Bera anpei lehan ankhīna
Mt.18:12 -14
15
1 Hatuka chu siachōi ansuang ngāi ātampa le mi salui ngāi dōra ama achong anngāi ranga akōla ahong pan u na.
2 Tenchu Pharisi ngāi le lekhan ziak ngāi hintin hin asang u na:
“Hiva mi hi mi salui ngāi rāisān hiaia apoma nēk sāk athōpui hile,”
ati u na.
3 Hankēng Isuan amāni kōma hiva ankhīna chong hi arila:
4 “Nangni ngāi bila angkhatin bera raza khat dōn sela,
hava bila angkhat anpei pe ving sela bera sōm akua akua ha philchār rama amāk raka anpeite ha atok māseng varok nō ni mo?
5 Hatuka avatok tikle chu rāisān taka adāra ahong raputa.
6 Hatuka ina ahonga amal arual ngāi le abung mi ngāi dōra mun khata apāia:
‘Na hong phāmpui u ta ro,
asik chu ka bera anpeite ka tok zei,’
ati na.
7 Kei na ti ani u zei,
havan tin anga malung ansīrna nāng lui mi dik sōmakua akua ngāi nēk ten mi salui angkhat amalung amakhīr ten vānrama rāisānna ei om.”
Sumru anpei lehan ankhīna
8 “Hanūk chu nupang khatin sumru sōm adōna.
Hatuka angkhat anpei pe sela,
lēm manchuanga in aphiāta atok māseng arok nō ni mo?
9 Hatuka atok le chu alōm achim ngāi le abung mi ngāi mun khata apāia:
‘Na hong phāmpui u ta ro,
asik chu ka sumru anpeite ka tok zei,’
ati na.
10 Kei na ti ani u zei,
havan tin anga mi salui angkhat amalung amakhīr ten Pathian vānpalāi ngāi matona rāisānna ei om,”
ati na.
Nāi pasal anpei lehan ankhīna
11 Hanūk chu ama dēnin ati rēta:
“Mi khatin nāi pasal anni adōna.
12 Hatuka nāipangin apa kōma:
‘Kapa,
ka changāi dōnglua na pe ro,’
ati na.
Hasika han donglua dōra anīn u na anrual ripa asema.
13 Hatuka nikhua asē miai suale nāipangpu hān ei dōn dōra amankhōma ram alapana asēna.
Hava muna han siatna lama anuam le aninga avaom a,
anei anung dōra athek zita.
14 Hatuka hava dōra aloma amang zit suale hava ram pumpuia han māitām achul sabaka,
dangandana a oma.
15 Hatuka hava rama mi khat kōma asēna avān lōna.
Hatuka hava mi hān avok avāi ranga phāia atīra.
16 Hatuka vokin ei sāk savāi asāka avon ankhop ranga achālaka ning ei ōl ani na.
Tenchu tutēn itē apēk om mak.
17 Hatuka aninga anriatna ahong adōna,
hintin hin ati na:
‘Ka pa ina anlō ngāiin ituk ātam mo nēk rang sāk rang ei dōn u.
Koi hiva hin von anchāma kei thi rang ani zei.
18 Anthui ka tinga ka pa kōma sē rēt ka ti,
hatuka akōma,
Kapa,
anvāna mi le nang na tak chunga āsia thō kēng ka ni.
19 Na nāi pasal anti na anpāi rua ngal ni lāi makung,
na kōma anlō khat anga na siak ro,’
vati ka ting,
ati na.
20 Havan tin han ama chu anthuia apa kōma asēna.
Tenchu rālkhata kēng ei la om apa hān alei muna,
achālaka lungkham alei mu na,
atāna asēna,
arīng avakuana avatuma.
21 Hatuka nāi pasalin akōma:
‘Kapa,
anvāna mi nang na tak chunga āsia thō kēng ka ni,
na nāi pasal ati na anpāi rua ngal ni lāi makung,’
ati na.
22 Tenchu apa hān asuak ngāi kōma:
‘Anrarapa puan āsa khīt valāka hong mantiang u ro.
Hanūk chu akuta zaketam le akena kekok hong manbun u ro.
23 Hanūk chu serāt amar khīt valāk u tān hong that u ro.
Hong u ro,
nēk sāk athōna rāi mansān u rei.
24 Asik chu hiva ka nāi pasal hi athi sua ani na,
tenchu ahong adam rēt zei.
Anpei sua ani na,
anman rēt zei,’
ati na.
Hatuka rāisānna athō u na.
25 Hava lāi tak han ulianpu ha phāia om ani na.
Nukhōna ahonga in ahong dēp le khuang rasa le alām rasa ahong riata.
26 Hasika han suak ngāi bila angkhat apāia:
‘Sova ngāi so i ang zāt mo so?’
ati na arakela.
27 Hatuka amān:
‘Na nāipa ahong zei,
adam ahar vanga ei man rēt sika na pān serāt amar khīt ha ei man that ani na,’
ati na.
28 Hatuka ama chu atak asina insūnga valūt zōt lāi mak.
Hasik han apa avasuaka avamathēma.
29 Tenchu apa kōma hintin hin amasanga:
‘Enta!
Hidor kum tenpei nang kei na hong kiavāng ani na,
na chong bāikhatte ngal khēl makung.
Hanum nisela kamal ka rual ngāi le kei sāk kei nēkpui ranga kēl asīnte khat ngal na la pe mak che.
30 Tenchu hiva na nāi pasal nōtizuar ngāi le anei anung avathek zit suale ina ahonga serāt amar khīt na lei thatpui,’
ati na.