Isuan mi sōmsari ngāi atīr
10
1 Hatuka hava suale Pumān atei sōmsari ngāi athanga.
Hatuka amāni ei sēna ranga khua tin le mun tina anni annina amatona alei tīra.
2 Hintin hin akōm u na ati na:
“Bu āt rang ātampa om a,
tenchu a-āt rang mi ātōm.
Hasika han bu āt ranga mi ei hong tīr theina ranga lui pumapa kōma zong u ro.
3 Hatuka sē u ro,
tenchu rangāi u ro.
Ngelang bila berate atīr anga nangni hi kei na tīr u ani na.
4 Sum siakna mo,
marsa mo,
ke na abun rang kekok chōi u nō ro.
Lampuia na sē u lāi tutē chibai anthōpui u nō ro.
5 Hatuka nei lūt u na in taka:
‘Mānsana hiva ina hin phūkdāina om rase,’
ti bak u ro.
6 Hava han phūkdāina andit nāi a om ten,
phūkdāina nei pēk u na ha om chian inti.
A om nōk ten na kōm u dēna hong kīr rēt inti.
7 Hava ina han om chian u tānla,
ei na pēk u tak,
nēk sāk u ro.
Asik chu sin anding mi chu ei lō aman rua ngal ani na.
Inrāp tina anthot titir u nō ro.
8 Hatuka nei lūt u na khua angkhat peia ana lei phām u ten na matona ei na do u tak pei nēk sāk u ro.
9 Hava khuana dam lui ngāi chu mandam u ro.
Hanūk chu akōm u na:
‘Pathian ram chu na kōm u na atung zei,’
ti u ro.
10 Tenchu nei lūt u na khua takin ana lei phām u nōk ten kho sūnga lampui tina sē u tānla hintin hin varil u ro:
11 ‘Na khua u na philvut na ke na akop ngal hi na chung u na na thing zei hi do.
Hanum nisela hiva hi ti ngēt u ro,
Pathian ram chu na kār u na atung zei,’
ti u ro.
12 Kei na ti ani u zei,
nangkana nikhua tika chu hava khua chang rang nēka han Sodom khua chang rang ha adiar sa bet inti,”
ati na.
Isuan ansīr lui khua
ngāi khomāk asam
Mt.11:20 -24
13 Hanūk chu:
“O Korazin na vān aduai!
O Betsaida,
nang um na vān aduai na ni!
Nangni kōma boidongkhap sin anthō ngāi hi Tura le Sidon khuana anthō nisela chu machin āta amalung makhīr sua u zei ni.
Hatuka bosota ansila ravut ankhuana ansīr u zei ni.
14 Tenchu nangkan ruiril nikhua tika nangni na chang u rang nēka Tura le Sidon khua ngāi chang rang adiar sa bet inti.
15 Hatuka nang Kapernaum,
anvān adēn raka ansāng rang mo nei anti ha,
athi ngāi omna mun antakna ten peia anpeiin na ti,”
ati na.
16 Hatuka azolāi ngāi kōma:
“Tukareng na chong anngāi u chu koi ka chong anngāi ani u na.
Hanūk chu tukareng nangni na heng lui chu koi na heng lui ani na.
Tenchu koi ana heng chu koi anatīrpu hām aheng kēng,”
ati na.
17 Hatuka sōmsari ngāi ha rāisān taka ahong akīr rēt u na akōma:
“Puma,
raluai ngāi na raminga koini na rachama a om u zei,”
ati u na.
18 Hatuka amān akōm u na:
“Soitān chu khuanlek aphua zeka anvān āta ahong achula ka mu.
19 En u ro,
marūl le āinuvet ngāi anthin theina le na rāldui ngāi antor theina ranga ningneina aloma ka na pēk u itē rengin na masiat thei u nō ni.
20 Hanum nisela ratha sia ngāi na rachama ei om thei u sika rāi mansān u nō ro.
Tenchu vānrama na raming u ngāi ei anziak sika na rāi mansān u ro,”
ati na.
21 Hava lāi han Isua chu Ratha Ānthiang zāra rāi amansāna:
“O ka Pa,
ramual le anvān Puma,
nangin mi hian le athei ngāi kōma hiva chong hi na thupa.
Tenchu nāipang tham ngāi kōma chu nei manlang sika na chunga rāisānna ka na mantung.
Asik chu ka Pa,
hava ha nang na mit muna na malung do le nei nuam kēng,”
ati na.
