Apūttit arōngnu lehan ankhīna
18
1 Hatuka akōm u na dok chuai luia bōr azong chian ei nāng rui zia hiva ankhīna lehin chong hi arila.
2 Isuan:
“Khua angkhata hin ruirilpu khat a om a.
Amān Pathian achi mak,
miring um poisak mak.
3 Hatuka hava khuana han arōng khat a om a.
Amān akōma:
‘Koi anadui tak chung āta adika rui na ril pe ro,’
ati na ahong pūttita amathēma.
4 Hava ruirilpu ha nikhua
ituk mo chu itē la ril pe mak.
Tenchu nukhōna athetheia andona:
‘Pathian ka chi ngal nōkam hanūk chu miring um ka poisak ngal nōk ām ni rase.
5 Hiva arōngnu hīn malung ei na manpōn chian sika,
le ka kōma ei hong babanga ei na manpōn lāi nōkna ranga,
adika rui ril pe ka ti,’
ati,”
ati na.
6 Hatuka Pumān:
“Ruirilpu adik nōk ani nām imo ei ti ha mandon u ta.
7 Pathian apāi,
amithang ngāi chunga adika rui zēk pe nō ni mo?
Asūn le azāna apāi ngāi ranga dūk ei diar nōk rang mo?
8 Kei na ril ani u zei,
arui zēk pe ranga sōt nō ni.
Tenchu Miring Nāi Pasal ahong tika maniapūra hin iamna hong mu ni mo tāk?”
ati na.
Pharisi le siachōi ansuangpu khat lehan ankhīna
9 Hatuka aninga adik ka ni anti na tenchu mi tei ranga mumāk ankhāi ngāi ranga Isuan hiva ankhīna chong hi arila:
10 “Pasal anni biak ina bōr azong ranga asē u na.
Angkhat chu Pharisi ani na,
hanūk angkhat chu siachōi ansuang ani na.
11 Pharisi chu andinga,
atheia ranga hintin hin bōr azonga:
‘Pathian,
nang ka na manpāk,
asik chu mi tei ngāi anga mi huang,
āsia thō,
uiare ni makunga.
Hanūk rēt chu sova siachōi ansuangpa angām ni makung.
12 Hapta khata voi anni bu ka ngoia,
kei sua kei vāng dōra nāta sōma angkhat um ka pēk,’
ati na.
13 Tenchu siachōi ansuangpa chu rāl khat āta andinga,
anvān tiang ngal tang ngam mak.
Tenchu arōp anchum chunga:
‘Pathian,
mi salui ka ni,
lungkham na mu ro,’
ati na.
14 Kei na ti ani u zei,
mān uala pu nēka hiva mi hi Pathian makunga asat anlōna ina akīra.
Asik chu tukareng aninga ansāng chu annuaia om inti,
hanūk chu tukareng aninga annuai chu ansānga om inti,”
ati na.
Isua le nāipangte ngāi
15 Hatuka chu Isuan ei tōn theina ranga mi ngāiin anāite u ngāi um ahong ruai u na.
Tenchu azolāi ngāiin hava amu u na alei angō u na.
16 Tenchu Isuan nāipang ngāi chu akōma apāia:
“Nāipangte ngāi ka kōma hong man hong u ro.
Khār u nō ro.
Asik chu Pathian ram chu hiva ang mi ngāi ta kēng.
17 Chong tataka kei na ril ani u zei,
tukareng nāipangte anga Pathian ram apom nōk tak chu asūnga lūt pial thei nō ni,”
ati na.
Ruaitu anchong khat rui
18 Hatuka Jihudi ngāi ruaitu khatin akōma:
“Mīnchūpu asa,
tāituan damna kei lua theina ranga hong mo kei thō anāng?”
ati na arakela.
19 Isuan akōma:
“Ichang mo asa nei na ti?
Angkhat dak rong nōk chu tutē asa om mak,
ama chu Pathian ani na.
20 Chongpēk ngāi chu na riat kiar hale:
‘Uire nō ro,
Mi that nō ro,
Marusa nō ro,
Milak chong ariatpui chang
nō ro,
Na nu na pa lalchi thō ro,’
ti ngāi dōra ha,”
ati na.
