Ansīrna nōk ten anpeina
13
1 Hava lāi han hava bila a om mi senkhatin Galili rama mi ngāi ruia Pilatin dāli bila athisen u ei manpol dāli ei dar rui ha Isua kōma ahong ril u na.
2 Isuan amasanga:
“Hiva Galili rama mi ngāi hivan tina antak ei tiar u sika hin atei Galili mi ngāi dōra nēka amāni ha aliaka mi salui ranga mo nei mandon u?
3 Tenchu kei na ril ani u zei,
havan tin han ni mak.
Tenchu nangnīm na malung na makhīr u nōk ten havan tin anga na lom u na nei anpei u rang.
4 Hanūk rēt chu Siloam in ansāng achiam lāia miring sōmleiariat athi ngāi ha Jerusalema om mi atei ngāi dōra nēka amāni ha mi salui ati na mo nei mandon u?
5 Tenchu kei na ril ani u zei,
havan tin han ni mak.
Tenchu nangnīm na malung na makhīr u nōk ten havan tin anga na lom u na nei anpei u rang,”
ati na.
Mara bui theichang
kung lehan ankhīna
6 Hava suale amān hiva ankhīna chong hi arila:
“Mi khatin gerep rahuan sūnga theichang kung khat alinga.
Hava han amara anrok ranga asēna,
tenchu vaman mak.
7 Hava sika han gerep rahuan aenpu kōma ati na:
‘Enta,
hiva lehin kum anthum ani zei theichang kunga amara anrok ranga kei hong,
tenchu itē man makunga.
Hasik han phūr tānla pei ta ro.
Asik chu hava ha phil duai kēng ei masiat ani zei,’
ati na.
8 Hatuka hava rahuan aenpūn:
‘Ka pu,
hiva kum khat rong omsa di rase ba,
akōl aravēla akhuara serāt ēk pe kating.
9 Hava suana anra ten āsa len ani zei,
anra nōk ten phūr tānla pei bo ta ni,’ ”
ati na.
Pōngansa nikhuana nupang aruang ankul khat ei dam rui
10 Pōngansa nikhua khata Jihudi ngāi ankhōmna in angkhata avamanchūna.
11 Hava han nupang khat kum sōmleiariat pei raluain ei sūr ana a om a.
Hava nāi ha aruang ankul anzīk pe thei lāi lui ani na.
12 Isuan hava nupang ha amu le chu akōla apāia:
“Nupang,
na rikhua nāta na zōk sua zei,”
ati na.
13 Hatuka achunga akut ei siakle anzīk pe na anding lena,
hatuka Pathian aman pāka.
14 Pōngansa nikhuana Isuan ei mandam sika Jihudi ngāi ankhōmna ina ruaitu ha atak asi sabaka.
Hasika han mipui ngāi kōma hintin hin ati na:
“Sin athōna rang nikhua ni ruk pei a om a.
Tenchu pōngansa nikhuana hong u nō tān,
hava nikhua ngāi han hong u tān hong dam u chachak ro,”
ati na.
15 Tenchu Pumān amasanga:
“Nangni phuazekām ngāi!
Pōngansa nikhuana na serāt tang u ngāi mo na sakuarpar u ngāi mo bathān āta mazōka ti avān nēk ranga ruai u chachak mak che mo?
16 Hanle hiva Abraham achina hiva nupang hi kum sōmleiariat pei soitānin ei khita ei dōn.
Hiva ei khitna nāta pōngansa nikhuana anzōk hi adik ni mak mo?”
ati na.
17 Hatuka amān havan tin hiva chong ngāi aril suale ama adui ngāi dōrān chu anzak amu
u na.
Tenchu amān hiva ngāi dōra sin alianpa ngāi dōra ei thō sika atei mipui ngāi dōrān rāi amansān u na.
Hoiro ru le chol ankhīna
18 Hatuka Isuan:
“Pathian ram chu hong le mo ei ankhī rang?
