Pōngansa nikhuana Puma
6
1 Hatuka nikhat chu Pōngansa nikhuana Isua chu phāia sa pār bila asēna.
Hava han azolāi ngāiin sa pār akham u na akuta amuaia asāk tir u na.
2 Hankēng Pharisi ngāi bila mi senkhatin:
“Pōngansa nikhuana dānin ei phal nōk ha ichanga mo nangnīn nei thō u?”
ati u na.
3 Isuan amāni kōma amasanga:
“David le alōm ngāi ha avon anchām u lāi han hong mo ei thō u ha hava rui ha Pathian lekhabūna pore u mak che mo?
4 Ama chu Pathian biak ina avalūta.
Hanūk chu chāizūng rong nōk chu ateiin sāk thei ngāi lui ruti ānthiang andar ha ei lāka asāk hale!
Hanūk chu alōm ngāi um ei la pēksa ni mak mo ha!”
ati na.
5 Hankēng Isuan akōm u na:
“Miring Nāi Pasal hi Pōngansa nikhua chunga Puma kēng,”
ati na.
6 Hatuka Pōngansa nikhua atei rēta Jihudi ngāi anchunna ina avalūta avamanchūna.
Hava han achang kut anhīp pe mi khat a oma.
7 Hatuka chu Pharisi ngāi le Dān mīnchū ngāiin āsia ei manlō thei u na ranga,
Pōngansa nikhuana mi amandam mo mandam mak mo ati na athīr chian u na.
8 Tenchu Isuan amalunga achong u ariata akut anhīppu kōma:
“Anthui tānla,
lokō malāi tak hong anding ro,”
ati na.
Hatuka chu ama ha anthuia andinga.
9 Hankēng Isuan amāni kōma:
“Chong khat na rakel u ka ti,
Pōngansa nikhuana hong zāt athō mo dānin ei phal?
Āsa thō mo adik ole āsiat athō mo?
Āndam mo adik ole āthat mo?”
ati na.
10 Hatuka ama chu lokō tianga anhoia hava mi kōma:
“Na kut alāng ro,”
ati na.
Hatuka akut alānga kiang khat anga adam pe vang lena.
11 Tenchu hava ngāi ha ama chunga atak asi sabak u na.
Hatuka Isua chunga hong mo nei thōthei rang ati na amāni le amāni anril ansiat u na.
Kuitīr Sōmleianni ngāi athang
12 Hava hun dām lāi han nikhat chu Isua bōr azong ranga muala avakala.
Zān sōt Pathian kōm bōr avazonga.
13 Hatuka zīng khua ahong avār le azolāi ngāi apāia,
amāni bil āta Sōmleianni athanga.
Hatuka hava ngāi ha kuitīr ati na raming aphuana.
14 Hava ngāi ha ani zei,
Simon,
amān Peter raming ei phua,
anāipa Andria,
Jakob,
Johan,
Philip,
Bartholomoi,
15 Mathāi,
Thoma,
Alphai anāi pasal Jakob le Simon mīn Zelot ei ti ha.
16 Jakob anāi pasal Juda le Iskariot Juda,
ama anbetōk rangpu ha ani na.
17 Hatuka Isua chu amāni bila mual āta ahong achuma mun anzōla andinga.
Hanūk chu azolāi ngāi bila mipui rual khat pei le mipui ātampa Judia ram pumpui āta,
Jerusalem khopui āta,
tipuilian kōla Tura le Sidon khua nāta ahong u na.
18 Hava ngāi ha ama chong anngāi rang le ei nat u na ngāi āta adam ranga ei hong u ani na.
Hanūk chu raluain ei sūra ei sinsak chachak ngāi um ahong u na amān alei dam ani na.
19 Hatuka alom u na mipui ngāiin ama atōn ranga aval u na.
Asik chu ama nāta asuak ranak zāra alom u na aman dama.
Bōrsāng le khomāk atung ngāi
Mt.5:1 -12
20 Hava suale azolāi ngāi tiang anhoia hintin hin ati na:
“Nangni anriang ngāi,
bōrsāng atung kēng na
ni u.
Asik chu Pathian ram hi na
ta la chang unti.
21 Atuna nangni ānchām ngāi,
bōrsāng atung kēng na
ni u.
Asik chu akhop abita la
om un na ti.
Nangni atuna achap ngāi,
bōrsāng atung kēng na
ni u.
Asik chu anni hiaia la om
un na ti.
22 Miring Nāi Pasal sika mīn
ana mumāka,
ana ēro
u na,
hanūk chu māimōk ana saka,
na raming āsia ana manlō
u ten,
bōrsāng atung kēng na ni u.
23 Hava huna han rāi mansān u tānla aphāma lām u ro.
Asik chu vānrama nangni ranga rātpāk ātampa om kēng.
Asik chu havan tin han tiana na chipui u ngāiin deari ngāi chunga ei hong thō u chachak ani na.
24 Tenchu atuna nangni anei anung ngāi,
khomāk atung kēng na ni u.
Asik chu ahui ahēkna ngāi
na mansua u zei.
25 Nangni atuna akhopa om
ngāi,
khomāk atung kēng na ni u.
Asik chu anchāma la om
un na ti.
Nangni atuna anni hiaia a
om ngāi,
khomāk atung
kēng na ni u.
Asik chu achapa la om un
na ti.
26 Mi tinin nangni ana
manpāk u ten,
khomāk atung kēng na ni u.