21 Hatuka amān:
“Hava ngāi dōra chu nāipangte ka chang lāi āta kei tel kiar kēng,”
ati na.
22 Isuan hava chong ariata akōma:
“Atun ten nei lān sam angkhat ala om.
Na nei dōra aloma zuar tānla,
anriang ngāi kōma sem ro.
Hatuka anvāna na ranga dōng lua man in na ti.
Hatuka hong tānla,
ka nūk na hong zī ro,”
ati na.
23 Hava mi hān hava chong ariata achān ana pe na,
asik chu ama ha aneipa khat ani na.
24 Hatuka Isuan amalung ana ti ariata akōma:
“Anei ngāi Pathian rama alūt rang hi antak rang banu!
25 Otataka,
anei ngāi Pathian rama alūt nēk ten simphuai kuara mākingkang alūt hi abei ual,”
ati na.
26 Hatuka hava chong ariat ngāiin akōma:
“Hanle,
havan tin han nisela,
tu tu ngal mo sandama
a om thei rang ani zei?”
ati u na.
27 Hatuka Isuan amasanga:
“Miringin ei thōthei nōk ha Pathianin chu athōthei,”
ati na.
28 Hatuka Peterin akōma:
“Enta,
koinīn na nei ngāi dōra aloma na māk zita na nūk na na hong zī,”
ati na.
29 Isuan amāni kōma:
“Chong tataka kei na ril ani u zei,
tukareng Pathian ram sika ain mo,
anu apa mo,
aunāi mo,
anungāk mo,
anāi ngāi mo amāk tak.
30 Atuna hiva hun ngēta hin hava ngāi nēka ātam aman nōk rang tutē om mak,
nangkana hun tikām tāituan damna ei la man rang,”
ati na.
Isuan ama ei thī rang
rui aphāmān alei ril rēt
31 Hatuka Isuan Sōmleianni ngāi ha abingtena apāia ateia aruaia akōm u na:
“En u ro,
Jerusalem khopui asē rang na ni zei,
deari ngāi lekbabuna anziak rui dōra ha koi Miring Nāi Pasal tak chunga hin ahong atung rang ani zei.
32 Jentail ngāi kuta na betōk unti,
mani ēro na thō unti.
Mualphui na sak unti,
ka chunga na machil unti.
33 Hanūk chu na zēm untia,
na that unti.
Hatuka nīnthum nikhua changna hong anthui rēt ka ti,”
ati na.
34 Hatuka azolāi ngāiin hiva omzia hi itē riat thei u mak.
Achongril ngāi amāni kōma anthup ani na,
hong zāt rui mo ei ril ha riat sua thei u lāi mak.
Kut adō mit achō
khat Isuan amandam
35 Hatuka Jeriko khua ahong dēp le amit achō khat lampui sīra ansuta kut alei dona.
36 Hava mi hān mipui kal ei chōi rasa ariata:
“Sova ngāi so tu mo?”
ati na arakela.
37 Hatuka amānīn:
“Nazaret Isua kēng kal achōia āsē,”
ati na aril u na.
38 Hatuka ama chu ankhēka:
“David Nāi Pasal Isua!
ka chunga riangvāi na mu ro,”
ati na.
39 Hatuka amatona āsē ngāiin:
“Dāirek ro,”
ati na angō u na.
Hanum nisela ama chu:
“David Nāi Pasal,
lungkham na mu ro,”
ati na ankhēk riama.
40 Hatuka Isua chu andinga mit achōpu chu akōma ahong aruai ranga arila.
Hatuka akōma ahong atungle arakela:
41 “Na chunga hong mo kei thō ranga nei zōt?”
ati na.
Hatuka amān:
“Puma,
athara ka mit ei vār rēt thei rang hi kei zōt,”
ati na.
42 Isuan akōma:
“Athara na mit vār rēt ta rase,
nei iamna lehin nei dam ani zei,”
ati na.
43 Hatuka anrapana amit avār len pe na,
Pathian anpāk chunga Isua nūk azī tira.
Hatuka mi dōrān hava ha amu u na Pathian amanpāk u na.