Isua anzirna rui
2
1 Hava hun dām lāi han Rēng Kaisar Augustān ramual pumpuia mi tinin raming anziakna ranga dān khat amasuaka.
2 Hava ha Suria rama Kurini lal ahun lāia raming anziakna mānsa khīt ani na.
3 Hatuka mi dōrān raming anziak chip ranga akhopui u kipa asē
u na.
4 Hatuka chu Joseph um David sūngkua mi le akhūka mi ani na.
Hava sika Galili rama Nazaret khua nāta Judia rama David akhopuia Betlehem khua ei ti u han asēna.
5 Raming avān ziak ranga anungāk biak Mari lehan asē u na.
Hava lāi han nāi ahong anei rang ani zeia.
6 Hava muna han a om u lāi han nāi anzirna ranga anikhua honga suak zeia.
7 Hankēng hava han anāi rapa mānsa pasal ahong mazira.
Nāitete chu puanle anthuama serāt sūl pēkna koka aman zāla.
Asik chu amāni ranga khual tungna ina mun abui lāi
ani na.
Bera rung ngāi le vānpalāi ngāi
8 Hatuka hava ram ravēl dāma han bera rung ngāi chu a om u na.
Zāna bera ngāi arung ranga ram thuaia ei riak u chachak ani na.
9 Hatuka Puma vānpalāi khat akōl u na ahong andinga Puma ei anlianān aravēl u ahong ēl zuaka.
Hatuka achālaka arathāta u na.
10 Tenchu vānpalāiin akōm u na:
“Āchi u nō ro,
asik chu rangāi u ro,
mi tin ta ranga rāisānna lian khīt thang ahui ka na hong mantung u.
11 Asik chu avian hin nangni ranga David akhuana Sandampu ahong anzir zei.
Ama ha ani zei Krista,
Puma ha.
12 Hanūk chu hiva hi na rang u na sinsiana ani zei,
nāitete chu puanle anthuama serāt sūl pēkna koka azāla vamu un na ti,”
ati na.
13 Hatuka anlāiseka han hava vānpalāi bila chungvāna sipai rual lian khat pei ahong anlanga Pathian amanpāk u na:
14 “Chung annung khīta
Pathian anlal rase.
Ramuala ami madit ngāi
kōma anngoina om
rase,”
ati u na.
15 Hatuka vānpalāi ngāiin amāka chungvāna akal sua u le bera rung ngāi amāni le amāni anril u na:
“Tho ta,
Betlehem kho tianga sē u rei.
Pumān ei na hong ril ngāi rui vaen u rei,”
ati u na.
16 Hatuka anrarapa asē u na Mari,
Joseph,
hanūk chu nāitete serāt sūl pēkna koka azāl chu avamu u na.
17 Hatuka avamu u le vānpalāiin akōm u na nāitete rui ei ril ngāi ha avamanthei u na.
18 Hatuka bera rung ngāi chong ariat dōra aboi adong sabak u na.
19 Tenchu Mari chu hava rui ngāi dōra ha amalunga akhum rapa achālaka amandon chiana.
20 Hatuka akōm u na vānpalāiin ei ti ang taka aloma ei mu le ei riat u sika Pathian aman liana aman pāk u na.
Hatuka bera rung ngāi chu akīr rēt u na.
Biak ina Isua avāndarpui u
21 Ni riat nikhuana,
serantanna hun ahong asuakle araming chu Isua aphua u na.
Hava raming ha nu vonsūnga a om mān āta vānpalāiin alei phua zēt ani na.
22 Hatuka Mosi dān anga anthiangna nikhua ahong akiple Isua chu Puma kōma avadar ranga Jerusalem khopuia aruai u na.
23 Puma dānbuna chong Mosīn ei maziak anga:
“Nu vonsūnga nāi pasal
atontīr anzir tak ha Puma
ranga ānthianga ei ankhāi
rang ani,”
ti anziak ani na.
24 Puma dānbūna ānziak anga:
“Vasu rabo khat mo ole
pharvalite ngāi anni mo
anbōlna ranga ei vadar
ranga,”
ti anziaka.
(Lev.12:8 )
25 Hatuka Jerusalem khopuia mi dik le Pathian andon sabak mi khat a om a.
Ama araming chu Simeon ani na.