22 Hanūk chu:
“Alom peia ka Pān ka kuta ei na betōk kēng ani zei.
Pa rong nōk chu tūtēn Nāi Pasal hi ariat om mak.
Hanūk chu Nāi Pasal rong nōk chu tutēn Pa hi ariat om mak.
Hanūk chu Nāi Pasalin ei manlang zōt tak kōma kēng ei manriat,”
ati na.
23 Hatuka azolāi ngāi tiang anhoia maruk tena arila:
“Hiva amu thei ngāi mit chu ravān āsa kēng.
24 Asik chu kei na ril ani u zei,
deari ngāi le rēng ngāi ātampān hiva nei mu u ngāi hi amu ranga ei zōt u ani na,
tenchu mu thei u mak.
Hanūk chu kuara nei riat u ngāi hīm ariat ranga ei zōt u,
tenchu riat thei u mak,”
ati na.
Samari mi sa
khat lehan ankhīna
25 Hatuka nikhat chu Dān anchūna ariatpu mi khat Isua kōma ansin ranga ahong andinga:
“Mīnchūpu,
tāituan damna kei manna ranga hong mo kei thō rang?”
ati na arakela.
“Puma na Pathian chu na
malung dōra le na ratha
dōra le nei rātna dōra le na
sūngrīl dōra lehan madit ro.
Hanūk chu na ninga nei andit
anga na in kōl mi chu
adit ro,”
ati na amasanga.
28 Hatuka Isuan:
“Nei masangna chu adik sabak ani.
Havan tin ang han vathō ro,
damna man na ti,”
ati na.
29 Tenchu ama aninga han adik ti anlōna rang ei zōt sika Isua kōma:
“Hanle tu mo ka inkōl mi ei ni rang?”
ati na arakela.
30 Isuan amasanga:
“Mi khat hi Jerusalem khopui āta Jeriko khuana asēna,
hava lāi han misuam ngāi kuta achula.
Hava ngāi hān apuan apāi ngāi alāk pe u na azēm sabak u na athi vita amāk rak u na ei sē u.
31 Hatuka chāizūng khat hi hava lampui dēna han asē anāng ngēta.
Hatuka hava nāi hān amu na lampui atei tiang alōi viaka asēna.
32 Hantin dēn han,
Levi achīna mi khat um ahonga hava dēn ha amu na lampui atei tiang alōi viak rēta.
33 Tenchu Samari mi khat akhual sē na na hava lampui ha ahong asuaka,
hava mi ha ahong muna amalung apōng sabaka.
34 Hatuka akōm asēna ei popna ngāi ha sariak le zu akhuana athuam pe na.
Hatuka ama ei chuangna sakemanli chunga aman chuanga khual tungna ina asē puia ei kiavāng ani na.
35 Hatuka zīng khuavāra denari anni arasuana khual in angākpa kuta apēka.
Hanūk chu:
‘Lei kiavāng pei ro,
hiva nēka na lei thām ten,
ka honga kīr tik le na hong thuan ka ti,’
ati na.
36 Hanle hiva mi anthum ngāi bila hin ha misuam ngāi kuta achulpa a inkōl mi ranga tu rang mo na iam?”
ati na.
37 Hatuka Dān mīnchūpu hān:
“Ama anditpu tak ha,”
ati na amasanga.
Isuan akōma:
“Hano ten nang um sē tānla hantin dēn han vathō ta ro,”
ati na.
Martha le Mari
ngāi ina Isua atung
38 Hatuka Isua le azolāi ngāi ei pan u balama han khua angkhata avalūt u na.
Hava han Martha ati na nupang khatin a ina alei mantunga.
39 Ama hān azuarpui khat adōna,
araming chu Mari ani na.
Ama chu Isua ke kunga ansut chiana achong ril ngāi arangāia.
40 Tenchu Martha chu inrui athō tianga anpōn sabaka.
Hatuka akōma ahonga:
“Puma,
ka zuarpuinu hīn koi rong inrui athō ranga ei na betōk hi na mandon ngal mak che mo?
Hasika han ana honga san ranga na ril pe ro,”
ati na.
41 Hatuka chu Isuan:
“Martha,
Martha,
inrui sika hin nei an pōnna ātam sabak zei.
42 Tenchu alaktete sika angkhat dak kēng anāng.
Hava anāng ha Marīn athang zei.
Hanūk chu hava ha akōm āta anpot sa lāi nō ni,”
ati na amasanga.