Iskariot Judān
Isua ansūr rang azōt
22
1 Hatuka chol anchel lui Jihudi ngāi ruti pānta chu ahong anāi zeia.
Hava ha Zōkna pānta ati u.
2 Chāizūng ngāi le dān mīnchū ngāiin hontin mo Isua thatna ati na lampui arok u na.
Asik chu amānīn mipui ei ngam u nōk ani na.
3 Hatuka chu zolāi sōmleianni ngāi bila angkhat Iskariot anti Juda asūnga soitān alūta.
4 Hatuka ama chu asēna,
chāizūng ngāi le biak in angāk ulian ngāi kuta ei mansūr theina ranga avān rilpuia.
5 Hatuka amāni ngāi chu achālaka arāi alei sān u na,
sum apēk ranga azōt u na.
6 Hatuka amām azōta,
mipui a om nōk lāi taka ansūra amāni kuta anbetōk ranga hēr aravāna.
Puma zāndui
7 Chol anchel lui Jihudi ngāi ruti pānta nikhuana,
Zōkna pāntana zāndui ranga berate anthatna nikhua ahong asuaka.
8 Isuan Peter le Johan atīra:
“Zōkna pāntana zāndui nei nēk theina ranga sē utān vamansūk u ro,”
ati na.
9 Hatuka amānīn:
“Hovan mo nei vamansūk ranga nei zōt?”
ati na arakel u na.
10 Hatuka amān:
“En u ro,
khopui na valūt u le,
pasal khat tikola anputa tiluak rang antongpui un na ti.
Ama ha zī u tān ei lūtna taka valūt u ro.
11 Hatuka in pumapa kōma:
‘Anānchupān,
ka zolāi ngāi le mun khata Zōkna pāntana zāndui ei nēkpuina ranga khual in ha hon tiang mo?
Ariat rang azōt,’
vati u ro.
12 Hatuka amān in chunga tadan in alianpa khat,
aloma anzēk vang na man mu unti,
hava han akip chīta vamansūk u ro,”
ati na.
13 Hatuka asē u na,
amān ei ti anga avamu u na,
Zōkna pāntana zāndui chu amansūk u na.
14 Hatuka hun ahong asuak le ama le akuitīr sōmleianni ngāi chu anruala zāndui bu nēk rang ansut u na.
15 Hatuka amān akōm u na:
“Antakna ka tiar mān hin nangni bila hiva Zōkna pāntana zāndui bu ana nēkpui u rang achān kei zōt sabak ani zei.
16 Kei na ril ani u zei,
Pathian rama hiva hi akip māseng chu hiva zāndui bu hi ne lāi nō ning,”
ati na.
17 Hatuka khuri alāka rāisān chong amantung suale:
“Hiva hi la u tān,
na kār u na ansem u ro.
18 Kei na ril ani u zei,
Pathian ram ahong atung māseng chu hiva gerep zu hi buang lāi nō ning,”
ati na.
19 Hava suale ruti alāka rāisān chong amantung suale akhiaka akōm u na apēka:
“Hiva hi ka taksa,
nangni ranga anpēk rang,
nei na riattit thei u na ranga thō u chachak ro,”
ati na.
20 Hantin han zāndui bu anēk sua u le khuri alāka akōm u na apēka:
“Hiva khurina ka thisen hi dān khit athara kēng,
hiva hi nangni ranga asuak rang chu ani.
21 Tenchu rangāi u ro,
koi anān sūr rangpu kut chu ka bila hiva tebul chunga hin asiak zei.
22 Miring Nāi Pasal chu taktataka Pathianin dān ei ratan sua anga ei panna rang chu ei pan rang ani zei.
Tenchu koi anān sūrpu miring chu avān aduai ba!”
ati na.
23 Hatuka amāni le amāni achong u na:
“Amāni bila tu mo hiva zāt om hi tu mo athō rang ani zei?”
ati na ankel u na.
Tu mo alian khīt rang?
24 Hanūk chu azolāi ngāi kāra tu mo alian khīta anruat rang ti ruia chong ankhalna asuaka.
25 Tenchu Isuan amasanga:
“Nam atei ngāi kāra rēng ngāi kēng ami ngāi chunga anlalna ei thō u.
