāi han:
“Tenchu hiva nei mu u ngāi hi lung khat chunga lung khat ngal ei ankam nōkna rang hun ahong asuak rang ani zei.
Aloma achiama anpei zit inti,”
ati na.
7 Hatuka amānīn akōma:
“Mīnchūpu,
hava ngāi dōra ha hotik mo ei hong om rang?
Hanūk chu hava ngāi ahong a om rang tiang hong zāt sinsiana ngāi mo ei om rang?”
ati na arakel u na.
8 Amān akōm u na:
“Lampui atei nei pan u nōkna ranga anrēng u ro.
Asik chu ka raming achōia mi tampa hong untia,
‘Koi hi Krista ka ni zei,’
hanūk rēt chu ‘Hun ahong asuak zei,’
hong ti unti.
Tenchu hava ngāi nūk zī u nō ro.
9 Hatuka chu anduina rahu le anbuaina thang na riat u le,
na ratha manta u nō ro.
Asik chu hava ngāi ha ei hong om mānsa ranga ngal ani na.
Tenchu hava ha hun ei hekna rang la ni mak,”
ati na.
10 Hatuka akōm u na:
“Nam le nam andui unti,
ram atei le ram atei andui unti.
11 Ninu anrikpa ngāi hong inti,
mun ateteia māitām chul inti,
rikhua hong lēng inti.
Anvāna ratha tākpa ngāi le sinsiana lianpa ngāi hong anlang inti.
12 Tenchu hava ngāi dōra ahong asuakmān mīn na sūra na betōk untia,
na sinsak unti,
ankhōmna ina le lung ina na ruai unti.
Koi ka raming sika rēng ngāi le ram oppu ngāi matona na ruai unti.
13 Tenchu hava ha amāni kōma ka ruia anriatpu
nei chang theina u na ranga na rang u na hun asa chang inti.
14 Tenchu na malung mandettit u ro.
Asik chu hontin mo nei masang u rang ati na andon nāng u mak chena.
15 Asik chu nangni anadui ngāi dōrān ei na masang thei u nōkna rang le ei na makhal thei u nōkna ranga hong zāt chong le hianna mo na pe u ka ti.
16 Hanūk chu na nu na pa,
na parual ngāi,
na unāi ngāi,
na mal ngāiin athat ranga na betōk unti.
Senkhat chu athat um na that unti.
17 Koi ka sika mi dōrān na mumāk unti.
18 Hanum nisela na lu u na sam sangkhat ngal anpei nō ni.
19 Na diartit u anten,
nei dam u na zōkpui un na ti.
20 Hatuka chu sipai ngāiin Jerusalem khopui ei hual u na mu u tika hava khopui ei anpei rang anāi zei ti riat un na ti.
21 Hava tika chu Judia rama a om ngāi chu muala varot u rase.
Khopui sūnga a om ngāi chu apanga suak u nō rase.
Khuana a om ngāi chu khopui sūnga valūt u nō rase.
22 Asik chu hava nikhua ha phuba lākna nikhua ani na,
Lekhabu ānthianga anziak dōra ei hong kipna rang nikhua ani na.
23 Hava nikhuana anrāi ngāi le ranu nēk nāite dōn nu ngāi dingmun chu achān antak rang banu!
Asik chu hava ram sūnga achālaka antakna ei hong suak rang ani na.
Hanūk chu hava nam ngāi chunga taksitna ei hong tung rang ani na.
24 Hanūk chu khendāi le anthat untia,
nam tin ngāi kōma selkeia anruai unti.
Hanūk chu Jentail ngāi hun anzui sua māseng chu Jerusalem khopui chu Jentail ngāiin ake le achīl unti.
Miring Nāi Pasal
ei hong rang rui
25 Hatuka ani,
tha,
ārsi ngāia,
sinsiana tampa anlang inti.
Maniapūra nam atei chunga antakna hong om inti.
Tipuilian le tiduār ansoka rahuna aratha ta unti.
26 Rathatākna le ramuala anchi rua ei hong om rang rui andona anmoia om unti.
Asik chu anvān tianga alian ngāi dōra annīk unti.
27 Hava hun tika Miring Nāi Pasal chu achālaka thōtheina le anlian chunga ansūm bila ahonga mu unti.
28 Hava ngāi dōra ei om rang anphut le,
chung tiang anhoi u tān,
na lu mansāng u ro.
Asik chu nangni ngāi nei zōk u na rang hun ahong anāi zei,”
ati na.
Theichang kung lehan ankhīna
29 Hava suale akōm u na
hiva ankhīna chong hi arila:
“Theichang kung le thingkung atei ngāi mansin u ro.
30 Abua ei ancher na mu u le,
pāmsāl ahong anāi zei ati na nangni lenin na riat thei u na.
31 Hantin han nangnīm hava ngāi a omzia na mu u le,
Pathian ram chu ahong anāi zei ati na riat thei u ro.
32 Chong tataka kei na ril ani u zei,
hiva ngāi dōra ahong
akip sua māseng chu hiva huna nam ngāi hi anpei pial u nō ni.
33 Ramual le anvān anpei inti,
tenchu ka chong ngāi chu tāituana anpei pial nō ni.
34 Tenchu anrēng u ro,
asik chu na malung u anbuaia,
anri anhāia,
hi damsūng ruia lunghāngnān dok ei na manchuai u nōkna ranga.
Hanūk chu hava nikhua ha chāngte anlāiseka ei ankhit anga riat lui kāra na chung u na ei hong suak rak nōkna ranga.
35 Asik chu hava nikhua ha ramual pumpuia a om ngāi dōra chunga ei hong suak rak rang ani na.
36 Hasika han,
hiva ngāi dōra ahong asuak rang tika azōk hiaia nei om thei u na rang le Miring Nāi Pasal makunga nei anding thei u na ranga alom peia kongtina ameng chiana bōrzong babang u ro,”
ati na.
37 Hatuka Isua chu anikhuan tina Pathian biak ina mi amanchū chachaka.
Tenchu azān tina asuaka Maruan mual ei ti u han avariak chachaka.
38 Hatuka mi dōra
chu zīngphit mānsana achong anngāi ranga biak ina ahong u na.