Pharisi khat ina Isua atung
14
1 Hatuka Jihudi ngāi pōngansa nikhua khata Pharisi ngāi ulian khat ina bu nēk ranga Isua asēna.
Hava lāi han ama chu achālaka athīr sabak u na.
2 Hatuka hava han amakunga ataksa aloma anthing pe khat a om a.
3 Isuan dān ariatpu ngāi le Pharisi ngāi kōma arakela:
“Jihudi ngāi pōngansa nikhuana dān anga mi andam hi adik mo adik nōk mo?”
ati na.
4 Tenchu adāi reka a om u na.
Hasik han hava ana tak chunga avatōna adam vanga aman sē na.
5 Hava suale akōm u na:
“Nangni ngāi bila angkhat pei anāi pasal mo aserāt tang mo pōngansa nikhuana tīkhura chul sela varūt len u nōn mo?”
ati na.
6 Tenchu amānīn hava chong ha itē masang thei u mak.
7 Hanūk chu anēk asāk ranga ankui ngāiin sutmun ansāng ei athang u chachak zia ngāi amuna hiva ankhīna chong hi arila:
8 “Mīn inneina ina bu nēk ranga ana kui u le sutmun ansānga ansut u nō ro.
Asik chu nang na nēka ulian raming anthang ankui um ani thei.
9 Hatuka ama le nang anakuipu ha ahongle na kōma:
‘Ama hi na sutmun pe ro,’
na hong tīn ti.
Hava tika han nang chu anzak mu na ti,
sutmun annuai khīt ha vapan in na ti.
10 Tenchu nang anēk asāk ranga ankuia na om tika sutmun annuai khīta ansut ro.
Hatuka anakuipu ahongle na kōma:
‘Ka mal,
hong ro,
sutmun ansānga vān sut ro,’
na tīn ti.
Hatuka nei nēkpui ngāi makunga lalchīna om in na ti.
11 Asik chu tukareng aninga ansāng chu annuaia om inti.
Hanūk chu tukareng aninga annuai chu ansānga om inti,”
ati na.
12 Hatuka Isuan ama akuipu kōm lena:
“Sūna mo ani zāna mo ani,
anēk asāk ranga mi na kuile,
na mal ngāi,
na parual ngāi,
na unāi ngāi,
na inkōl mi anei ngāi kui nō ro.
Asik chu havan tin han na kui ten,
amānīm na kui rēt untia na thuan rēt unti hale.
13 Tenchu nang anēk asāk ranga akuina na mansūkle anriang ngāi,
piangsual ngāi,
akhor ngāi,
achō ngāi kui ro.
14 Hankēng bōrsāng tung in na ti.
Asik chu amānīn itē na thuan thei u nō ni.
Tenchu mi dik ngāi anthui rētna hun tika hava ngāi ha na kōma anthuan inti,”
ati na.
Nēksākna pānta
lianpa lehan ankhīna
Mt.22:1 -14
15 Hatuka hava han ama bila bu nēk ei kāipui angkhatin hava chong ngāi ariata Isuan akōma:
“Pathian rama bu nēk akāi rang chu ravān āsa kēng,”
ati na.
16 Isuan ati na:
“Mi khatin bu nēkna pānta alianpa khat amansūka,
hava han mi tampa amankuia.
17 Hatuka bu nēkna hun ahong suakle asuak khat atīra ei mankui ngāi kōma:
‘Hong u ta ro,
aloma ansūk chīt zei,’
ati na avamanti na.
18 Tenchu alom u na chong anruala nōntāk apēk rua alei ril chip u na.
Mānsapu hān:
‘Phāi khat kei rachōk sua phing ani na,
hava ha avaen ngēt nāng ka ti,
na madual zām ro,’
ati na amathēma.
19 Angkhat rētin:
‘Serāt tang rabo rangā kei rachōk a om a,
hava ngāi ha avā en nāng ka ti,
na madual zām ro,’
ati na amathēma.
20 Hanūk angkhat rētin:
‘Nungāk alāk phing ka ni,
hava sika han hong thei lāi makung,’
ati na.
21 Nukhōna suak chu ahong akīra apumapa kōma ahong ril zita.
Hatuka inpumapa chu atak asina asuak dēn ha atīra:
‘Anrarapa suak tānla,
khopuia lampui,
lam sīra sē ro.
Hatuka anriang ngāi,
āsiat akui ngāi,
akhor ngāi le achō ngāi dōra hiva muna hong manlūt ro,’
ati na.
22 Hatuka suakin apumapa kōma:
‘Ka pu,
nei na ti anga aloma ka thō sua zei,
hanum nisela atun tena mun ala om,’
ati na.
23 Hatuka apumapān asuak kōma:
‘Lam alian le lamtena sē titir tānla ka in ei bit theina khotānga mi ngāi ahong ranga vamathēm khakhak ro,’
ati na.
24 Asik chu kei na ti ani u zei,
hava ankui ngāi bila angkhat ngal bu nēkna kei mansūka atem rang om nō ni,’ ”
ati na.
Zolāi achang
ranga aman ei lu zia
Mt.10:37 -39
25 Hatuka ama bibila mipui ātampa asē u na,
Isuan amāni tiang anhoia:
26 “Tukareng ka kōma ahong rang tak chu anu apa,
anungāk asanāi,
aparual asarzuar ngāi mumāk lui.
Hanūk chu ama aning lena ei damna mumāk lui chu ka zolāi achang rua ni mak.
27 Hanūk chu tukareng akros raput luia ka nūk azī rang ati chu ka zolāi achang thei rua ni mak.
28 Hatuka nangni ngāi bila angkhatin in ansāngpa asin rang nuam sela,
hava nāi ha mānsana ei zui theina ranga sum ituk mo ei nāng rang ti na ansuta isāp thō bak nō ni mo?
29 Asik chu abul aphun suana nukhōna in azui thei nōk ten hava amu ngāi dōrān hintin hin mani ēro thō unti:
30 ‘Hiva mi hīn in asin ranga aphuta tenchu sua thei lāi mak,’
ti unti.
31 Hanūk rēt chu rēng khatin atei rēng khat anduipui ranga asuak rang ti sela,
mānsana ansuta asāng sōmanni le ama adui ranga ahong ha asāng sōm lehan lei dui thei ni mo dui thei nō ni mo ati na mandon bak nō ni mo?
32 Havan tin han athei nōk ten,
rēng atei ha alapana a om lalāi han anngoina chong ankel ranga palāi alei tīr rang ani na.
33 Havan tin ang han nangni ngāi bilām angkhat angkhatin ei dōn dōra amāk zita ahong nōk ten,
ka zolāi chang thei nō ni.
34 Machi hi āsa,
tenchu ei alna ha anpei ten hontin mo athara ei al rēt thei rang?
35 Hava ha chu phil rangām sa lāi mak,
anvūrna rangām sa lāi mak,
mīn ei pei kēng ani zei.
‘Anngāina kuar adōnin rangāi rase,’ ”
ati na.