Anrēngna chong le lungngamna chong
12
1 Hava sūnga han kēng mipui asāng asēt ahong anbūma amāni le amāni andelpol u lāi han mānsana Isuan azolāi ngāi kōma:
“Hiva Pharisi ngāi chol,
arothol āta anrēng u ro.
2 Asik
chu anlang nōk rang ānhīp itē om mak,
hanūk chu anpuang nōk
rang āthup um itē om mak.
3 Asik chu azīng kāra nei ril u ha sūn avār langa anril inti.
Hanūk chu inkila kuar maruka na chong ril
ha inchung sīpa tāng anhāi inti.
4 Ka lōm ngāi,
kei na ril ani u zei,
taksa athat suale nukhōna itē thōthei lui ngāi ha achi u nō ro.
5 Tenchu tu mo nei chi u rang na ril u ka ti,
taksa athat suanam antakna muna ana pei thei ningneina adōn ha achi u ro.
Ani,
hava ha achī u ro.
6 Vachek rangā hi poisa anni le anzuar mak mo?
Tenchu hava ngāi bila angkhatte ngal Pathianin mangil mak.
7 Na lu u na sam ngāi ngal ha antel zit kēng.
Hasik han āchi u nō ro,
asik chu vachek ātampa nēka ālu kēng na ni u.
8 Hatuka kei na ril ani u zei,
tukareng miring matona koi anariat chu Pathian vānpalāi ngāi maton ām Miring Nāi Pasalin um riat inti.
9 Tenchu koi ana riat nōk tak chu Pathian vānpalāi ngāi maton ām riat nō ning.
10 Tukareng Miring Nāi Pasal siat aril chu lāndual thei inti.
Tenchu Ratha Ānthiang siat aril chu andual thei pial nō ni.
11 Hatuka mīn ankhōmna ina ruirilpu le ningneina adōn ngāi matona na ruai unti.
Hava tika hontin mo nei anrung u rang le imo nei ti u rang ati na andon u nō ro.
12 Asik chu hava hun taka han hong zāt mo nei ril u rang ha hava ha Ratha Ānthiangin na hong ril unti,”
ati na.
Ānchong āmopa
khat lehan ankhīna
13 Mipui ngāi bila mi khatin Isua kōma:
“Mīnchūpu,
ka parual kōma dōnglua anānsempui ranga na ril pe ro ba,”
ati na.
14 Isuan amasanga:
“O miring nangni chunga rui aril rang le dōnglua ana sem u ranga tu mo anān ruat na ni u?”
ati na.
15 Hankēng akōm u na:
“En u ro!
Alom peia huat anhamna tin rēng āta anrēng u ro.
Asik chu donglua tampana ni mak miring damna hi ei om,”
ati na.
16 Hankēng akōm u na hiva ankhīna chong hi arila:
“Mi aneipa khat aphāia hin bu ātampa asuaka.
17 Hasika han amalung sūnga:
‘Hontin mo kei thō rang ani zei tāk!
Asik chu hidōr peia tam bu siakna rang mun dōn
lāi makung,’ ”
ati na athetheia andona.
18 Hatuka ama dēnin hintin hin thō ka ti ati na:
“Ka sāsiar in masiam ka tinga,
hiva nēka alian bet sin ka ting.
Hava han ka bu le ka nei ka nung ngāi dōra siak ka ti.
19 Hatuka ka ninga anti ka ti,
‘O kei damna,
kum asōtpa ranga neinung ātampa nei mantīng sua ani zeia,
pōngansa tān,
ne ro sa ro.
Hatuka chu rāisān le aphāma anliai ro,’
ti ka ti,”
ati na.
20 Tenchu Pathianin akōma:
“ ‘O āmopa!
atun zān lena hin nei ringna na kōm āta anpot intia.
Hasika han na ranga hava nei mantīng ngāi ha tu mo alua rang ani zei?’
ati na.
21 ‘Tukareng arang ronga neinung antīnga tenchu Pathian tianga nei lui chu hantin han ading mun ei ni rang,’ ”
Isuan ati na.