Hanūk chu amāni chunga ningneina adōn ngāi ha ‘Satna sin āsa athō ngāi,’
anti u na.
26 Tenchu nangni chu hantin han ni u mak chena.
Na kār u na alian khīt ha asīn khīt anga om rase,
alian khīt achang ha mi dorbōndom anga om rase.
27 Tu mo alian ual?
Ansuta bu nēkpu mo ole ama dorbōndompu suak mo?
Ansuta bu anēkpu ha ni nō ni mo?
Tenchu koi chu na kār u na dorbōndompu anga kei om ani na.
28 Nangnīn antakna ka tiar lāi han na mathān u mak chena.
29 Ka pān ram khat ei na pēk anga,
nangnīm ram khat ka na pēk u.
30 Hatuka nangnīn ka rama ka bu nēkna tebula ansut un na ti.
Hanūk rēng chomphānga ansuta nam sōmleianni Israel ngāi ruiril un na ti,”
ati na.
Peterin Isua ei maniang
rang rui aphāmān alei ril
31 Hatuka Pumān:
“Simon,
Simon,
enta,
bu anrel anga anān rel ranga soitānin nangni ngāi ana man ranga ei zōt kēng ani zei.
32 Tenchu nei iam u na ei anpei nōkna ranga bōr ka na zong pe.
Hatuka nang um ka kōma na honga kīr rēt tika hiva na parual ngāi um manhar ro,”
ati na.
33 Tenchu Peterin amasanga:
“Puma,
na bila lung ina ankhum ranga le athi ām athi rang tenpeia kansin,”
ati na.
34 Isuan amasanga:
“Peter,
kei na ril ani zei,
avian ār akhuang mān na re makung ati na voi anthum na maniang in na ti,”
ati na.
35 Hankēng akōm u na:
“Poisa siakna,
marsa,
kekok buia ka na tīr u lāi han,
nei ansam u mo a om?”
ati na.
Amānīn:
“Ansam mak me,”
ati u na.
36 Hatuka amāni kōma:
“Atun chu,
poisa siakna adōnin hava ha chōi rase,
marsa adōnin um chōi rase.
Hanūk chu khendāi adōn nōkin akultāi azuara rachōk rase.
37 Kei na ril ani u zei:
‘Ama chu dān atel nōk ngāi
kāra antel kēng ani zei,’
(Isa.53:12 )
ti Lekhabu ānthianga ka rui anziak ha ei hong kip theina rang ani na.
Hava ngāi dōra ha ahong akip rang tatak rang anāi zei.”
ati na.
38 Hatuka azolāi ngāiin:
“Enta,
Puma,
hiva hin khendāi anni chu a om hile,”
ati u na.
Hatuka amān:
“Om ta rase,
ahun zei,”
ati na.
Maruan muala Isua bōr azong
39 Hatuka Isua havan āta asuaka ama adān anga han Maruan muala asēna,
azolāi ngāiin um anūk avazī u na.
40 Amun taka avasuak le amāni kōma:
“Anthēmna nei chul u nōkna ranga bōr zong u ro,”
ati na.
41 Hava suale ala uala asēna ankhāia aman khūk abila bōr avazonga:
42 “Ka Pa,
nang nei zōt aniten,
hiva khuri hi ka kōm āta na khāi pe ro.
Tenchu koi kei zōt ang ni mak,
nang nei zōt anga ni rase,”
ati na.
43 Hatuka anvān āta vānpalāi khat ahong anlanga ranak ahong pēka.
44 Antakna ei tēng rang ruia achān arathāta sabak riama bōr azonga.
ataksa nāta rathan chu thisen tang anga phila achula.
45 Hatuka bōr azong suale anthuia,
azolāi ngāi kōma ahonga.
Malung ana tuara andon rahei u na azolāi ngāi alei ina ahong mu na.
46 Akōm u na:
“Ichang mo na lei in u?.
Anthui u tān,
bōr zong u ro.
Hankēng anthēmnana nei chul u nōk rang,”
ati na.
Isua ansūr
47 Hatuka hava ha chong ala ril chian lāi tak han,
mipui ātampa ahong asuak zut u na.
Zolāi sōmleianni ngāi bila angkhat Juda hān maton ansana ahong ruaia hatuka biang antum ranga Isua ahong pana.