Hong le mo kei mankhī rang?
19 Hava ha hoiro ru ramal khat ang hi ani na.
Mi khatin hava ha achōia arahuana avatūna.
Hava suale chu achiak amōnga ansōna thingkungpa achanga.
Achunga vā ngāi ahonga abāka ariakna rabu akhuar u,”
ati na.
20 Hanūk chu ama dēnin ati rēta:
“Pathian ram chu hong le mo kei mankhi rang?
21 Hava ha chol ang ani na.
Nupang khatin chol alāka dibi vāipōl anthum lehan amanpola aloma athui māseng ei sūn rapa ei siak ang hi ani na,”
ati na.
Makot anchīpa alūt rui
Mt.7:13 -14, 21 -23
22 Hatuka Isua chu mi amanchū tira khopui le khua sīn alūt tira Jerusalem khopui apana.
23 Hava lāi han mi khatin akōma:
“Puma,
mi atōmte rong mo sandama a om rang?”
ati na arakela.
Hatuka amān mipui ngāi kōma ati na:
24 “Makot anchīpa alūtna pūt khakhak u ro.
Asik chu kei na ril ani u zei,
mi tampān alūt ranga pūt unti,
tenchu lūt thei u nō ni.
25 In pumapa anthuia makot akal rap tika chu nangnīn tual panga anding chiana:
‘Puma,
Puma,
makot na malong pe ro ba,’
ti un na ti.
Tenchu amān:
‘Hovan āta hong mo na ni u,
na riat u makung,’
ati na na masang unti.
26 Hava tika nangnīn:
‘Nang na bila nēk sāk na thō chachak do.
Hanūk chu nangin koini
na bungtānga mi na manchū chachak do,’
la ti un na ti.
27 Tenchu amān:
‘Hovan āta hong mo na ni u na riat u makung.
Nangni mi sa nōk ngāi dōra ka kōm āta ankhāi u ro,’
ati na na la masang unti.
28 Hatuka Abraham ngāi,
Isaak ngāi,
Jakob ngāi,
hanūk chu deari ngāi dōra Pathian rama a oma na mu u na ti.
Hava tika nangni ngāi chu tual panga anpeia om un na ti,
hava muna han nangni chu achap le rakam anriala om un na ti.
29 Hanūk chu sualam,
tāklam,
sim le māra mipui hong intia Pathian rama bu nēk ranga hong ansut unti.
30 Hanūk chu en u ro,
nūk anta ngāi hi mān anta chang unti.
Mān anta ngāi nūk anta chang unti,”
ati na.
Jerusalem khopui
ranga Isua malung āna
31 Hava hun lāi han Pharisi senkhat Isua kōma ahong u na:
“Hiva mun ma tānla mun ateia sē ta ro,
asik chu Herodān nang ana that ranga ana val,”
ati u na.
32 Hatuka amāni kōma amasanga:
“Hava siāl kōma han sē u tānla hiva chong ngāi hi varil u ro.
Enro,
avian le nangtūka hin raluai ngāi razūl ka tinga ana ngāi mandam ka tinga nīnthum nikhuana chu kei thō rang sin zui ka ti.
33 Hanum nisela avian le nangtūk hanūk chu nangthiam ām asē ngēt kei nāng ani na.
Asik chu Jerusalem khopui rong nōk ten apanga deari thi ngāi mak.
34 O Jerusalem!
Jerusalem!
deari athat ngāi le na kōm u na ahong antīr ngāi lung adēnga athat ngāi!
Ārpuiin ate ngāi amantha thuaia ei op anga na nāi ngāi hi voi ituk mo a op ranga kei mankhōm ani na.
Hanum nisela zōt u mak chena.
35 En ro,
na in u chu akoronga anmāka om inti.
Asik chu kei na ril ani u zei:
‘Puma raminga ahong chu anpāka om rase,’
(Sām 118:26 )
nei ti u na hun ahong asuak māseng chu na mu u lāi nō ta ni,”
ati na.