Lung anhāng u nō ro
Mt.6:25 -34
22 Hava suale Isuan azolāi ngāi kōma:
“Hasika han kei na ril u ani zei,
kei damna ranga hong mo kei nēk kei sāk rang ati le hanūk ka pum ka taksa ranga hong mo kei rasil rang ati na man don u nō ro.
23 Asik chu damna hi kēng nēk le sāk rui nēka alian,
hanūk chu taksa hi kēng puan le pāi nēka alian.
24 Va-āk ngāi tiang thīr u tān mandon u ta!
Amānīn sachīm tu u mak,
sapār um āt u mak.
Hanūk chu rakul um dōn u mak,
sāsiar um dōn u mak.
Hanum nisela Pathianin avāi u na.
Nangni vāng chu vā ngāi nēka alu kēng na ni u do.
25 Nangni bila tu mo andon chiana aninga adung muk khat bak ansōn thei na ni u?
26 Hiva rui asīnte ngal hi nei thōthei u nōk aniten ichang mo rui atetei vāng chu nei mandon u?
27 Rama pār ngāi ei ansōn zia so en u tān mandon u ta!
Hava ngāiin sin thō u mak,
puan pat kher u mak.
Hanum nisela kei na ril ani u zei,
Solomon hadōr peia anlian anlala om ngalin anlianga hava rama pār ngāi angkhat dak dōr ngala anliang thei mak.
28 Hanūk chu rama chiak ngāi aviana om nangtuka moia anhāl len rang lua mana Pathianin hadōr pei amanliang theia.
Havan tin han aniten,
nangni iamna atōm ngāi!
Nangni vāng chu ituk mo ei na manliang u rang ni mak mo!
29 Hanūk chu imo kei sāk rang imo kei nēk rang ati na pōng u nō ro,
andon um u nō ro.
30 Asik chu hi maniapūra mi chu hava neinun ngāi dōra sika kēng ei pōng u chachak.
Tenchu na Pa ūn hava ngāi dōra ha na nāng u ti ariata.
31 Tenchu hava nēk ten aram ranga pūt u ro,
hatuka hava ngāi dōra hām na pēka na sap unti.
32 O nangni bera rual atōm ngāi,
āchi u nō ro.
Asik chu aram ana pēk u rang hi na Pa u azōt kēng.
33 Na nei na nung dōra zuar u tānla anriang ngāi ranga pe u ro.
Hatuka anrua ngāi lui sum rena marsa sin u tānla siat ngāi lui nei nung tāituana adiar ha vānrama mantīng u ro.
Sovan chu anrūn vapan thei mak,
nger in um masiat thei mak.
34 Asik chu na dōnglua ei omna taka na malung um om inti,”
ati na.
Alei meng chian anāng
35 Hanūk chu:
“Na kōng khita na lēm manchuang u tānla ansin chiana lei om u ro.
36 Inneina pānta nāta ahong akīr rang in pumapa aleia ngāk chian anga lei om u ro.
Asik chu ahong tika suakkhār ahong atōkle alei anlong pe len thei mi ang lei ni u ro.
37 Apumapa ahong tikle aleia meng chiana alei om ei hong mu suak ngāi chu anpāka om unti.
Chong tataka kei na ril ani u zei,
amān akōng puan akhita bu nēk ranga mansut intia.
Hanūk chu ama apum lenin amāni dorbo adoma mannēk inti.
38 Hasika han apumapa chu zān chima mo,
ārkhuana mo,
ahong tik pei ameng chiana ei hong mu suak ngāi chu anpāka om unti.
39 Tenchu hiva hi re u ro,
in puma hān anru ei hong lūt rang hun riat sela chu,
a ina anru manlūt nō ni.
40 Havan tin ang nangnīm ansin chian u tānla lei om u ro.
Asik chu nangnīn nei mandon u nōkna ahun taka Miring Nāi Pasal chu ahong ving theia,”
ati na.