48 Tenchu Isuan:
“Juda,
Miring Nāi Pasal hi biang antuma mo nei mansūr rang ani zei?”
ati na.
49 Hatuka ama aravēla a om ngāiin hong khat mo chu asuak rang ani zei ti ariat u le:
“Puma,
na khendāi ngāi lehin na tuk?”
ati u na.
50 Hatuka amāni bila angkhatin chāizūng asuak khat achang kuar a-āt pe vinga.
51 Tenchu Isuan:
“Mong ta ro,
thō lāi nō ro,”
ati na.
Hatuka akuar avatōna amandam pe rēta.
52 Ama sūr ranga hong chāizūng ngāi,
biak in angāk ulian ngāi le Jihudi pātar ngāi kōma:
“Misuam ngāi āsūr anga mo ana sūr ranga khendāi
le sunrol le nei hong u?
53 Anikhuan tina biak ina na bil u na ka om babang lāi han na sūr u mak chena.
Tenchu atun hin nangni na ranga hun ani
na,
azīng ningneina a om lāi,”
ati na.
Peterin Isua amaniang
54 Hatuka ama chu asūra aruai u na,
chāizūng alian ina avalūt pui u na.
Peterin rāl āta anūk avazīna.
55 Tenchu tual amalāi taka moi athōna ansut ngāi bila Peter
um ahonga amāni bila ansuta.
56 Hava han moi kōla ansuta suak nupangte khatin moi ra ānga amuna,
a en chiana:
“Hiva mi hīm ama bila anlop kēng,”
ati na.
57 Tenchu Peterin:
“Nupangte,
hava mi ha re makung,”
ati na ei maniang ani na.
58 Hatuka nangkan uala pasal atei khatin ahong mu rēta:
“Nang um ama bila mi kēng na ni hile,”
ati na.
Peterin:
“Miring,
koi ni pial makung,”
ati na.
59 Hatuka chu dār angkhat dām asē suale pasal atei khat rētin:
“Hiva mi hīm ama bila mi ngēt kēng.
Asik chu ama hi Galili rama mi kēng,”
ati na.
60 Hatuka Peterin:
“O pasal!
hong mo nei na ti ha koi chu riat makung,”
ati na.
Hatuka achong ril ahek mān ār ahong akhuang lena.
61 Hatuka Puma chu anhoia Peter tiang a ena.
Hatuka Pumān:
“Avian ār akhuang mān voi anthum nangin na re makung ati na nei na maniang rang,”
ei ti ha Peter amalunga ahong achuia.
62 Hatuka apanga asuaka achālaka avachapa.
Isua asūr ngāiin mani ēro thō u
63 Hatuka Isua asūr ngāiin mani ēro athō u na,
azēm u na.
64 Hanūk chu amit amahīp pe u na:
“Pathian chong ril rēt ta ro ba.
Tu mo ana zēm?”
ati na arakel u na.
65 Havan tin han mi tei ātampān chong ātampa arila mualphui asak u na.
Jihudi ngāiin ruirilna
alian matona Isua aruai u
66 Hatuka khua ahong avār le Jihudi pātar ulian ngāi,
chāizūng ulian ngāi le dān mīnchū ngāi mun khata anchun u na.
Hatuka amāni ruirilna liana aruai u na:
67 “Nang hi Krista tatak na ni ten,
koini ngāi na ril ta,”
ati u na.
Isuan amasanga:
“Ka na ril u nām nisela,
iam u nō ta ni.
68 Hanūk chu ka na rakel u nām,
itē na masang u nō tani.
Hanūk chu na mazōk u nō ta ni.
69 Tenchu atun āta Miring Nāi Pasal chu Pathian ranak anei khīt chang tianga ansuta om inti,”
ati na.
70 Hatuka alom u na arakel u na:
“Hano ten,
nang hi Pathian Nāi Pasal mo na ni?”
ati u na.
Amān:
“Nangni kēng atak aril na ni u,
hava ha ka ni len zei,”
ati na.
71 Hankēng amānīn:
“Ahun zei,
atei imo ariatpui nei nāng lāi?
Koini lenin amūr āta achong ariat na ni zei hile,”
ati u na.