Ama chu Israel ngāi Ānzōkpu angāk chian ani na.
Hanūk chu Ratha Ānthiang chu achunga a oma.
26 Hanūk chu Puma achongtin Krista amu māseng chu thī nō ni ti Ratha Ānthiangin ei hong man mu ani na.
27 Ama chu Ratha Ānthiangin aruaia Pathian biak ina asēna.
Hatuka dānin athō rua ei ti anga anu le apān nāitete Isua chu aruai u na.
28 Hatuka Simeonin alei poma Pathian anpāk chunga:
29 “Puma Alian khīt, na
chongtin ang taka,
atun chu na suak hi
phūkdāia na mathān ta ro.
30 Asik chu ka mit ngētin nei
na sandamna amu zei.
31 Nangin nam tin mit muna
ranga nei mansūk ha.
32 Hava ha Jentail ngāi kōma
anlangna ranga ra-āng.
Hanūk chu na mi Israel
ngāi ranga anlianna
kēng,”
ati na.
33 Hatuka Joseph le anu Mari chu nāitete ruia chong anril ngāi sika achān aboi adong u na.
34 Hatuka Simeonin achung u na bōr apēk,
anu Mari kōma:
“En ro,
hiva nāitete hi Israel ngāi ātampa ranga anpeina le azōkna ranga anthang.
Hanūk chu ama chunga siat aril ngāi ranga sinsiana khat hong nīnti.
35 Havan tin han mi tamtak malunga andonna hong anlang inti.
Nang na malung būr chu khendāi le ansun phuazek inti,”
ati na.
36 Hatuka araming Hanna ati na deari nupangatarkhat a om a.
Ama ha Phanuel anāi nupang,
Asher pānchīna mi ani na.
Ama chuatarsabak ani zeia.
Puan manim apal suana aruathar lehan kum sari an om u na.
37 Hatuka chu kum sōm ariat kum manli pei arōng achang ani na.
Ama chu biak in le ansen luia asūn azāna bu ngoi chunga bōrzonga Pathian abiak chachak ani na.
38 Hava lāi tak amām akōm u na ahonga Puma kōm rāisān chong arila.
Hatuka Jerusalema zōkna angāk ngāi dōra kōma nāitete rui chu amantheia.
39 Puma dān ankhip rua ngāi dōra azui u le Galili rama
akhua u dēn Nazareta akīr u na.
40 Hatuka nāitete chu ahong alian tira ratha tianga ahong arāt tira.
Hanūk chu hianna tianga abita Pathian lungkhamna chu achunga a om ani na.
Biak ina Isua
nāipangte asēpui u
41 Kumtin peia han Zōkna Pānta ranga anu le apa ngāi chu Jerusalema ei sē u chachak ani na.
42 Hatuka amām kum sōmleianni akāi le chu Pānta ei om babang anga Jerusalema asēna.
43 Hatuka Pānta ansuale anu le apa ngāi chu ina akīr u na,
tenchu Isua nāipangte chu Jerusalema an-ōk zata.
Tenchu Joseph le anu hān hava ha ei riat u nōk ani na.
44 Asik chu loko bila om kēng nīnti ati na ei mandon u.
Nikhat lampui ten pei asē u zeia.
Hatuka asūngsuak ngāi le amēl riat ngāi kōma aravān u na.
45 Hatuka chu ei mu u lāi nōk sika anvān ranga Jerusalema akīr rēt u na.
46 Hatuka chu nīnthum suale biak ina avamu u na.
Mīnchūpu ngāi bila ansuta achong u arangāia arakela.
47 Hatuka ama ei hianna le ami masangna chong ngāi ariat ngāi chu achālaka aboi adong u na.
48 Anu apa ngāi um avamu u na aboi adong u.
Hatuka anūn akōma:
“Ka nāi,
ichang mo hivan tin hin koini chunga om nei thō?
Enta,
na pa le koi ituk mo lungpōnga nei na ravān hi,”
ati na.
49 Amān akōm u na:
“Ichang mo nei na ravān u?
Ka Pa ina kei om rang ti hi riat u mak che mo?”
ati na.
50 Tenchu akōm u na chong ei ril ha amānīn riat thei u mak.