41 Hatuka chu Peterin:
“Puma,
hiva ankhīna chong nei ril hi koini na ranga mo,
ole loko ranga nei ril mo?”
ati na.
42 Hatuka Pumān amasanga:
“Hova suak ahian le aiamrua mo apumapān asuak dōn ngāi chunga ahun taka nēk sāk asem ranga uliana phun ni?
43 Apumapa ahong akīr tikle aiamrua ang taka sin alei thō suak ei hong mu tak chu anpāka om inti.
44 Chong tataka kei na ril ani u zei,
anei anung ngāi dōra chunga ulian achang ranga phun inti.
45 Tenchu ankhīnana hava suak ha amalung susūnga hintin hin ti sela:
‘Ka pumapa ei hong kīrna rang hun ala sōt rang kēng.’
ati na.
Hasika han hava hun kōng kāra han suak atei ngāi nupang pasal azēm ranga aphut lena,
hanūk chu nēk le sāk athō suana anri anhāia alei anmanga.
46 Tenchu havan tin han apumapa ha ei hong suak rang amandon nōkna nikhua le ahun taka hong suak inti.
Hatuka chu ahong suaka bong anni changa hong tan ving intia,
aiam nōk ngāi kāra achang rang mun aruat inti.
47 Hanūk chu suak apumapa amalung vong ariat uam ām lei ansin lui,
hanūk chu ama ei zōt ang ām sin lei thō lui chu achālaka rāimol sāk inti.
48 Tenchu ei riat nōk sika rāimol asāk rang khopa āsia thō chu atōm uala rāimol sāk inti.
Tukareng akōma ātampa anpēk chu ātampa dēn anpūt inti.
Hanūk ātampa ei mandōn kōma ātampa dēn anlāk inti,”
ati na.
Anngoina ni mak
tenchu anduina apēk
Mt.10:34 -36
49 Hanūk chu:
“Ramuala hin moi ansuak ranga ahong ka ni,
atun len ngal hin ei kāng rang kei zōt ani zei.
50 Tenchu baptisma khat kei lān baptis rang ala om,
hava ha anzui māseng chu ka lunghāng bāng nō ni.
51 Ramuala hin anngoina apēk ranga ahong ati na mo nei na mandon u?
Tenchu kei na ti ani u zei,
hava ha ni mak.
Tenchu anduina apēk ranga ahong ka ni.
52 Asik chu atun āta insūngkua khat mi rangā om ngāi ha ansen unti.
Anthum ngāiin anni dui untia,
anni ngāiin anthum dui unti.
53 Amāni ngāi ha andui untia,
pain anāi pasal,
anāi pasalin apa.
Nuin anāi nupang,
anāi nupangin anu,
ātarpīn amuinu,
amuinuin ātarpi dui inti,”
ati na.
Hun omzia riatna
Mt.16:2 -3
54 Hatuka Isuan mipui ngāi kōma:
“Tāklam tianga ansūm azīnga na mu u le:
‘Rua ahong rang kēng ani zei,’
na ti len u chachaka.
Hatuka ahong lelena.
55 Hanūk chu sim tianga thīnthi hong na riat u le:
‘Khua lum rang ani zei,’
na ti u chachaka.
Hatuka alum lelena.
56 Nangni phuazekām ngāi!
Phil le anvān tianga hun omzia chu na riat thei u na,
tenchu ichang mo atun lāi taka hun omzia chu nei riat thei u nōk?
57 Adik hi imo tāk,
ati na ichang mo na ninga andonna nei dōn u nōk?
58 Hatuka chu anaduipa lehan ruirilpu matona na sē pui susūnga lampuia ama lehan anngoina en ro.
Hanōk tenchu ruirilpu matona na keia na ruai intia ruirilpūn lung in angākpa kōma na betōk intia.
Hanūk chu lung in angākpūn lung ina na vakhum inti.
59 Hasik han kei na ril ani zei,
poisa angkhatte ngal na thuan sua māseng chu hava mun āta zōk pial nō ta ni,”
ati na.