Aiamrua bui sum
avongpu lehan ankhīna
16
1 Hanūk chu Isuan azolāi ngāi kōma hiva chong hi aril sa na:
“Mi aneipa khatin asum avongpu khat adōna.
Tenchu hava nāi hān apuma dōnglua dōra sōk ei mancha ati na atak chunga āsia ei manlō u ani na.
2 Hasik han apumān ama chu akuia akōma:
‘Nang na ruia hiva kei riat ngāi hi hong tina mo?
Sum nei vongna hisāp na pe ro.
Asik chu sum avongpu chang thei lāi nō ta ni,’
ati na.
3 Hatuka sum avongpu ha amalung sūnga andona hintin hin ati na:
‘Imo kei thō rang ani zei?
Ka pumapān ka sinthō nāta ei na khāi rang ani zei.
Phil atuk le thōthei nō ninga,
hanūk chu kut adō le kan zaka.
4 Ka sinthōna ahek tikle mīn a-ina ei na phām thei u na ranga imo kei thō rang,
hava ha ka riat zei,’
ati na.
5 Hatuka apuma kōma sum antāng ngāi dōra akui chipa.
Mān khītapu kōma:
‘Ka puma kōma ituk mo nei antāng?’
ati na.
6 Hatuka amān:
‘Sariak tīn raza khat,’
ati na amasanga.
Sum avongpu hān akōma:
‘Na lekha valāk tān anrapa ansuta tin sōm rangā maziak ro,’
ati na.
7 Hanūk chu angkhat kōm rēta:
‘Nang ituk mo nei antāng?’
ati na.
Hatuka amān:
‘Bu phali raza khat,’
ati na amasanga.
Hatuka chu amān akōma:
‘Na lekha valāk tānla phali sōm ariat maziak ro,’
ati na.
8 Hatuka chu hava sum avongpu adik nōkām ahian sabaka sin ei thō sika apumapān aman pāka.
Hiva hin ra- āng mi ngāi nēka hi maniapūr mi ngāi hi hiva ruala chu ahian uala anlang ti na riat theia.
9 Kei na ti ani u zei,
ramual sum puan lehan nangni ranga mal sin u ro.
Hatuka chu na bui tikle tāituana nei omna rang muna amānīn ana lei phām thei u na ranga.
10 Tukareng rui asīnte tak chunga aiam rua chu rui alianpa tak chungām aiam rua ani na.
Tukareng rui asīnte tak chunga aiam rua nōk chu rui alianpa tak chungām aiam nōk rua ani na.
11 Ramual sumpuan tak chunga aiam rua na ni u nōk ten,
ataktak neinung chungvānga chu tu mo anānngampui u rang?
12 Mi ta neinung tak chunga lua aiam rua na ni u nōk ten,
nangni na ta u rang tak chunga tu mo ana pēk u rang.
13 Suak angkhatin puma anni dorbo adomrit thei mak.
Asik chu angkhat mumāk intia,
angkhat madit inti.
Angkhat heng inti,
angkhat kāi inti.
Nangnīn Pathian le sum adorbo adomrit thei u mak che,”
ati na.
14 Sum andit Pharisi ngāiin hava chong dōra ariat u le chu Isua rang mani ēro athō u na.
15 Hatuka amāni kōma:
“Miring mit muna naninga nei dik u na nei manlang u chachak ani na.
Tenchu Pathianin na malung u ngāi ariata.
Asik chu miring ranga anpāk rua chu Pathian mitmuna antīr rua sabak ani na.
Anchūna ngāi bila ansapsa
16 Dānbu le deari lekhabu ngāi rui chu Johan ahun ten pei anrila.
Hatuka hava suale hava hun āta chu Pathian ram thang ahui rui aril u na.
Hatuka mi tinin aphāma ranak asonga hava han alūt ranga ei pūt u.
17 Dānbuna anziak rui ansun depte ngal anpei rang nēk ten ramual le anvān ei anpei rang hi abei ual.
18 Tukareng anungāk amāka,
nupang atei avalāk tak chu uiare ani na.
Hanūk chu tukareng aruatharin ei māk sua nungāk alāk tak um uiare ani na,”
ati na.
Āneipa le anriangte Lazar
19 Hankēng:
“Mi aneipa khat a om a,
ama chu puan senduk le puan annēm ngāi zāt arasila.
Anikhuan tina anlian le anlala ahui ahēka ei nēk chachak ani na.
20 Hatuka amakot kōla araming Lazar ati na kut adō khat hi ei hong siak babang u ani na.
Ama ha ataksa pumpui āpānin ei thōm biang ani na.
21 Hatuka aneipa bukhēng āta achul ngāi asāk ranga achān ning ei ōl chachak ani na.
Hatuka chu ui ngāiin ei pānna ei hong maliak u chachak ani na.
22 Hatuka nikhat chu kut adōte athīna vānpalāi ngāiin Abraham arōp suama avasiak u na.
Hatuka aneipām athīna aphūm u na.
23 Hatuka antakna muna antak atiara a om chiana.
Hatuka chung tiang anhoia alapa nāta Abraham le arōp suama om Lazar avamuna.
24 Hasik han anringa ankhēka:
‘Ka pa Abraham,
lungkham na mu ro.
Lazar na hong tīr pe tānla,
amān akut chal mērte tia aphūma ka adang na manchōp pe rase.
Asik chu hiva moi achuanga ka dūk ana sabak zei hile,’
ati na.
25 Tenchu Abrahamin amasanga:
‘Ka long,
mandon ta ro,
nang chu na damsūng lāi han ituk huina mo nei man ani na.
Tenchu Lazar chu ituk antakna mo ei man ani na.
Atun chu amān hiva muna phūkdāina ei man ani na,
nang chu antakna nei man ani zei.
26 Hava rong ha la ni mak,
tutē havan āta koini kōma ahong zōt ngāi ei hong thei u nōkna rang.
Hanuk chu hivan āta nangni kōma nei sē thei u nōkna ranga,
nangni le koini kong kāra akik alianpa khat a om zei,’
ati na.
27 Hatuka amān amasanga:
‘Hano ten ka pa,
ama ha ka pa ina anatīr pe ranga ka na mathēm.
28 Asik chu parual rangā ka dōna,
amānīn lua chu hiva antakna muna ei hong thei u nōkna ranga,
lungkham taka na varil pe rase,’
ati na.
29 Tenchu Abrahamin amasanga:
‘Mosi le deari ngāi lekhabu adōn u do,
amānīn achong u ngāi rangāi rase,’
ati na.
30 Hatuka amān ati na:
‘Ni mak,
ka pa Abraham,
hantin han ni mak,
tenchu athi ngāi bila angkhat pei asē u ten,
amalung makhīr unti,’
ati na.
31 Hatuka chu Abrahamin akōma:
‘Mosi le deari ngāi chong ngal arangāi u nōk ten,
athi ngāi bil āta ngal angkhat pei anthui ām ni sela lei iam u nō ni,’ ”
ati na.
Āsia thō,
iamna dōn,