Asik chu hantin han amāni
achipui ngāiin
Deari rothol ngāi chunga ei
thō u chachak ani na.
Anadui ngāi ranga anditna
Mt.5:38 -48
27 Tenchu nangni ka chong anngāi ngāi na kōm u na kei na ti ani u zei,
nangni anadui ngāi chu adit u ro.
Anān mumāk ngāi chunga ei sat u na rang thō u ro.
28 Khomāk anasam ngāi chunga bōr pe u ro.
Na chunga āsia anathō ngāi ranga bōr zong pe u ro.
29 Na chang māikhang ana bēn u ten kiang khat tiangām dō pe rēt ro.
Na zāni rasil ana lāk pe kōma na kultāi um apēk ranga manar nō ro.
30 Hanūk chu mīn neinun khat pei ana zong ten,
ana zongtak kōma pe ro.
Na neinun anānpot kōma azong rētna thō nō ro.
31 Mīn na chunga anathō pe rang nei zōt anga mi chungām hantin dēn han thō ro.
32 Asik chu nangni anāndit ngāi dēn ha na dit u ten na rang u na imo ei nemna?
Mi salui ngāi um amāni andit ngāi chu amānīn um adit u.
33 Hanūk chu na ranga āsa ana thō pe ngāi chung dēna āsa na thō u ten,
na rang u na imo ei nemna?
Mi salui ngāiin um hantin han dēn athō u.
34 Āman rēt rang nei sabei u ngāi kōm dēn neinun na manpūk u ten na rang u na imo ei nemna?
Mi salui ngāiin um nisela mi salui ngāi kōma akip zita aman rēt ranga chu amanpūk u hale.
35 Tenchu nang anadui ngāi chu madit u ro.
Achung u na ei satna rang sin āsa thō pe u ro.
Āman rēt ranga sabei luia amāni kōma neinun manpūk u ro.
Havan tin han na thō u ten,
na rātpāk u ātampa man un na ti.
Hatuka chu Chungannung khīt Nāi Pasal chang un na ti.
Asik chu ama chu rāisānna chong mantung lui ngāi le mirua nōk ngāi chungām āsing ani na.
36 Na Pa u anditna ei dōn anga nangnīm anditna dōn u ro.
Mi rui siat aril rui
Mt.7:1 -5
37 Mi rui siat ril u nō ro,
hankēng na rui siat ei anril u nōk rang.
Mi āsiat manlō u nō ro,
hankēng āsiat anlō luia nei om u rang.
Hanūk chu mi madual u ro,
hankēng anduala nei om u rang.
38 Hatuka pe u ro,
hankēng Pathianin ei na pēk u rang.
Ātam sabaka,
ānnīk,
ānsāktita,
āliam mata,
na chunga na hong pēk unti.
Asik chu nangnīn nei māi u na le nei pēk u dēn lehan amām na chung u na amāi dēna na pēk unti.”
39 Hankēng amāni kōma hiva ankhīna chong hi arila:
“Mit achō hin mit achō dēn mo amaruai thei ngāi?
Amān amaruai anten khur anthūka vachul rit u nō ni mo?
40 Asik chu anchū miring chu mīnchūpu nēka alian ni mak.
Tenchu hava anchū miring ha anchūna aman zit suale chu mīnchūpu lehan anrual ani na.
41 Ichang mo nang na mita thingherpa a om ha nei mu nōka na parual mita thingdite a om ha nei mu?
42 Hontin mo nang na mita thingherpa a om ha mu luia na parual kōma:
‘Ka parual,
hong ro,
na mita thingdite a om ha na kel pe rong,’
nei ti thei?
Nang phuazekām,
na mita thingherpa ha kel mānsa ro,
hatuka na parual mita thingdite ha akel ranga anthiang vanga mu thei in na ti.
Thingkung le amara
43 Thingkung āsa dōrān theimara siat mazir ngāi mak.
Hanūk chu thingkung āsiat dōrām theimara sa mazir ngāi mak.
44 Thingkung dōra hi amara lehin na riat theia.
Mīn ramborei bila theichang mara kham ngāi mak.
Hanūk chu mīn lingkem rānga gerep mara kham ngāi mak.
45 Mi sa chu amalung sūnga ei khum neinun āsa kēng ei rasua.
Mi salui chu amalung sūnga ei khum neinun āsiat kēng ei rasua ani na.
Asik chu mīn amalung sūnga aliam ha kēng amūra ei hong rasuana ei hong ril ani na.
Āhianpa le āmopa in sin rui
Mt.7:24 -27
46 Hanle ichang mo nangnīn,
‘Puma,’
‘Puma,’
nei na ti u tenchu kei na ril u ngāi thō u mak chena?
47 Tukareng ka kōma ahonga ka hē anngāia atel tak chu hong khat le mo mankhi inti.
48 Ama chu in asinpu khat ang,
khur anthūkpa achuia lungpui chunga abul aphuna in asin ani na.
Nukhōna tīliansāng ahonga tīnrātin ahong suka,
tenchu masiam thei mak.
Asik chu adet sabaka lungpui chunga ansin ani na.
49 Tenchu ka chong anngāia tel lui tak chu abul lungpuia phun luia phil chunga in asin ani na.
Hatuka tīnrātin hava in ha ahong suka achiam lena,
hava in dingmun chu asiat sabak,”
ati na.